नागरिक उन्मुक्ति पार्टी (नाउपा) का संरक्षक रेशम चौधरी पक्राउ परेका छन्।
काठमाडौंको कमलादीस्थित नेपाल प्रज्ञा प्रतिष्ठान पुगेका चौधरीलाई बुधबार मध्याह्न प्रहरीले नियन्त्रणमा लिएको हो।
प्रज्ञा भवनमा जनमत र नाउपा पार्टी एकताको कार्यक्रम हुँदै थियो। उक्त कार्यक्रम सुरू हुनुपूर्व नै रेशम पक्राउ परेका हुन्।
‘रेशम चौधरीलाई हामीले नियन्त्रणमा लिएर डिल्लीबजार कारागार पठाएका छौं,’ जिल्ला प्रहरी परिसर काठमाडौंका एसपी अपिलराज बोहराले सेतोपाटीसँग भने।
एसएसपी विश्व अधिकारीले सर्वोच्च अदालतको फैसला कार्यान्वयन सिलसिलामा रेशम चौधरीलाई पक्राउ गरिएको बताए।
‘टीकापुर घटनासम्बन्धी सर्वोच्च अदालतबाट कारागाभित्रै राख्नु भनेर पछिल्लो आदेश दिएअनुसार फैसला कार्यान्वयनका लागि उहाँलाई नियन्त्रणमा लिएर डिल्लीबजार कारागार बुझाइसकेका छौं,’ उनले सेतोपाटीसँग भने।
जनमत पार्टीका अध्यक्ष सिके राउतले पार्टी एकता घोषणा हुन लाग्दा चौधरीलाई नेपाल प्रहरीले कार्यक्रम स्थलबाटै पक्राउ गरेको बताए।
‘पार्टी एकीकरण प्रज्ञा प्रतिष्ठानमा घोषणा हुन लाग्दै रेशम चौधरीलाई नेपाल प्रहरीले कार्यक्रमस्थलमा नै पक्राउ गरेर पुरानो फैसला कार्यान्वयन गर्नका लागि डिल्लीबजार जेल पठाएको खबर प्राप्त भएको छ। यसको हामी घोर भर्त्सना गर्दछौं। यस कारणले आजको एकीकरण कार्यक्रम स्थगित गरिएको छ र सम्पूर्ण नेता कार्यकर्ताहरूलाई आ-आफ्नो घर जान आग्रह गरिएको छ। बैठक बसेर अर्को सूचना हामी शीघ्र दिनेछौं,’ अध्यक्ष राउतले भनेका छन्।
