प्रदेशसभामा कोशीका पक्षमा मतदान गरेको महिना दिनपछि गल्ती भएको निष्कर्ष निकाल्दै 'प्रदेश १' नै प्रयोग गर्दै आएको नेकपा (माओवादी केन्द्र) फेरि कोशी मानेर जानुपर्ने पक्षमा उभिएको छ।
माओवादी अध्यक्ष पुष्पकमल दाहाल प्रचण्डले नै आफ्नो फरक मतसहित कोशी स्विकारेर जानुपर्ने बताएका छन्।
बिहीबार विराटनगरमा पार्टी प्रदेश सचिवालय बैठकलाई सम्बोधन गर्ने क्रममा प्रचण्डले कोशी प्रदेशको नामकरणमा पार्टीबाटै त्रुटि भएको पनि स्वीकार गरेका छन्।
'सविधानसभामा आरक्षण लगायतका विषयमा भिन्न मत राखेर पनि संविधान पारित गरेका थियौं,' उनले भने, 'कोशी प्रदेशको नाममा पनि त्यसै गरी भिन्न मत राखेर दुई तिहाइ बहुमतले गरेको निर्णयलाई स्वीकार गरेर जानुपर्छ।"
उनले दुई तिहाईले पारित गरेको कोशी नामलाई ‘डी फ्याक्टो’ (वास्तविक) रूपमा स्वीकार गर्ने तर ‘डी जुरे’ (न्यायिक) रूपमा भने नमान्ने पनि बताए।
'डि फ्याक्टो रुपमा स्वीकार गर्छौ तर डि जुरे रुपमा भने मान्दैनौं,' उनले भने, 'आगामी निर्वाचनपछि दुई तिहाई बहुमतसहित आफ्नो पक्षको नाम (किरात, लिम्बुवान, कोच) राख्न पहल गर्नुपर्छ।'
उनले यो विषयमा पार्टीका इन्चार्ज र अध्यक्षले सल्लाह गरेर केन्द्रमा सुझाव पठाउन र यसबारे केन्द्रबाटै निर्णय गरिने पनि बताए।
प्रचण्डले यसो भनिरहँदा बैठकको ब्यानरमा भने प्रदेश १ नै लेखिएको थियो।
२०७९ फागुन १७ मा तत्कालीन प्रदेश १ को नाम कोशी रहेको थियो।
नेकपा (एमाले), नेपाली कांग्रेस, नेकपा (माओवादी केन्द्र)सहितका प्रमुख दलहरुले कोशीकै पक्षमा मतदान गरेपछि एकीकृत समाजवादी र जसपाको फरक मतका बीच एमालेको प्रस्ताव दुई तिहाईभन्दा बढी मतले पारित भएको थियो।
लगत्तै कोशीमा आन्दोलन सुरु भएको थियो। सास्कृतिक सभ्यताको पहिचानका आधारमा प्रदेशको नामकरण गर्नुपर्ने भन्दै आफूलाई पहिचानवादी दाबी गर्ने समूहहरुले आन्दोलन थालेका थिए। २०७९ चैत ५ मा विराटनगरमा भएको प्रदर्शनमा एक जना आन्दोलनकारीको मृत्यु भएको थियो भने सयौं घाइते बनेका थिए।
प्रदेशमा आन्दोलन चर्कँदै गएपछि माओवादीको केन्द्रीय नेतृत्वले कोशीमा गल्ती भएको उल्लेख गर्दै पार्टी पहिचानकै पक्षमा उभिने बताएको थियो। त्यही बेला नेपाली काङ्ग्रेस कोशीका १४ वटै जिल्लाका सभापतिहरुले पनि आन्दोलन सम्बोधन गर्नुपर्ने भनेर सयुक्त विज्ञप्ति निकालेका थिए।
कोशीमा गल्ती भएको स्वीकार गरेकै बेलादेखि माओवादीले आफ्ना कार्यक्रमको ब्यानरमा प्रदेश १ लेख्दै आएको थियो। नेताहरुले बोल्ने क्रममा भने कोशी नै भन्दै आएका छन्।
-1755241369.jpg)
-1746009348.jpg)
