७८ लाख रुपैयाँ 'घुस डिल' गरेकोसम्बन्धी अडिओ 'भाइरल' हुँदासमेत उच्चस्तरीय सुशासन आयोगका अध्यक्षसमेत रहेका प्रधानमन्त्री केपी शर्मा ओलीले संघीय मामिला तथा सामान्य प्रशासन मन्त्री राजकुमार गुप्तालाई बर्खास्त गरेनन्।
बरू सोमबार बालुवाटार बोलाएर सोधपुछ गरे, तत्काल 'एक्सन' लिएनन्। प्रधानमन्त्रीले सामान्य सोधपुछ गरी छाडेपछि मन्त्री गुप्ता 'फुक्काफाल' जस्तै थिए, सोमबार बेलुकीको मन्त्रिपरिषद बैठकमा पनि सहभागी भए। प्रधानमन्त्री ओलीले 'के भएको हो' भनेर मात्र सोधखोज गरेकोले तत्काल बर्खास्त गर्दैनन्, राजीनामा पनि माग्दैनन् भन्नेमा उनी ढुक्कजस्तै थिए।
भूमि आयोग कास्कीको अध्यक्ष बनाउन २५ लाख र मालपोत कार्यालय कास्कीको तत्कालीन प्रमुखको सरूवा रोक्न ५३ लाख घुस लेनदेनसम्बन्धी 'डिल गरेको' अडिओ सार्वजनिक भएपछि मन्त्री गुप्ताको राजीनामा माग भइरहेको थियो।
गुप्ताले सार्वजनिक अडिओबारे आवाज परीक्षण गर्न तयार रहेको र आफू तथा मन्त्रालयको खातामा रकम नआएको दाबीसमेत गर्दै आएका थिए।
प्रधानमन्त्रीले घुस डिल अडिओमा मुछिएका मन्त्रीलाई बर्खास्त नगरेपछि सत्तारूढ नेपाली कांग्रेसका महामन्त्री गगन थापा र नेता शेखर कोइरालाले प्रश्न उठाएका थिए। मंगलबार बिहानसम्म आइपुग्दा एमालेकै नेता राजन भट्टराई लगायतले पनि प्रश्न उठाए, मन्त्रीलाई बर्खास्त गर्न माग गरे।
यसअघि संसदमा प्रमुख प्रतिपक्षी नेकपा (माओवादी केन्द्र), राष्ट्रिय स्वतन्त्र पार्टी र एमालेकै कतिपय सांसदले पनि मन्त्री गुप्ताको राजीनामा मागिसकेका थिए। तर प्रधानमन्त्री ओलीले यसबारे तत्काल केही निर्णय लिएका थिएनन्।
सोमबार प्रधानमन्त्री ओलीलाई भेटेर फर्केपछि 'ढुक्कजस्तै देखिएका' गुप्ता मंगलबार बिहान बालुवाटारको फोनपछि भने झसङ्ग भए।
गुप्ता मंगलबार बिहानै हस्याङफस्याङ गर्दै बालुवाटार पुगे।
‘प्रधानमन्त्रीजीले बोलाएपछि उहाँ हस्याङफस्याङ गर्दै बालुवाटार आइपुग्नु भएको थियो, उहाँले जुत्ताको एउटा तुनासमेत बाँध्नु भएको रहेनछ,’ स्रोतले भन्यो, ‘बालुवाटार आएर सिधै बैठक कक्षमा जानुभयो। केहीबेरमा त्यहाँ प्रधानमन्त्रीजी आउनुभएको थियो।’
प्रधानमन्त्री ओलीले बैठक कक्षमा प्रवेश गर्नेबित्तिकै एक कर्मचारीलाई बोलाए।
प्रधानमन्त्रीजीले एक जना कर्मचारीलाई बोलाउनुभयो, मन्त्री गुप्तालाई देखाउँदै उहाँलाई ए फोर साइजको खाली पाना दिनुहोस् भन्नुभयो,’ स्रोतले भन्यो, ‘एफोर साइजको खाली पाना हातमा परेपछि मन्त्री गुप्ता अर्को कोठामा गएर राजीनामा लेख्नुभयो।’
त्यतिन्जेल प्रधानमन्त्री ओलीले बैठक कक्ष छाडिसकेका थिए। आफू विश्वविद्यालयको सिनेट बैठकमा जान हतारमा रहेको कुरा पनि प्रधानमन्त्रीले मन्त्री गुप्तालाई सुनाएका थिए।
‘उहाँले राजीनामा लेख्नुभयो र यहीँ छाडेर जानुभयो, प्रधानमन्त्री सिनेट बैठकमा जानुभएकोले उहाँको हातैमा राजीनामा भने दिएको होइन,’ स्रोतले भन्यो।
यसको केही बेरपछि मन्त्री गुप्ताले फेसबुकमा स्टाटस लेख्दै आफूले संघीय मामिला तथा सामान्य प्रशासन मन्त्री पदबाट राजीनामा दिएको उल्लेख गरेका थिए।
‘विगत केही दिनअघिदेखि निरन्तर मेरो नाम घुस डिलसँगै जोडेर प्रचारमा आएको कुरा सबैलाई जानकारीनै छ। कहिलेकाहीँ नखाएको विष पनि लाग्दो रहेछ, म अहिले त्यसैको शिकार भएँ, अब लागेको आरोप अनुसन्धान गरी सत्यतथ्य कुरा बाहिर ल्याउन सहयोग पुगोस् भनेर प्रधानमन्त्रीसमक्ष सामान्य प्रशासन मन्त्री पदबाट राजीनामा गरेको छु,’ मन्त्री गुप्ताले भनेका थिए।
साथै उनले प्रविधिको प्रयोगको शिकार आफू भएको र अब कोही पनि यस्तो शिकार नबनुन भन्ने अपेक्षा गरेको उल्लेख गरेका छन्। ‘अब फेरि एकपटक देश र जनताप्रति थप जिम्मेवारी बोधका साथ पार्टीले दिएको जिम्मेवारी इमान र निष्ठाका साथ पूरा गर्ने प्रतिबद्धताको साथ जनताको घरदैलोमा आउने प्रण गर्दछु,’ उनले भनेका थिए।
मन्त्री गुप्ताले घुस डिल गरेकोसम्बन्धी विषय अख्तियार दुरूपयोग अनुसन्धान आयोगमा समेत पुगेको छ। मन्त्री गुप्ताले पदबाट राजीनामा दिए पनि यस विषयमा उनलाई पक्राउ गरी छानबिन गर्न सांसदहरूले मंगलबारको प्रतिनिधि सभामा पनि माग गरेका छन्।
यो पनि:
घुस डिल गर्दै मन्त्री गुप्तालाई १५ लाख अहिले लिनु, १० लाख भोलि ल्याइदिन्छु भनेको अडिओ
पोखराको १३५ रोपनी लिची बगैंचा हडप्न मन्त्री–बिचौलिया 'घुस डिल'
-copy-1745411477.jpg)
-1746009348.jpg)
