पूर्वराजा ज्ञानेन्द्र शाहले नवराज सुवेदी र दुर्गा प्रसाईंलाई आफूले अघि नसारेको बताएका छन्।
शुक्रबार लञ्ज मिटिङका लागि निर्मल निवास पुगेका राप्रपाका सात जना नेताहरूले सुवेदी र प्रसाईंबारे सोधेपछि पूर्वराजा शाहले दुवैलाई आफूले अघि नसारेको बताएका हुन्।
लञ्च मिटिङमा राप्रपा अध्यक्ष राजेन्द्र लिङ्देन, पूर्वअध्यक्षहरू पशुपति शमशेर राणा, प्रकाशचन्द्र लोहनी, उपाध्यक्ष बुद्धिमान तामाङ, विक्रम पाण्डे, ध्रुवबहादुर प्रधान र प्रवक्ता ज्ञानेन्द्र शाही निर्मल निवास पुगेका थिए।
पूर्वअध्यक्ष लोहनीले लञ्च मिटिङ भएको पुष्टी गरे पनि त्यहाँ भएका कुराहरू बताउन चाहेनन्। 'त्यहाँ भएका कुराकानीबारे त केही भन्दिनँ तर ह्वी ह्याड अ गुड लञ्च,' उनले भने।
लञ्च मिटिङमै भएका अर्का एक नेताले भने पूर्वराजा र नेताहरूबीच भएको कुराकानी संवादकै शैलीमा सेतोपाटीलाई सुनाएका छन्—
पूर्वराजा: राजेन्द्र, तीनकुनेमा मान्छे मरेछन्, किन त्यस्तो गरेको?
राजेन्द्र लिङ्देन: हामीले होइन सरकार, नवराज सुवेदी नेतृत्वको टिमले त्यो कार्यक्रम गरेको हो।
पूर्वराजा: अनि यो समिति कसले बनाएको, तिमीहरूले बनाएको हो?
राजेन्द्र लिङ्देन: यो त यतैबाट भयो भन्ने छ सरकार। (अध्यक्ष लिङ्देनलाई साथ दिँदै यही बेला प्रवक्तासमेत रहेका सांसद ज्ञानेन्द्र शाही बोले: त्यो समिति यतैबाट बन्यो भनेर मिडियामा खबर आएको थियो)
पूर्वराजा: मसँग त भेट नै भएको छैन। मैले त त्यो गर पनि भनेको छैन।
पूर्वराजा: अनि राजेन्द्रले नेतृत्व किन नगरेको?
राजेन्द्र लिङ्देन: नवराज सुवेदी संयोजक भनेर आएपछि मैले के नेतृत्व गर्ने सरकार।
पूर्वराजा: त्यो मानिस (नवराज सुवेदी) सँग वर्षौ भइसक्यो भेट नभएको।
राजेन्द्र लिङ्देन: हाम्रै पार्टीका केही साथीहरू पनि त्यसमा सदस्य हुनुहुन्छ।
पूर्वराजा: के छ विक्रम? के छ डा सा'ब (प्रकाशचन्द्र लोहनी), मैले त केही भनेको छैन।
प्रवक्ता ज्ञानेन्द्र शाही: दुर्गा प्रसाईं निर्मल निवास आएको त भिडिओ नै आएको थियो नि त सरकार।
पूर्वराजा: मसँग त भेट भएको छैन। हाम्रो कोही कर्मचारीसँग भेट्न आएका रहेछन् कि!
पूर्वराजा: तीनकुने क्षेत्रमा ढुंगा हानाहानको भिडिओ पनि मैले हेरेको छु। त्यहाँ साह्रै नराम्रो भयो। जनताले जे चाहन्छन् त्यही गर्ने हो। आन्दोलन भए पनि प्रहरीलाई ढुंगाको सट्टा फूल दिने हो राजेन्द्र।
तीन नेताकाअनुसार पूर्वराजाले राजसंस्था पुनर्स्थापनाका लागि आन्दोलन गर भनेर राप्रपाका नेताहरूलाई पनि भनेका छैनन्।
देशमा रोजगारी नपाउने अवस्था बनेको, मानिसहरू विदेश गइरहेको भए पनि चुनाव जितेर आएको राप्रपा के हेरेर बसेको छ भन्ने पूर्वराजाको प्रश्न थियो।
पूर्वराजा: के हेरेर बसेको राजेन्द्र?
राजेन्द्र लिङ्देन: हाम्रो बहुमत छैन नि सरकार। म सरकारमा जाँदा पनि राम्रै काम गरेको हो।
पूर्वराजा: पोखरा एअरपोर्टमा त्यत्रो भ्रष्टाचार भयो र त्यहाँ?
राजेन्द्र: सरकार त्यो हामी सबै समितिको रिपोर्ट हो त्यो।
पूर्वराजा र राप्रपा नेताहरूबीच करिब दुई घन्टा कुराकानी भएको थियो। राप्रपा नेताहरूले चैत २६ गते बल्खुमा शान्तिपूर्ण कार्यक्रम गरेको विषय पनि पूर्वराजालाई सुनाएका थिए।
यसपछि पूर्वराजाले चैत १५ मा हिंसात्मक प्रदर्शन किन भएको भन्ने प्रश्न गर्दा राप्रपा नेताहरूले त्यसमा आफूहरू सहभागी नरहेको कुरा राखे।
पूर्वराजाले पूर्वअध्यक्ष पशुपति शम्शेर राणालाई भने राजनीतिकभन्दा पनि पारिवारिक कुराहरू सोधेका थिए। घर परिवार, सञ्चोबिसञ्चो कुरा पूर्वराजाले सोधे पनि पशुपति शम्शेर हाँसे मात्र, खासै जानकारी दिएनन्। राप्रपाका ६ जना नेताले पूर्वराजाकहाँ खाना खाए पनि पूर्वअध्यक्ष पशुपति शम्शेरले खाएनन्।
राजसंस्था पुनर्स्थापना, संघीयता खारेजीलगायत मुद्दामा राप्रपाले पछिल्लो चरण अध्यक्ष राजेन्द्र लिङ्देनकै नेतृत्वमा आन्दोलन अघि बढाइरहेको छ। त्यसअघि महामन्त्री धवल शम्शेर राणा संयोजकत्वमा आन्दोलन हुने गरेको थियो।
साथै राजसंस्था पुनर्स्थापनाका लागि नवराज सुवेदी नेतृत्वमा 'संयुक्त जनआन्दोलन समिति' गठन भएको थियो भने उक्त समितिले दुर्गा प्रसाईंलाई गत चैत १४ गते 'जनकमान्डर' घोषणा गरेको थियो।
जनकमान्डर तोकिएको भोलिपल्टै प्रसाईंको आह्वानमा तीनकुने क्षेत्रमा प्रदर्शन र सभा राखे पनि सुरक्षा घेरा तोड्न खोज्दा प्रदर्शन हिंसात्मक बनेको थियो भने दुई जनाको मृत्यु हुनुका साथै आगजनी र तोडफोड भएका थिए।
तीनकुने घटनामा संलग्न रहेको आरोपमा संयुक्त जनआन्दोलन समितिका सदस्य सचिव राप्रपा वरिष्ठ उपाध्यक्ष रवीन्द्र मिश्र र आन्दोलन परिचालन समितिका प्रमुख राप्रपा महामन्त्री धवल शमशेर राणा चैत १५ गते बेलुकीदेखि प्रहरी हिरासतमा छन्। अदालतबाट अनुमति लिएर उनीहरूमाथि अनुसन्धान भइरहेको छ।
साथै समितिले तोकेका जनकमाण्डर दुर्गा प्रसाईं पनि प्रहरी हिरासतमा छन्। अदालतबाट अनुमति लिएर उनीमाथि पनि अनुसन्धान भइरहेको छ। समितिका संयोजक नवराज सुवेदीले आफूलाई प्रहरीले घरमै 'नजरबन्द' मा राखेको भन्दै कार्यवाहक संयोजक जगमान गुरूङलाई बनाएका छन्। यो समितिले गरेको कार्यक्रममा राप्रपा अध्यक्ष लिङ्देन भने सुरूदेखि नै अनुपस्थित रहँदै आएका छन्।
राप्रपाले मिश्र र राणालगायत 'आस्थाका बन्दीहरू' लाई बिनासर्त रिहाइको माग गर्दै आन्दोलन गर्दै आएको छ। राप्रपाले चैत २६ गते बल्खुमा प्रदर्शन र सभासमेत गरेको थियो।
यही क्रममा आइतबार निषेधित क्षेत्रमा प्रदर्शन गर्ने तयारी छ।
राप्रपाले बबरमहलमा निषेधित क्षेत्रमा प्रदर्शन गर्ने गरी कार्यक्रम राखेपछि गृह मन्त्रालयले विज्ञप्ति नै निकालेर गम्भीर ध्यानाकर्षण भएको उल्लेख गरेको छ।
संविधान र कानुन उल्लंघन गर्न प्रोत्साहित गर्ने र समाजमा अराजकता फैलाउने कुनै पनि गतिविधि सह्य नहुने तथा यस्ता गतिविधिमा संलग्न हुनेलाई कानुन बमोजिम कारबाही गरिने गृहका सहसचिवसमेत रहेका प्रवक्ता रामचन्द्र तिवारीले शनिबार निकालेको विज्ञप्तिमा उल्लेख छ।
त्यसपछि अध्यक्ष लिङ्देनले सिमित नेताहरूमात्रै प्रदर्शनमा सहभागी हुने बताएका छन्।
काठमाडौंको माइतीघर-बबरमहल सडक क्षेत्रमा चैत २० गतेदेखि नेपाल शिक्षक महासंघको आह्वानमा शिक्षकहरूले पनि आन्दोलन गर्दै आएका छन्।
-ink-1741516857.jpeg)
