जनमत पार्टीका अध्यक्ष सिके राउतले पार्टी विभाजनको भय सार्वजनिक रूपमै प्रकट गरेका छन्।
नागरिक उन्मुक्ति पार्टीसँग एकताको अन्तिम गृहकार्यमा रहेका बेला अध्यक्ष राउतले सोमबार सचिवालयको पेजमार्फत् पार्टी विभाजनको भय सार्वजनिक रूपमै प्रकट गरेका हुन्।
‘मीठो बोलेर तपाईंलाई फकाउने पार्टी फोडुवा गद्दारहरूबाट सावधान!,’ अध्यक्ष राउतले भनेका छन्, ‘हामी एकता गर्दै तराई–मधेसको शान बनौं।’
थरूहट मधेसमा ऐतिहासिक एकता हुनै लागेकाले जनताहरू चारैतिर हर्षित भएका बेला एकीकरण प्रक्रिया चल्दादेखि नै केही षड्यन्त्रकारी र विरोधी पार्टीहरूले जनमतका पदाधिकारीलाई पार्टी फोड्नका लागि गाडी र पैसा लगानी गरेर परिचालित गरेको राउतले आरोप लगाएका छन्।
पार्टीभित्रका केही मानिसहरू दसैं तिहारदेखि नै पार्टी फुटाउन सक्रिय भइरहेकोसमेत दाबी गरेका छन्।
‘जसले आफ्नो एउटा भोटसमेत जनमत पार्टीलाई दिएनन्, निर्वाचन प्रचार–प्रसार गर्न समेत दुई–चार दिन जागिर छाडेर पहाडबाट ओर्लेर आएनन्, आक्कलझुक्कल देखिएर फोटो खिचाउने बाहेक कतै कुनै संघर्षमा वा संगठन विस्तारमा लागेनन्, पार्टीको अध्यक्षलाई नै हराउनका लागि षड्यन्त्र गरिरहे। भन्थे– अध्यक्षजीलाई हराएर पार्टी हामीले कब्जा गर्ने हो,’ उनले आरोव लगाउँदै भनेका छन्।
उनले पार्टी फुटाउन लागिपरेका शक्ति जिल्लाजिल्ला गएर भेटघाट गरिरहेको बताएका छन्।
‘तीन करोड जनताको आस्था भएको पार्टीलाई छिन्नभिन्न पार्न खोज्नु, जनतालाई भ्रमित पार्न खोज्नु, पद, लाभ, गाडी र पैसाको लागि पार्टी फुटाउनु अपराध हो,’ उनले भनेका छन्, ‘कोही स्वविवेकले पार्टी प्रवेश गर्न र छाड्न पक्कै पनि सक्छन् तर यिनीहरूको भ्रममा परेर गलत निर्णय गर्नु भनेको आफ्नै जीवन बरबाद गर्नु हो। यसभन्दा अगाडि पनि यस्तै भ्रमित गरेर केही राम्रा कार्यकर्ताहरूलाई छोड्न लगाए, तर दुर्भाग्य तिनीहरूको हालत निकै नै दयनीय छ।’
अध्यक्ष राउतमा पार्टी विभाजनको भय मडारिनुको अर्को कारण पनि छ– उनी पार्टीभित्र अलोकप्रिय बन्दैछन्। पार्टीभित्र विचार राख्न नदिएको, फरक विचारलाई निषेध गरेको उनीमाथि आरोप छ।
मन नपरेकाहरूको सांसद पद खोस्नसमेत उद्यत् भएको भन्दै उनीमाथि पार्टीभित्रै आलोचना हुने गरेको छ। राउतले प्रत्येक साताजस्तो स्पष्टीकरण सोध्ने र चित्त बुझ्दो जबाफ नदिएको भन्दै निलम्बन गर्ने गर्छन्।
उनले यसअघि समानुपातिक सांसदहरूलाई फिर्ता बोलाउनेसमेत निर्णय लिएका थिए। तर कार्यान्वयनमा आएन।
मधेस प्रदेश संसदीय दलका नेता महेश यादवलाई मुख्यमन्त्री नबनाइ उनले सतिश सिंहलाई बनाएका थिए।
'मधेस स्वराज' को मुद्दा उचाल्दै राजनीतिमा उदाएका जनमत पार्टीका अध्यक्ष राउत पछिल्लो समय नागरिक उन्मुक्ति पार्टीसँग एकताको सघन छलफलमा छन्।
एकीकृत पार्टीको नाम, पार्टीको झन्डा र चुनाव चिह्नसमेत टुंग्याइसकेका जनमत र नागरिक उन्मुक्तिले अहिले नीतिबारे छलफल गरिरहेको छ।
यो पनि: जनमत–नाउपा एकता: चितवनपूर्व सिके, पश्चिम रेशम चौधरीले पार्टी कामको नेतृत्व गर्ने
दुवै पार्टीका तीन–तीनजना सम्मिलित एकता कार्यदल र त्यति नै संख्याको अलगअलग विधान प्रतिस्थापन समिति एकताको गृहकार्यमा जुटिरहेका छन्।
जनमत अध्यक्ष राउत र नागरिक उन्मुक्ति पार्टीका संरक्षक रेशम चौधरी एक्लाएक्लै वार्तामा बसेर एकतालाई अन्तिम रूप दिने गृहकार्यमा छन्।
नाउपाका संस्थापक, संरक्षकसमेत रहेका रेशम चौधरीले पार्टी एकता अन्तिम चरणमा पुगिसकेको र निर्वाचन आयोगमा बुझाउने औपचारिक दस्तावेजमा हस्ताक्षर गर्न मात्रै बाँकी रहेको बताएका छन्।
नाउपाका नेता दामोदर पण्डितले वैशाख १५ गते एकता घोषणा गर्ने गरी गृहकार्य भइरहेको बताए।
जनमत तराई–मधेसका उदीयमान शक्ति हो।
पार्टी सत्तामा गए पनि आफूलाई मन्त्रीका रूपमा नउभ्याई सत्ता राजनीतिमा उपल्लै पदमा पुग्ने मोह पालेका राउत पार्टीलाई मधेसको ठूलो शक्ति बनाउन चाहन्छन्। पहाडतिर पनि संगठन विस्तार गर्ने उनको लक्ष्य देखिन्छ।
२०७२ भदौ ७ को टीकापुर घटनापछि तितरवितर भएको थरूहट, थारूवान आन्दोलनलाई सँगेट्न रेशम चौधरीले आफू जेलमा छँदा नै नाउपा गठन गरेका थिए।
२०७९ सालको स्थानीय तह निर्वाचनमा कैलाली जिल्लामा मात्रै पालिका प्रमुख, उपप्रमुखदेखि वडा सदस्यसम्म सयभन्दा बढी स्थानमा जित हासिल गरेको थियो। संघीय संसदमा चार सांसद सहित सुदूरपश्चिम (७), लुम्बिनी (३) र मधेस प्रदेश (१) मा उसको प्रतिनिधित्व छ।
नाउपा पश्चिम तराईको अर्को उदीयमान शक्ति हो।
थारूहरूले अन्य राजनीतिक पार्टीमा त्यति स्थान नपाइरहेका बेला त्यो समुदायको प्रतिनिधित्वको ठूलो हिस्सा नाउपाले ओगटेको छ।
यी दुई पार्टी एकता भएर देशव्यापी र मधेसमा हस्तक्षेपकारी शक्ति हुने आकांक्षा पालिरहँदा जनमत अध्यक्ष सिके राउतलाई भने पार्टी विभाजनको भयले बेस्सरी लखेटिरहेको छ।
केही समयअघि उनले पार्टीका उपाध्यक्ष दीपककुमार साहलाई कारबाही गरेका थिए। पार्टीका अनुशासन समितिका प्रमुखसमेत रहको साहलाई राउतले पत्नीसँग मिलेर आफूलाई अप्ठ्यारोमा पार्न खोजेको आरोप लगाएका थिए।
‘संघर्षको दौरान कहिले पनि पार्टीको महत्त्वपूर्ण आन्दोलन, काम वा बैठकमा नदेखिएको तर पार्टी सत्तामा पुगेपछि सबभन्दा बढी लाभ आफ्नो मान्छेको सरूवा बढुवा र नियुक्ति लिन अग्रसर भएको,’ राउतले उपाध्यक्ष साहमाथि आरोप लगाउँदै भनेका थिए।
साहले जनमत पार्टी फुटाउनका लागि विभिन्न शक्ति केन्द्रहरूसँग राष्ट्रिय अध्यक्षको विरूद्धमा कुरा लगाएको, भड्काएको र जिल्ला जिल्लामा तथा देशविदेशमा कार्यकर्तालाई फोन गरी पार्टी फोड्नका लागि सहयोग मागेको आरोप लगाएका थिए।
