सिके राउत नेतृत्वको जनमत र रञ्जिता चौधरी नेतृत्वको नागरिक उन्मुक्तिले एकीकृत पार्टीको नाम, नेतृत्व र झन्डाको टुंगो लगाएका छन्।
नाउपाका संरक्षक रेशम चौधरीको गृह जिल्ला बर्दिया बसेर पार्टी एकताको गृहकार्य गरिरहेका दुई दलले एकताको प्रारूप टुंगो लगाएका हुन्।
जनमत पार्टीका उपाध्यक्ष अब्दुल खानका अनुसार कार्यकारी अधिकारसहित सिके राउत एकीकृत पार्टीको अध्यक्ष बन्नेछन्। नाउपा अध्यक्ष रञ्जिता चौधरी सहअध्यक्ष हुनेछिन्।
नाउपा संरक्षक चौधरी एकीकृत पार्टीको पहिलो वरीयतासहित संरक्षक नै हुने खानले बताए।
चौधरीले जेलमै रहेका बखत २०७८ सालमा नागरिक उन्मुक्ति पार्टी गठन गरेका थिए। टीकापुर हत्याकाण्डमा प्रमुख दोषी ठहर भई जन्मकैदको सजाय काटिरहेकाले उनले त्यतिबेला पत्नी रञ्जिता श्रेष्ठको अध्यक्षतामा पार्टी गठन गरेका थिए।
२०८० पुसको अन्तिम साता पहिलो अधिवेशन गरेर आफै अध्यक्ष बने पनि निर्वाचन आयोगले वैधता दिन अस्वीकार गर्यो। र, महाधिवेशनसमेतलाई मान्यता दिएन।
त्यसपछि नाउपा रञ्जिता चौधरी नेतृत्वकै कार्यसमितिमा फर्किएको थियो।
एकीकृत पार्टीमा चौधरीलाई पहिलो वरीयता दिएर संरक्षकको भूमिका निर्वाह गर्न दिने समझदारी भइसकेको खानले बताए। राउत दोस्रो वरीयतामा रहनेछन्। रञ्जिताको स्थान तेस्रो वरीयताको हुनेछ।
त्यति मात्र होइन, चितवन पूर्व सिके राउतले अगुवाइ र नेतृत्व गर्ने र चितवन पश्चिमको पार्टी कामको जिम्मा चौधरीले लिने समझदारी भइसकेको छ।
एकीकृत पार्टीको नामसमेत टुंगो लागेको छ। उपाध्यक्ष खानका अनुसार एकीकृत पार्टीको नाम नागरिक जनमत पार्टी रहनेछ।
चुनाव चिह्न ढकिया हुनेछ। त्यस्तै पार्टीको झन्डा आयाताकार र कलेजी रंगको पृष्ठभूमिमा सेतो पिँधसहितको ढकिया रहनेछ।
चुनाव चिह्न पनि ढकिया नै राख्ने सहमति जुटिसकेको खानले बताए।
खानका अनुसार एकीकृत पार्टीको केन्द्रीय समिति ७ सय सदस्यीय बनाउने समझदारी भएको छ। नाउपाको मात्रै केन्द्रीय समिति पाँच सय माथिको आकारको रहेकाले दुवै पार्टी मिलाउँदा केन्द्रीय समिति ठूलो बन्ने भएको हो।
-1743996343.jpeg)
नाउपाका नेता दामोदर पण्डितले पनि नाम, नेतृत्व, झन्डा र चुनाव चिह्न मात्र नभई पार्टी एकताको विधि र प्रक्रियाबारे पनि टुंगो लागिसकेको बताए।
‘शीर्ष नेताका अतिरिक्त कार्यदलको बैठक पनि बसिरहेको छ। शीर्ष नेताहरूले आधारभूत कुराहरू टुंगो लगाउनुभएको छ।नाउपाले विधान प्रतिस्थापन समिति बनाएर एकीकृत पार्टीको विधानबारे गृहकार्य गरिरहेको थियो। जनमतले पनि विधान प्रतिस्थापन समिति बनाएर त्यसमा काम गरिरहनुभएको छ। दुवै पार्टीका एकता कार्यदल बसेर बाँकी विषयमाहरूमा छलफल गरिरहनुभएको छ,’ उनले भने।
जनमत अध्यक्ष राउत र नाउपा संरक्षक चौधरी आइतबार बिहान बर्दियास्थित चौधरीकै निवासमा छलफलमा जुटेका थिए। त्यसपछि कार्यदलको बैठक बसेको थियो। सोमबार पनि शीर्ष नेता र कार्यदलको छुट्टाछुट्टै बैठक बसेर एकताको गृहकार्य गर्ने खानले जानकारी दिए।
जनमतले एकताका लागि खानको नेतृत्वमा शरद सिंह यादव, बालगोविन्द चौधरी सदस्य रहेको कार्यदल बनाएको छ।
नाउपाले पनि प्रतिनिध सभाका सांसद गंगा चौधरी, सुनिता चौधरी रामलाल डगोरा थारू रहेको एकता कार्यदल गठन गरेको छ।
चैत १० गते कार्यदलको बैठक बसेर छलफल सुरू गरेको थियो।
नाउपाले वैशाख ३ गते कैलालीको टीकापुरमा केन्द्रीय समिति बैठक बोलाएको छ। त्यो बैठकमा कार्यदलले तयार पारेको एकता प्रस्ताव अनुमोदन गर्ने तयारी रहे पनि त्यसअघि नै दुवै पार्टीले एकतालाई अन्तिम रूप दिन लागेका हुन्।
जनमत र नाउपा एकता भए संघीय संसदमा नेकपा (एकीकृत समाजवादी) सरह उनीहरूका सांसद हुनेछन्। यद्यपि एकीकृत समाजवादी समानुपातिकमा तीन प्रतिशतको थ्रेसहोल्ड पूरा गर्न नसकेकाले राष्ट्रिय पार्टी बन्न सकेन।
प्रतिनिधि सभामा जनमतका ६ सांसद र नाउपाका ४ सांसद छन्। जनमतले मधेस सरकारको नेतृत्व गरिरहेको छ। सतिशकुमार सिंह मुख्यमन्त्री छन्।
मधेसमा जनमतको १३ र नाउपाको एक सांसद छन्। सुदूरपश्चिम प्रदेशमा नाउपाका ७ सांसद छन्। लुम्बिनीमा नाउपाको ४ र जनमतको ३ सांसद छन्।
