अमेरिकी राष्ट्रपति डोनाल्ड ट्रम्पले पारस्परिक भन्सार (रेसिप्रोकल) ९० दिनका लागि रोक्ने निर्णय गरेका छन्।
उनले आफ्ना सल्लाहकारहरूलाई समेत थाहै नदिई पारस्परिक भन्सार रोक्ने सो निर्णय गरेको भनेर द न्यूयोर्क टाइम्सले लेखेको छ।
बुधबार ट्रम्पले प्रतिस्पर्धी देशहरूलाई पारस्परिक भन्सार तीन महिनाका लागि रोकेको उनको सामाजिक सञ्जाल ट्रुथ सोसलमा घोषणा गरेका थिए।
उनले त्यस्तो पारस्परिक भन्सार लगाउने घोषणा अप्रिल २ मा गरेका थिए। सो दिन उनले आफ्ना सबै व्यापारिक साझेदारलाई १० प्रतिशत र मुख्य प्रतिस्पर्धी देशहरूलाई पारस्परिक (तिनले अमेरिकी उत्पादनमा लगाउने भन्सार शुल्क बराबर) दर लगाउने घोषणा गरेका थिए।
उनले आठ वटा देशलाई ४० प्रतिशतभन्दा बढी भन्सार लगाएका थिए भने मुख्य प्रतिस्पर्धी चीनलाई ३४ र भारतलाई २७ प्रतिशत भन्सार तोकेका थिए। अमेरिकासँग घनिष्ठ सम्बन्ध भएको युरोपियन युनियनलाई पनि २० प्रतिशत भन्सार लगाएका थिए।
तर ७५ भन्दा बढी देशहरूले अमेरिकाविरूद्ध जबाफी भन्सार नलगाएको र छलफलको लागि पहले गरेको भन्दै ९० दिनका लागि पारस्परिक भन्सार स्थगित गरिएको भनेर बुधबार लेखेका छन्।
ट्रम्पको घोषणापछि अर्थमन्त्री स्कट बेसेन्टले आइतबार उनी र ट्रम्पबीच छलफल भएपछि नै सो निर्णय लिने निष्कर्षमा पुगेको बताएका थिए। त्यस्तै सो निर्णय लिनुमा घट्दो सेयर बजारको कुनै भूमिका नभएको बेसेन्टले दाबी गरेका थिए।
तर पछि पत्रकारसँग कुरा गर्दै ट्रम्पले सो निर्णय सेयर बजारमा गिरावट देखेर जनता आत्तिएको जस्तो लागेर बुधबार बिहान लिएको बताए।
उपराष्ट्रपति जे डी भान्स, अर्थमन्त्री बेसेन्टले लगायतले पारस्परिक भन्सार नलगाएर चीनमा मात्रै ध्यान केन्द्रित गर्न ट्रम्पलाई आग्रह गरिरहेका थिए। तर बुधबार बिहानसम्म उनीहरूलाई पनि ट्रम्पले निर्णय फिर्ता लिँदैछन् भन्ने थाहा नभएकाले सो निर्णयको बचाउ गर्ने बारे नै सोचिरहेको थिए भनेर विभिन्न मिडियाले लेखेका छन्।
तर ट्रम्पले एक्कासि सामाजिक सञ्जालबाट सो निर्णय ९० दिनका लागि रोकेका थिए।
अमेरिकी व्यापार प्रतिनिधि जेमिसन ग्रिरले त बुधबार संसदीय समितिमा पारस्परिक भन्सारको बचाउ गरिरहेको बेलामा मात्रै ट्रम्पको सो निर्णयबारे थाहा पाएको भनेर टाइम्सले लेखेको छ।
ट्रम्पले पारस्परिक भन्सार लगाउने निर्णय ९० दिनका लागि स्थगित गर्नुमा देशभित्र र अन्य व्यापारिक साझेदार मुलुकहरूको दबाब रहेको बुझिन्छ।
युरोपेली युनियन, जापान लगायत अमेरिकाका ठूला व्यापारिक साझेदारहरूले अमेरिकामाथि पनि जबाफी भन्सार लगाउने चेतावनी दिएका थिए।
त्यसले अमेरिकी नागरिकहरूले महँगीको मार खेप्नुपर्ने भन्दै अमेरिकाभित्रै ट्रम्पविरूद्ध प्रदर्शनसमेत भएका थिए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
यी पनि:
-1742801159.jpg)
