अधिवेशनमा नेताहरूको हस्तक्षेप अनि सहमतिका नाममा सिंगो कमिटीको नाम भित्तामा टाँस्ने चलन हुर्किएको नेकपा एमालेभित्र कोशीमा भिन्न अभ्यास हुँदै आएको छ।
कुनैबेला अध्यक्ष केपी शर्मा ओलीकै विश्वासपात्र रहेका र पछिल्लो केही वर्ष उनीबाट टाढिएका मोरङका नेता विनोद ढकाल विपक्षमा उभिँदा धेरै संरचनाहरूमा निर्वाचनबाटै नेतृत्व चयन गर्नुपर्ने बाध्यता एमालेले बेहोरिरहेको छ।
यहीक्रममा मंगलबारदेखि एमालेको विराटनगर महानगर अधिवेशन सुरू भएको छ।
महानगरमा पनि संस्थापन भर्सेस विनोद ढकाल समूह फरक प्यानल बनाएर चुनावी मैदानमा होमिएका छन्।
ढकाल समूहले बलराम गिरी नेतृत्वको प्यानल बनाएर महानगरमा चुनावी प्रतिस्पर्धा गरिरहँदा संस्थापनले रोहित कोइरालाको नेतृत्वमा प्यानल बनाएको छ।
बुधबार साँझसम्म उम्मेदवारी दर्ता मनोनयन चलिरहेको एमाले महानगर अधिवेशनमा निर्वाचन आजै राति गर्ने कि भोलि भन्ने टुंगो लागिसकेको छैन।
नयाँ नेतृत्व चयनका लागि महानगर एमालेभित्र मनोनयन दर्ता भइसक्दासम्म पनि कार्यकर्तामाझ भने उद्घाटन सत्रको एउटा घटनाले विशेष चर्चा पाइरहेको छ।
मोरङ एमालेको संगठनमा बलियो होल्ड बनाएका नेता विनोद ढकाललाई अहिले संस्थापनका विश्वासपात्र मानिने पर्शुराम बस्नेतले अपमान गरेको भन्ने घटनाले मोरङ एमालेभित्र चर्चा पाएको हो।
ढकालमाथि विराटनगरकै पार्टी कार्यक्रममा भएको भनिएको अपमानको घटना एमालेको आन्तरिक शक्ति संघर्षसँग जोडिएको छ।
पछिल्लो समय विनोद ढकालले संस्थापनविरोधी पहिचान बनाउँदै आएका छन्। उनी पार्टीको प्रदेशदेखि तल्लो तहका संरचनामा पनि संस्थापनको विपक्षमा उभिँदै आएका छन्। यसअघि प्रदेश अध्यक्षमा आफै हारेका उनले मोरङमा पदाधिकारी र बहुमत सदस्य आफ्नो टिमबाट जिताए। अहिले महानगरमा पनि उनी आफ्नो टिम जिताउन लागेका छन्।
ढकालको टिमलाई टक्कर दिन संस्थापन पक्षले पर्शुराम बस्नेतलाई अघि सारेको छ। अहिले एमाले महानगरको इन्चार्ज समेत रहेका बस्नेत प्रदेश खेलकुद विकास बोर्डका सदस्यसचिव पनि हुन्।
महानगरको निर्वाचित कमिटीका अध्यक्ष सागर थापालाई एक वर्ष अघि तत्कालीन जिल्ला संगठन कमिटीले खानेपानी चुनावका निहुँमा कारबाही गर्यो। र, पर्शुराम बस्नेत निकट रोहित कोइरालालाई महानगर संगठन कमिटीको अध्यक्ष बनायो। एमालेमा निर्वाचित कमिटी नहुँदा माथिल्लो कमिटीले संगठन कमिटी बनाउने वैधानिक प्रबन्ध छ।
यही क्रममा केही समयअघि जिल्ला अधिवेशनमा विनोदको प्यानलबाट सागर थापाले आफूलाई कारबाही गर्ने टिमलाई हराउँदै जिल्ला उपाध्यक्ष जिते। अहिले विनोद र सागरको समूह महानगरको नेतृत्व पनि आफ्नै टिममा ल्याउन लागेको छ।
'विवादास्पद' छविका पर्शुराम त्यो टिमलाई रोक्न लागेका छन्। यही संघर्षले उद्घाटन कार्यक्रममा विनोदमाथि पर्शुरामले अपमान गरेको एमाले नेताहरू बताउँछन्।
मंगलबार पार्टी कार्यालय पाञ्चालीमा भएको अधिवेशनको उद्घाटनमा शुभकामना दिन बोल्ने नेताका रूपमा बोलाइएका पार्टीका केन्द्रीय सल्लाहकार परिषद् सदस्य विनोद ढकाललाई पर्शरामले बलपूर्वक बोल्न दिएनन्।
त्यसक्रममा महानगर इञ्चार्जसमेत रहेका प्रदेश कमिटी सदस्य पर्शुरामले आफूलाई ‘अवैधानिक नेतृत्व’ भनेर अपमानित गरेको विनोदले बताए।
पर्शुरामको त्यस्तो अभिव्यक्तिप्रति विनोदले मञ्चमै प्रतिवाद गरेका थिए। पर्शुरामलाई विराटनगरमा गुण्डागर्दी चलाएको आरोप लाग्दा उनको राजनीतिक संरक्षक विनोद नै थिए। आफ्ना उनै जुनियरले मञ्चमै आफूलाई ‘अवैधानिक नेतृत्व’ भनेपछि विनोदले रिसाएर मञ्च छाडेका थिए।
अरूले विनोदलाई मञ्चमै बस्न आग्रह गरे। उनी मानेनन्।
‘उद्घाटन कार्यक्रमको सञ्चालन गरिरहेका महानगर कमिटीका सचिव बलराम गिरीले अध्यक्ष रोहित कोइरालासँगकै सल्लाहमा विनोदलाई बोल्न दिने तयारीमा थियौं,’ एमाले महानगरका एक पदाधिकारीले भने, ‘महानगर कमिटीको इञ्चार्जका रूपमा पर्शुरामले हस्तक्षेप गरेर विनोदलाई बोल्न रोके, त्यहीबेला अवैधानिक नेतृत्वलाई बोल्न दिन मिल्दैन भने। त्यो कुरा विनोद दाइले सुन्नुभयो। त्यसपछि उहाँले मञ्च छाडनुभएको थियो।’
त्यसक्रममा पर्शुरामले भने बोलेका थिए। उनले मन्तव्यको सुरूआतमै ‘वैधानिक नेतृत्वबाट पार्टी चल्नुपर्ने’ धारणा राखेका थिए।
आफूले बोलिसकेपछि पनि पर्शुरामले बारम्बार अवैधानिक नेतृत्व भनेपछि विनोदले लगाएको माला खोलेर मञ्चबाट बाहिरिएका थिए। त्यसपछि उनी मञ्च छाडेर कार्यकर्ताको लहरमा गएर बसेका थिए।
‘म त बोलाएर आएको थिएँ, रोहित (महानगर अध्यक्ष) ले नै मलाई बोलाएको थियो, नजाँदा पनि हुन्थ्यो भन्ने लागेको थियो तर बोलाएपछि नजाँदा झन् अनर्थ लाग्ने भएपछि गएको थिएँ, मैले आफूले बोल्नै पर्छ भनेर जिद्दी गरेको पनि थिइँन’ विनोदले भने, ‘तर ममाथि मञ्चमै अभद्र अभिव्यक्ति दिइयो, म कसरी अवैधानिक भएँ? मलाई अवैधानिक नेतृत्व प्रमाणित गरिदिने को हो?’
उनले पार्टीलाई यसैगरी सीमित घेराभित्र चलाउने व्यक्तिहरूको बोलवाला बढेको बताए।
त्यसो त महानगर अधिवेशनको उद्घाटन कार्यक्रममा अर्को अनौठो दृश्य पनि देखिएको थियो। होटल तथा रेष्टुरेन्टमा राखिने बाउन्सरहरू अधिवेशनको सुरक्षार्थ खटिएपछि विरोध भएको थियो।
त्यसरी खटिएका मान्छे पार्टीकै हुन् कि भाडामा ल्याएका हुन्? भनेर हल्लीखल्ली भएपछि बाउन्सरहरू स्वयमं सेवकको ज्याकेट खोलेर अधिवेशनस्थलबाट बाहिर गएका थिए।
