राष्ट्रिय स्वतन्त्र पार्टी (रास्वपा) ले सचिवालय बैठक आह्वान गरेको छ।
रूपन्देही–३ को उम्मेदवार अनुमोदन गर्न रास्वपाले आइतबार दिउँसो १ बजे सचिवालय बैठक बोलाएको प्रवक्ता मनिष झाले जानकारी दिए।
राष्ट्रिय स्वतन्त्र पार्टीले प्राइमरी इलेक्सनमार्फत् रूपन्देही–३ को उम्मेदवार छनोट गरेको छ। उम्मेदवार घोषणा भने अपराह्न साढे ४ बजे पत्रकार सम्मेलनमार्फत् गरिने पनि प्रवक्ता झाले बताए।
‘प्राइमरी इलेक्सनमार्फत उम्मेदवार छनोट गरिएको छ। त्यसको अनुमोदन गर्न सचिवालय बैठक बोलाइएको हो,’ प्रवक्ता झाले भने।
रूपन्देही–३ मा आगामी असोज २१ गते उम्मेदवारी दर्ताको कार्यतालिका छ।
कात्तिक १७ गते रूपन्देही–३ मा हुने उपनिर्वाचनका लागि उम्मेदवार बन्न रास्वपाबाट ९ जना प्रतिस्पर्धी थिए। उनीहरूबीच लिडसिप एकेडेमीको अभ्यासमार्फत् प्रतिस्पर्धा र प्राइमरी इलेक्सन गराइएको थियो। प्राइमरी इलेक्सनमा सम्बन्धित निर्वाचन क्षेत्रका पार्टी सदस्य, स्थानीय, जिल्ला र प्रदेश समिति तथा केन्द्रीय समिति सदस्यले पनि मत हाल्ने व्यवस्था थियो।
उम्मेदवार छनोट कार्यविधिअनुसार लिडरसिप एकेडेमी, पोलिटिकल प्रोक्सिमिटी, समावेशितालाई ५० प्रतिशत मतभार र प्राइमरी इलेक्सनलाई ५० प्रतिशत मत भार तोकिएको छ।
प्राइमरी इलेक्सनको ५० प्रतिशत मतभारमा सम्बन्धित निर्वाचन क्षेत्रका पार्टी सदस्यको मतको हिस्सा ५० प्रतिशत, तहगत कमिटीको मतको हिस्सा ५ र केन्द्रीय सदस्यको मतको हिस्सा ५ प्रतिशत रहेको रास्वपाले बताएको छ।
उम्मेदवारको प्रतिस्पर्धामा सुलभ खरेल, पार्थिवेन्द्र उपाध्याय, डा. लेखजङ्ग थापा, ज्ञानु पौड्याल, जितबहादुर गुप्ता, कुसुम महर्जन, रचना क्षेत्री, पुनमकुमारी अग्रवाल र मधुप्रसाद अर्याल छन्।
रास्वपाले आइतबार दिउँसो पार्टी प्रवेश पनि गराउँदैछ।
जनता समाजवादी पार्टी नेपाल, लोकतान्त्रिक समाजवादी पार्टीका केन्द्रीय सदस्यसहित मधेसका केही नेता पार्टी प्रवेश गराउन लागिएको झाले बताए।
यो पनि:
रास्वपाले 'प्राइमरी चुनाव' बाट उम्मेदवार छान्ने भने पनि पार्टी केन्द्र हाबी हुने विधि तय
-1746009348.jpg)
