नेपाली कांग्रेसका नेता शेखर कोइरालाले संसदीय दल नेता फेर्न आफू नलागेको बताएका छन्।
संसदीय दल नेता फेर्नका लागि सांसदहरूको संख्या आवश्यक पर्ने उल्लेख गर्दै कोइरालाले त्यो सम्भावना अहिले नरहेको पनि बताए।
‘संसदीय दल नेता फेर्न संख्या चाहिन्छ, त्यसै त हुँदैन,’ विराटनगरमा बुधबार पत्रकारहरूसँग कुराकानी गर्दै उनले भने, ‘यो कुरा सभापतिजीले पनि बुझ्नुभएको छ, चिन्ता गर्नुपर्दैन।’
कोइरालाले कांग्रेस-एमाले समीकरणको अहिलेको संघीय सरकारले राम्रोसँग काम गर्न नसकेको टिप्पणी पनि गरेका छन्।
‘यो समीकरण र सरकार २०८४ सम्म नै जाओस्,’ उनले भने, ‘तर सरकार राम्रोसँग चलाउनुपर्यो, अहिले राम्रोसँग चलेको छैन।’
उनले कांग्रेस र एमालेबीच भएका ७ बुँदे सहमति कार्यान्वयनतर्फ लैजानुपर्नेमा जोड दिए।
हालै नेता शेखर कोइरालाले प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' र पूर्वराष्ट्रपति विद्यादेवी भण्डारीसँग भेटवार्ता गरेपछि कांग्रेसभित्र र बाहिर पनि त्यसको चर्चा भएको थियो।
कोइरालाको यो भेटलाई लिएर कांग्रेसका पूर्वपदाधिकारीहरूले कुरा उठाएपछि सभापति शेरबहादुर देउवाले 'सक्ने भए संसदीय दल नेता परिवर्तन गरेर देखाउन' कोइरालालाई चुनौती दिएका थिए।
तर कोइरालाले नेताहरूबीच भेटवार्तालाई सामान्य रूपमा लिनुपर्ने बताएका छन्।
२०७९ पुस ६ गते भएको संसदीय दल नेता चुनावमा देउवा ६४ मतसहित निर्वाचित हुँदा अर्का उम्मेदवार महामन्त्री गगन थापाले २५ मतमात्रै ल्याएका थिए।
त्यो संख्यामा खासै फेरबदल नआएकोले संसदीय दल नेता परिवर्तन हुन सक्ने सम्भावना कांग्रेसमा कम छ।
यो पनि: देउवालाई ५ भाइले सोधे- तपाईंले कसैलाई सभापतिको ‘ग्रिन सिग्नल’ दिइसकेको हो?