राजसंस्था पुनर्स्थापनालगायत एजेन्डा बोकेर आन्दोलन गरिरहेका विभिन्न दल, अभियान र समूहका मुख्य नेताहरू सोमबार एकै मञ्चमा देखिए।
राप्रपा नेपालको आयोजनामा काठमाडौंको शान्तिबाटिकामा भएको 'जनप्रदर्शन' मा राजावादीहरू एकजुट देखिएका हुन्।
राजसंस्था पुनर्स्थापना, हिन्दु राष्ट्र पुनर्स्थापना र संघीयता खारेजीको मुद्दा उठाएका राप्रपादेखि 'संयुक्त जनआन्दोलन समिति' सम्मका नेतालाई एकै मञ्चमा उभ्याउने काम राप्रपा नेपालका अध्यक्ष कमल थापाले गरेका हुन्।
यसअघि उनीहरू राजसंस्था पुनर्स्थापनालगायत समान एजेन्डामा फरक-फरक कार्यक्रम गर्दै आएका थिए।
चैत १५ गते राजसंस्था पुनर्स्थापनाका लागि दुर्गा प्रसाईंको आह्वानमा तीनकुने क्षेत्रमा भएको कार्यक्रम हिंसात्मक बनेपछि राप्रपा वरिष्ठ उपाध्यक्ष रवीन्द्र मिश्र र महामन्त्री धवल शम्शेर राणालगायत पक्राउ परे।
लगत्तैदेखि राप्रपाले उनीहरूको रिहाइको माग गरिरहेको छ। यही पृष्ठभूमिमा 'आस्थाका बन्दीहरू' लाई रिहाइको मागसहित धर्मनिरपेक्षता तथा गणतन्त्रको विरोधमा बन्देज लगाउने कानुन बनाउन पाइँदैन भन्दै उनीहरू एकजुट भएका हुन्।
राप्रपा नेपालले गरेको 'जनप्रदर्शन' को मञ्चमा पुगेका नेताहरूले राजसंस्था पुनर्स्थापनालगायत एजेन्डामा एकअर्काले गर्ने कार्यक्रमलाई समर्थन गर्ने पनि उद्घोष गरे।
सोमबार शान्तिबाटिकामा भएको कार्यक्रममा राप्रपा अध्यक्ष राजेन्द्र लिङ्देन, राप्रपा नेपालका अध्यक्ष कमल थापा, संयुक्त जनआन्दोलन समितिका संयोजक नवराज सुवेदी र राष्ट्रिय शक्ति नेपाल अभियानका प्रमुख केशरबहादुर विष्ट पुगेका हुन्।
कुनै बेला उनीहरू सबै राप्रपामै थिए। अहिले छिन्नभिन्न भई सक्रिय छन् तर राजसंस्था पुनर्स्थापनाको एजेन्डा भने छाडेका छैनन्। बेलाबेला जुट्ने र फुट्ने गर्दै आएका उनीहरू अहिले राजसंस्था पुनर्स्थापना, संघीयता खारेजीजस्ता मुद्दामा पुन: एक भएका हुन्।
राप्रपाले राजसंस्था पुनर्स्थापनालगायत आन्दोलन अध्यक्ष राजेन्द्र लिङ्देनकै नेतृत्वमा गर्ने निर्णय गर्दै आन्दोलनसमेत गर्दै आएको छ। कुनै दल वा समूहले गर्ने कार्यक्रममा सक्रिय भए वा कार्यसमितिमा कुनै पदमा बसे राप्रपाले त्यस्ता नेताको पद स्वत: खारेज हुने निर्णय गरे पनि अहिले अध्यक्ष लिङ्देन नै फरक पार्टीले गर्ने कार्यक्रममा मञ्च सेयर गर्न पुगेका छन्।
यो पनि: कुनै अभियान वा समूहमा सक्रिय भए राप्रपा नेताहरूको पद स्वत: खारेज
यसअघि नवराज सुवेदी नेतृत्वको राजसंस्था पुनर्स्थापना संयुक्त जनआन्दोलन समितिमा बस्न नमानेका र जगमान गुरूङ कार्यवाहक अध्यक्ष हुँदा प्रतिबद्धता सभामा अनुपस्थित रहेका लिङ्देन कमल थापाले राखेको 'जनप्रदर्शन' मा भने सहभागी भएर तिनै नवराज सुवेदीलगायत नेताहरूसँग हातमा हात मिलाएर एकजुट रहेको सन्देश दिए।
यसबीच लिङ्देन र सुवेदीबीच भेटेर कुराकानी भएको थियो। सुवेदी निवासमा उनीहरूबीच भेटवार्ता भएको फोटो राप्रपा प्रवक्ता मोहन श्रेष्ठले सार्वजनिक गरेका थिए। चैत १५ गते तीनकुने क्षेत्रमा घटना भएपछि सुवेदीको घरबाहिर प्रहरीले निगरानी गरेको थियो भने सुवेदीले आफूलाई नजरबन्दमा राखेको भन्दै विज्ञप्ति जारी गरेका थिए।
संयुक्त जनआन्दोलन समितिका संयोजक नवराज सुवेदीसँग कुराकानी गर्दै राप्रपा अध्यक्ष राजेन्द्र लिङ्देन। तस्बिर स्रोत: मोहन श्रेष्ठ।
८६ वर्षीय पूर्वपञ्च नवराज सुवेदी संयोजकत्वको संयुक्त जनआन्दोलन समितिले चैत १४ गते दुर्गा प्रसाईंलाई 'जनकमाण्डर' तोकेको थियो भने प्रदर्शनमा समर्थनसमेत जनाएको थियो। सुवेदी पनि तीनकुने पुगेका थिए तर सभा सुरू हुनुअघि नै प्रदर्शन भड्केकोले सम्बोधन गर्न पाएका थिएनन्। तीनकुने घटनामा दुई जनाको मृत्यु भएको थियो। व्यक्तिगत घर, सरकारी गाडी, जडिबुटी प्रशोधन केन्द्र र पार्टी कार्यालयमा आगजनी र भाटभटेनीमा लुटपाट भएको थियो।
आफ्नो घर बाहिरबाट प्रहरी निगरानी हटेको भन्दै सुवेदी संयुक्त जनआन्दोलन समितिको संयोजकको जिम्मेवारीमा फर्किएपछि अध्यक्ष लिङ्देनले घरमै पुगेर उनलाई भेटेका थिए। प्रहरीले भने सुवेदीकै सुरक्षाका लागि घरबाहिर प्रहरी राख्नु परेको जबाफ दिने गरेको थियो।
साथै राप्रपा अध्यक्ष लिङ्देनसहित ७ जना नेताहरूले पूर्वराजा ज्ञानेन्द्र शाहलाई वैशाख ५ गते निर्मल निवासमा पुगेर छलफल गरेका थिए।
यो पनि: पूर्वराजाले राप्रपाका ७ नेतालाई निवासमा बोलाएर गरे 'लञ्च मिटिङ'
मुलुकमा २०६५ जेठ १५ गते गणतन्त्र घोषणा गर्दादेखि नै राप्रपा यसको विरोधमा थियो। उसले यो एजेन्डालाई निरन्तरता दिँदै आएको छ। पछिल्लो समय राजसंस्थाको एजेन्डामा मेडिकल व्यवसायी दुर्गा प्रसाईं नेतृत्वको अभियान पनि लाग्यो, जसले राप्रपालाई झस्काएको थियो।
गत फागुन ७ गते प्रजातन्त्र दिवसको पूर्वसन्ध्यामा पूर्वराजा ज्ञानेन्द्र शाहले दिएको शुभकामना सन्देशपछि भने फेरि राजसंस्था पुनर्स्थापनाका एजेन्डा लिएका दल तथा समूह सक्रिय बनेका थिए। पूर्वराजा शाह फागुन २५ गते पोखराबाट काठमाडौं फर्किदा त्रिभुवन अन्तर्राष्ट्रिय विमानस्थल गेटदेखि नै स्वागत भएको थियो। पूर्वराजाको स्वागतमा ठूलो भिड देखिएको र राजसंस्थाको माहोल बनेको भन्दै विभिन्न दल र समूह त्यसपछि झन् सक्रिय भइ कार्यक्रम गर्दै आएका थिए।
त्यसपछि दुर्गा प्रसाईंको आह्वानमा चैत १५ गते तीनकुने क्षेत्रमा प्रदर्शन भयो। राप्रपाले बल्खु क्षेत्रमा चैत २६ गते 'बृहत खबरदारी सभा' गर्यो भने सोमबार राप्रपा नेपालले शान्ति बाटिकामा 'जनप्रदर्शन' गरेको हो।
२०७८ मंसिरमा राप्रपा महाधिवेशनबाट कमल थापालाई हराउँदै अध्यक्षमा राजेन्द्र लिङ्देन निर्वाचित भएका थिए। पूर्वराजा ज्ञानेन्द्र शाहको भूमिकाप्रति प्रश्न उठाउँदै थापाले राप्रपा नै परित्याग गरे भने राप्रपा नेपाल ब्युँताए, राजसंस्थाको एजेन्डा पनि छाडे। तर १८ महिनापछि कमल थापा फेरि राजसंस्थाकै एजेन्डामा फर्किएका थिए।
यो पनि: १८ महिनापछि राजसंस्थाको एजेन्डामा फर्किए कमल थापा
सोमबार शान्तिबाटिकाको कार्यक्रमसम्म आइपुग्दा थापा 'कडा राजावादी' भइसकेका छन्। उनले अहिले राजसंस्थाको माहोल भएकोले अन्तिम धक्का दिनुपर्नेसमेत बताए।
‘राजसंस्था र हिन्दु राष्ट्रका लागि माहोल बन्दै गइरहेको छ, अब अन्तिम धक्कामात्रै आवश्यक छ, एकजुट हुनुपर्छ,’ राप्रपा नेपालका अध्यक्ष थापाले भने।
व्यक्तिगत स्वार्थहरू त्यागेर एजेन्डामा मात्र केन्द्रित हुने हो भने छोटो समयमै लक्ष्य हासिल गर्न सकिने थापाको भनाइ थियो। उनले विचार मिल्ने शक्तिहरू एक भएर जानुपर्नेमा पनि जोड दिएका थिए। केही समयअघि राप्रपा र राप्रपा नेपालबीच पार्टी एकता प्रक्रिया अघि बढेको चर्चा भए पनि हिजोआज उक्त विषय सेलाएको छ।
यो पनि: तीन कारणले राप्रपा-राप्रपा नेपाल एकतामा गतिरोध
सोही कार्यक्रममा बोल्दै सबैसँग मिलेर काम गर्न तयार रहेको राप्रपा अध्यक्ष राजेन्द्र लिङ्देनले बताए।
‘अहिले सिंगो देशले हामीलाई आशाको नजरले हेरिराखेका छन् त्यसकारण म सबै देशभक्त शक्तिहरूलाई आग्रह गर्न चाहन्छु- सबै प्रकारणका आग्रह र पूर्वाग्रह त्यागेर एक ठाउँ बसेर देशलाई निकास दिन अगाडि बढौं, यो कार्यका लागि राप्रपा तयार छ,’ अध्यक्ष लिङ्देनले भने।
राजसंस्थाका पक्षमा आवाज उठाएका नेताहरूलाई खोजीखोजी हिरासतमा राखिएको लिङ्देनको भनाइ थियो।
‘राजसंस्था, हिन्दुराष्ट्र पुनर्स्थापनाका पक्षमा, संघीयता खारेजीको पक्षमा, सुशासन र विकासका पक्षमा गरिने सबै प्रकारका कार्यक्रमहरूमा हाम्रो ऐक्यबद्धता हुन्छ, हामी यी मान्यताहरू स्थापनाका लागि हुने सबै शान्तिपूर्ण कार्यक्रममा साथमा हुन्छौं,’ उनले भने, ‘श्रदेय दाइ कमल थापाले यो कार्यक्रममा बोलाउनुभयो, धन्यवाद छ।’
राप्रपा नेपालले गरेको यो कार्यक्रममा सहभागी हुन राप्रपा महामन्त्री धवल शम्शेर राणा पनि शान्तिबाटिका पुगेका थिए। उनी भारतको मुम्बईबाट फर्केपछि उक्त कार्यक्रममा सहभागी बनेका हुन्।
चैत १५ गतेको घटनामा संलग्न रहेको आरोपमा राणा पक्राउ परेका थिए भने प्रहरीले अदालतबाट अनुमति लिएर उनीमाथि अनुसन्धान गरिरहेको थियो। उपचारका लागि समय मागेपछि प्रहरीले राणालाई हाजिरी जमानीमा छाडेको थियो। वैशाख १० गते भारत गएका उनी वैशाख १४ गते स्वदेश फर्केर सोमबार 'जनप्रदर्शन' मा सहभागी भएका हुन्।
राप्रपा छाडेर राष्ट्रिय शक्ति नेपाल अभियान चलाइरहेका केशरबहादुर विष्टले शान्तिबाटिकामा आयोजित कार्यक्रममा पुगेर नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' को आलोचना गरे। 'जनयुद्ध' का बेला सेनाको बमले प्रचण्ड बाँचेको उल्लेख गर्दै उनले ख्याल गर्न चेतावनी दिए।
उनी यतिमा रोकिएनन्। देशमा गुण्डाहरूको शासन रहेको पनि बताए। ‘आज देशमा दलको प्रशासन छ, देशको प्रशासन छैन,’ उनले भने, ‘मदन भण्डारी लगायतले पनि देशमा राजाको आवश्यकता छ भनेका थिए।’
संयुक्त जनआन्दोलन समितिका संयोजक नवराज सुवेदीले राजसंस्था पुनर्स्थापना गर्न चाहने शक्तिहरू एकजुट रहेको बताए।
‘तपाईंहरू आपसमा मिल्नु भएको छैन, त्यसकारण राजा र धर्म कसरी फर्काएर ल्याउनुहुन्छ भनेर मानिसहरूले सोध्थे, म जहिले पनि भन्थे हामी राजावादीहरू टुटफुटमा छैनौं। आवश्यक पर्दाखेरि हामी एक हौं भनेको थिएँ त्यसको उदाहरण आजको सभा भएको छ,’ संयोजक सुवेदीले भने, ‘राजावादी र हिन्दुवादीहरू हामी सबै एक भएका छौं।’
