नेपाली कांग्रेसका नेता, कार्यकर्ताहरू बिहीबार बिहान पूर्वमहामन्त्री शशांक कोइरालाको निवासमा जुटे।
सभापति शेरबहादुर देउवा परिवारका सदस्यहरूसहित थाइल्याण्डको बैंककमा रहेका बेला उनीनिकट पूर्वपदाधिकारीहरू कोइराला निवासमा जमघट भएका हुन्।
सभापति विदेशमा भएका बेला कोइराला निवासमा कुनै गुट भेला भएको भने होइन।
बिहीबारको जमघट कुनै गुट विशेष छलफलभन्दा पनि लोकतन्त्र दिवसका अवसरमा आयोजित थियो।
केन्द्रीय सदस्य उर्मिला थपलियाले लोकतन्त्र दिवसमा कोइराला निवासमा चियापान समारोह गरिएको बताइन्।
कांग्रेसले संस्थागत रूपमा लोकतन्त्र दिवसमा कार्यक्रम गर्दैन।
कार्यवाहक सभापति पूर्णबहादुर खड्काले विज्ञप्ति निकालेर ‘लोकतन्त्रमा मात्र सबैको अधिकार सुनिश्चित हुने भएकोले यसको रक्षार्थ सबै जना सजग र सचेत रहन’ आग्रह गरेका थिए।
‘यो ऐतिहासिक दिनका अवसरमा वीर योद्धाहरूको साहस, संकल्प र बलिदानको धरोहरको रूपमा स्थापित लोकतन्त्रलाई कमजोर हुन दिने छैनौँ भनेर प्रण गरौं,’ कार्यवाहक सभापति खड्काको भनाइ छ।
लोकतन्त्र दिवसमा पार्टीले कुनै पनि कार्यक्रम नगरेकोले आफूहरू कोइराला निवासमा चियापान समारोहमा पुगेको केन्द्रीय सदस्य नैनसिंह महरले बताए।
‘युगान्तकारी परिवर्तन भएको गौरवमय दिन वैशाख ११ मा पार्टीले कुनै पनि कार्यक्रम नगर्नु भनेको दुर्भाग्यपूर्ण हो,’ महरले भने, ‘पार्टीको ग्रासरूटसम्म कार्यक्रम हुनुपर्थ्यो।’
सभापति देउवानिकट पूर्वपदाधिकारीहरू केही समयदेखि ‘लन्च मिटिङ’ गर्दै आएका छन्।
पूर्वउपसभापति विमलेन्द्र निधि, पूर्वमहामन्त्री प्रकाशमान सिंह र पूर्वमहामन्त्रीले १४ औं महाधिवेशन अघि पनि लन्च मिटिङ गरेका थिए।
उनीहरूले यो टिमलाई अझै विस्तार गर्ने जमर्कोसहित देउवा पक्षका पूर्वपदाधिकारीहरूसँग कुराकानी गर्दै आएका छन्।
चैत १६ गतेदेखि पूर्वउपसभापति गोपालमान श्रेष्ठ र विजयकुमार गच्छदार तथा पूर्वमहामन्त्री कृष्णप्रसाद सिटौला पनि ‘लन्च मिटिङ’ जान थालेका थिए। त्यस दिन निधि निवासमा लन्च मिटिङ भएको थियो।
तर आज शशांक निवासमा ‘लन्च मिटिङ’ थिएन।
‘हामीले लन्च मिटिङ गर्दै पार्टीका विभिन्न विषयहरूमा छलफल गर्दै आएका छौं, तर आज लन्च मिटिङ थिएन। अब लन्च मिटिङ आयोजना गर्ने पालोचाहिँ शशांकजीको हो, त्यो बाँकी नै छ, आज लोकतन्त्र दिवस भएकोले चियापान गरिएको हो,’ पूर्वउपसभापति गोपालमान श्रेष्ठले भने।
उनका अनुसार पूर्वपदाधिकारीहरू आज बेग्लै छलफलमा बस्ने काम भएन। ‘पछि फेरि बस्ने कुरा भएको छ,’ उनले भने।
बिहीबार शशांक निवासमा उपप्रधानमन्त्रीसमेत रहेका प्रकाशमान सिंह, पूर्वउपसभापति गोपालमान श्रेष्ठ, विमलेन्द्र निधि, विजयकुमार गच्छदार, पूर्वमहामन्त्री कृष्णप्रसाद सिटौला, प्रवक्ता प्रकाशशरण महत, नेता महेश आचार्यलगायत पुगेका थिए।
ऊर्जामन्त्री दीपक खड्का र ललितपुर जिल्ला सभापति जितेन्द्रकुमार श्रेष्ठ पनि कोइराला निवासमा देखिएका थिए।
साथै केन्द्रीय सदस्यहरूलाई पनि चियापानमा बोलाइएको थियो।
एनपी साउद, दिलेन्द्रप्रसाद बडू, दीपक गिरी, सञ्जय गौतम, पुष्पा भुसाल, नैनसिंह महर, गुरू बराल, अम्बिका बस्नेत, शिव हुमागाईं, किरण यादव, राजीब ढुंगाना, उर्मिला थपलिया, सांसद सुनिल शर्मा, नेविसंघ अध्यक्ष दुजाङ शेर्पालगायत समारोहमा सहभागी थिए।
‘यो कुनै गुट भेला थिएन, त्यसैले खबर गरिएका सबैजसो नेताहरू आउनु भएको थियो,’ कोइरालानिकट स्रोतले भन्यो, ‘शेखर कोइरालानिकट नेताहरू पनि आउनुभयो।’
चियापान समारोह चल्दै गर्दा पूर्वमहामन्त्री शशांक कोइरालाले केही कुरा राखे।
लोकतन्त्रका खिलापमा आवाज उठ्न थालेकोले सबै एकजुट हुनुपर्ने उनको भनाइ छ।
नेताहरूको केन्द्रीकृत सोचले गर्दा पनि प्रदेश र स्थानीय तहहरूमा संविधानले भने अनुसारका अधिकार पुग्न ढिलाइ भएको र यसले पनि आमजनतामा निराशा पैदा हुन खोजिएको कोइरालाले बताए।
‘लोकतन्त्र जोगाउन नेता, कार्यकर्ता र जनता एकजुट हुनुपर्छ,’ कोइरालाले भने, ‘यही सन्देश दिऊँ भनेर मैले लोकतन्त्र दिवस पारेर तपाईंहरूलाई यहाँ बोलाएको हुँ।’
शशांक पनि १५ औं महाधिवेशनमा सभापति पदका आकांक्षी हुन्।
उनी २०७८ मंसिरमा भएको १४ औं महाधिवेशनमा ‘मौन’ रहेका थिए भने दाजु शेखर कोइराला र शेरबहादुर देउवा प्यानलमा उनको नाम केन्द्रीय सदस्यमा राखिएको थियो, राम्रो मतसहित जिते पनि।
कोइराला परिवारका नेताहरू नै एकजुट नभएको १४ औं महाधिवेशनमा शशांकमाथि ‘मौन’ रहेर देउवालाई नै सभापतिमा सघाएको आरोपसमेत लागेको थियो।
सभापति देउवाको समर्थनमा देउवा समूहबाट १५ औं महाधिवेशनमा सभापति उम्मेदवार हुन शशांकले जोडबल गरिरहेका छन्।
गत फागुन २ गते शशांकसहित देउवा पक्षका ११ जना नेताहरू बूढानीलकण्ठ पुगेर सभापति देउवालाई भेट्दै समूह एकढिक्का राख्न र १५ औं महाधिवेशनका लागि सभापति उम्मेदवार तोक्न आग्रह गरेका थिए। तर सभापति देउवाले यसबारे मुख खोलेनन्, त्यसपछि देउवापक्षका नेताहरू देश दौडाहा गर्दै माहोल बनाउने पक्षमा जुटेका छन्।
यो पनि:
देउवा समूहका नेता तान्ने रणनीतिमा केन्द्रित शेखर कोइराला
देउवा नखुलेपछि आफै अघि बढ्ने उनीनिकट नेताहरूको प्रयास
गगन थापाको सक्रियताले कांग्रेसमा तताएको माहोल
के कांग्रेसमा संविधानको प्रस्तावनामै ‘हिन्दु राष्ट्र’ राख्ने मत बलियो भएको हो?
अबको सभापति को हो भन्दै देउवाकहाँ पुगे कांग्रेसका नेताहरू
