राष्ट्रिय स्वतन्त्र पार्टी (रास्वपा) को सहमहामन्त्रीमा दीपक बोहराको नाम प्रस्ताव गरिएपछि केन्द्रीय सदस्यद्वय डा. तोसिमा कार्की र क्रान्तिशिखा धितालले आपत्ति जनाएका छन्।
पार्टी केन्द्रीय कार्यालयमा शुक्रबार बसेको केन्द्रीय समिति बैठकमा महामन्त्री कविन्द्र बुर्लाकोटीले बोहरालाई सहमहामन्त्री मनोनीत गर्ने प्रस्ताव अघि सारेका थिए।
पार्टीका कार्यवाहक सभापति डोलप्रसाद अर्याल (डिपी) ले बुर्लाकोटीलाई उक्त प्रस्ताव एजेन्डाका रूपमा अघि सार्न अनुमति दिएका थिए।
सांसद सुमना श्रेष्ठले राजीनामा दिएपछि रिक्त रहेको सहमहामन्त्री पदमा बोहरालाई मनोनीत गर्न उक्त एजेन्डा अघि बढाइएको हो। तर केन्द्रीय सदस्यद्वय कार्की र धितालले असहमति जनाएको सहप्रवक्ता मनिष झाले जानकारी दिए।
‘दीपक बोहरा यसअघि पार्टीको सहकोषाध्यक्ष हुनुहुन्थ्यो। हाम्रो पार्टीमा यसअघि दुई जना सहकोषाध्यक्ष रहेकामा पछि एक जना मात्रै राख्ने भनेर बसुमाया तामाङलाई कायम राखियो। निर्वाचन आयोगलाई पनि जानकारी गराइयो। त्यसपछि दीपक बोहरा सचिवालय सदस्य मात्रै रहनुभएको थियो। महामन्त्री कविन्द्र बुर्लाकोटीले आजको बैठकमा उहाँलाई सहमहामन्त्री बनाउने प्रस्ताव अघि सार्नुभएको थियो। त्यसमा केन्द्रीय सदस्य तोसिमा कार्की र क्रान्तिशिखा धितालले असहमति राख्नुभएको हो,’ उनले भने।
अर्का केन्द्रीय सदस्यले भने कार्यसूचीमै नभएको सहमहामन्त्रीको प्रस्ताव ल्याइएको भन्दै कार्की र धितालले आपत्ति जनाएको बताए। आजको बैठकमा १३ वटा कार्यसूची भए पनि सहमहामन्त्री मनोनीतको विषय भने समावेश थिएन।
‘आजको कार्यसूचीमा सहमहामन्त्री मनोनीतको विषय नै थिएन। सचिवालय बैठकमा पनि त्यो विषय छलफल भएको होइन। एक्कासि बैठकमा प्रस्तुत गरेपछि विरोध भएको हो,’ ती केन्द्रीय सदस्यले भने।
ती नेताका अनुसार बोहराले सहकोषाध्यक्ष पदबाट राजीनामा पनि दिएका छैनन्। उनको नाम पार्टीको वेबसाइटमा सहकोषाध्यक्ष भनेर नै उल्लेख छ।
प्रवक्ता झाले भने महिला सहमहामन्त्रीको ठाउँमा महिला नै प्रस्ताव गरिनुपर्ने आवाज उठेपछि विषय सचिवालयमै फर्काइएको बताए।
‘रिक्त पदमा पूर्ति गर्ने गरी प्रस्ताव आएको हो। यसमा पर्याप्त छलफल गर्नुपर्छ। सचिवालयमै छलफल भएर आओस् भन्ने राय रहेपछि हामीले त्यही निर्णय गरेका छौं,’ उनले भने।
बोहरा पार्टीका संस्थापक केन्द्रीय सदस्य हुन्। उनी पार्टी सभापति रवि लामिछानेका निकट सहयोगी पनि हुन्। सभापति लामिछानेको सचिवालयमै रहेर काम गरेकाले पनि उनलाई सहमहामन्त्री बनाउन खोजिएको हो। केन्द्रीय समितिमै विरोध भएपछि सचिवालयमा छलफल गर्ने गरी बिट मारिएको रास्वपाका नेताहरूले बताए।
अहिले पार्टीमा विपिनकुमार आचार्य मात्र सहमहामन्त्री छन्। सहमहामन्त्री आचार्यले पनि दीपक बोहरालाई सहमहामन्त्री प्रस्ताव गरिएको बताए। तर थप छलफल गर्नुपर्ने बताएपछि केन्द्रीय समिति बैठकमा थप बहस नभएको उनको भनाइ छ।
बैठकले के के गर्यो निर्णय?
रास्वपा केन्द्रीय समिति बैठकले मधेस प्रदेश समिति सहमहामन्त्रीमा बाराका गणेश धिमाल र सिराहाका पुनम साहलाई नियुक्त गरेको छ।
पार्टी केन्द्रीय कार्यालय चःमतिमा शुक्रबार बसेको केन्द्रीय समिति बैठकले विदेशमा रहेका नेपाली नागरिकहरूका लागि मताधिकार व्यवस्था गर्न सरकार र सम्बन्धित निकायहरुको गम्भीर ध्यानाकर्षण गराउने अभियान सञ्चालन गर्ने निर्णय पनि गरेको छ।
आजको बैठकले पार्टी सभापति रवि लामिछानेमाथि राजनीतिक प्रतिशोध भएको भन्दै चलाइरहेको हस्ताक्षर अभियानलाई देशव्यापी रूपमा प्रभावकारी बनाउने निर्णय गरेको छ। हालसम्म ३२ लाख बढी हस्ताक्षर संकलन गरेको पनि रास्वपाले दाबी गरेको छ।
त्यस्तै, बैठकले पार्टीको संस्थापक केन्द्रीय सदस्य ईश्रामुल्ला मियालाई केन्द्रीय सदस्यको जिम्मेवारी पुनः दिने निर्णय गरेको छ। उनी यसअघि हज कमिटीको अध्यक्षमा नियुक्ति भएका थिए। त्यति बेला पार्टीको केन्द्रीय सदस्यबाट राजीनामा दिएका उनलाई आजबाट पुनः जिम्मेवारीमा फर्काइएको हो।
बैठकले केन्द्रीय श्रम तथा उपभोक्ता हित विभाग प्रमुखमा काठमाडौंका श्यामबाबु गौतम र उपप्रमुखमा नवलपुरका ललित श्रेष्ठलाई नियुक्त गरेको छ।
केन्द्रीय सार्वजनिक लेखा समीक्षा विभाग प्रमुखमा नवलपुरकै गोकुल सापकोटा नियुक्त गरेको छ। पार्टीले सम्पादन गर्नुपर्ने विभिन्न रणनीतिक कार्यहरू सम्पादन गर्न रणनीतिक समूहहरू गठन गर्ने रास्वपाले बताएको छ।
पार्टीको संगठन वडादेखि जिल्ला हुँदै प्रदेश र केन्द्रसम्म सशक्त बनाउन र आवश्यक सबलीकरणका लागि केन्द्रीय समितिका सबै सदस्य तथा केन्द्रीय विभागका सबै सदस्यलाई जिल्लामा परिचालन गर्ने निर्णय गरेको पार्टी प्रवक्ता मनिष झाले बताए।
-1754812957.jpeg)
-1746009348.jpg)
