प्रतिनिधि सभाको हिउँदे अधिवेशन राष्ट्रिय प्रजातन्त्र पार्टी (राप्रपा) का सांसद दीपक बोहराको निधनमा शोक प्रस्ताव पारित गर्दै मंगलबार अन्त्य भयो।
मन्त्रिपरिषदको सिफारिसअनुसार राष्ट्रपति रामचन्द्र पौडेलले मंगलबार राति १२ बजेदेखि लागू हुने गरी अधिवेशन अन्त्यसमेत गरिसकेका छन्।
२०७९ मंसिरमा रूपन्देही क्षेत्र नम्बर ३ बाट प्रतिनिधि सभा सदस्य निर्वाचित भएका बोहरा त्यसपछि सदनमा कमै उपस्थित रहे।
त्यसबेलाका गृहमन्त्री तथा सत्ता गठबन्धनका साझा उम्मेदवार नेपाली कांग्रेसका केन्द्रीय सदस्य बालकृष्ण खाणलाई बोहराले ‘मौन’ बसेरै फराकिलो मतान्तरले हराएका थिए।
‘प्रभावशाली र शक्तिशाली’ मानिएका खाणलाई हराएकोमा त्यसबेला बोहराको चर्चा पनि भयो। बोहरालाई नेकपा (एमाले) लगायत दलहरूले पनि सघाएका थिए।
जितेर संसदमा आएपछि बोहराले जनताका कुरा सुनाउन पाएनन्। पछिल्लो हिउँदे अधिवेशनका २१ बैठकमा बोहरा अनुपस्थित रहे, उनलाई स्वास्थ्यले साथ दिएन।
जननिर्वाचित थलोमा नियमित उपस्थित हुने र जनताका कुरा राख्ने उनको चाहना हुँदो हो, तर उनले त्यो अवसर नपाउने भएका छन्। उपचारका क्रममा काठमाडौंको ओम अस्पतालमा मंगलबार बोहराले जीवन नै गुमाए।
विगत चार वर्षदेखि उनको शरीरमा चैन थिएन। २०७७ जेठतिर बोहरालाई कोभिड संक्रमण भएको थियो। त्रिवि शिक्षण अस्पताल, भारत र अमेरिकाका अस्पतालमा बोहराको उपचार गराइयो। केही सुधार देखियो तर ‘भ्वाइस रेस्ट’ गर्नुपर्ने भयो। ‘पोस्ट कोभिड’ ले घाँटीमा समस्या हुँदा उनी बोल्न सक्दैनथे।
राप्रपाले ‘भ्वाइस रेस्ट’ मै रहेका बोहरालाई गृहजिल्ला रूपन्देही ३ मा टिकट दियो।
उनी चुनावी प्रचारप्रसारमा सक्रिय रूपमा खटे तर भाषण गरेनन्। घरदैलो, साना-ठूला चुनावी सभाहरूमा बोहरा मञ्चमा बस्थे, उनका तर्फबाट राप्रपाका नेताहरूले कुरा राखिदिन्थे।
राप्रपा नेता, पूर्वगृहमन्त्री निरञ्जन थापा र नातिनीसमेत रहेकी केन्द्रीय सदस्य स्वाती थापाले चुनावी प्रचारप्रसारमा बोहराका एजेन्डा जनतासम्म पुर्याउने काम गरेका थिए।
चुनावका बेला तीन-चार महिनामै स्वर खुल्छ भन्ने आत्मविश्वास बोहरामा देखिन्थ्यो तर वर्षौंसम्म पनि उनको आवाज फर्किएन। त्यसैले सदनमा कुरा राख्नुपर्दा उनले प्रमुख सचेतक ज्ञानेन्द्र शाहीमार्फत राख्न पनि थालेका थिए।
प्रमुख सचेतक शाहीले प्रतिनिधि सभाका केही बैठकमा ‘सांसद दीपक बोहराका तर्फबाट भन्दै रूपन्देही-लुम्बिनी’ क्षेत्रका कुरा राखेका थिए।
बोहराले त्रिवि शिक्षण अस्पताल महाराजगञ्जमा ‘स्पिच थेरापी’ समेत गराएका थिए।
राप्रपा प्रवक्ता मोहन श्रेष्ठले निर्वाचित भएपछि सांसद बोहराले स्वास्थ्यकै कारण सदनमा कुरा राख्नै नसकेको बताए।
‘निर्वाचित भएर आएपछि उहाँले जनताका कुरा सदनमा राख्नै सक्नु भएन, एक शब्द पनि राख्न पाउनु भएन, स्वास्थ्यले साथ नै दिएन,’ प्रवक्ता श्रेष्ठले सेतोपाटीसँग भने, ‘कहिले प्रमुख सचेतकमार्फत् त कहिले सभामुखलाई नै आफ्ना कुरा टिपाउने गर्नुभएको थियो।’
डेढ वर्षअघिसम्म सांसद बोहराले नेता-कार्यकर्ता र घरपरिवारसँग संवाद गर्नुपरे मोबाइल र कागजमा लेख्ने गर्थे। ‘पछिल्लो समय उहाँसंग संवाद नै हुन सकेको थिएन,’ उनले भने, ‘पहिले त मोबाइल र कागजमा लेखेर देखाउनुहुन्थ्यो’
राप्रपा अध्यक्ष राजेन्द्र लिङ्देनले सांसद बोहराको निधनले राप्रपा र नेपाली राष्ट्रवादी आन्दोलनलाई क्षति पुगेको बताए।
‘उहाँ पार्टीका वरिष्ठ नेता र पूर्वमन्त्री हुनुहुन्थ्यो, सँगै उहाँ एउटा समन्वयकारी व्यक्तित्वका रूपमा पनि परिचित हुनुहुन्थ्यो,’ अध्यक्ष लिङ्देनले सेतोपाटीसँग भने, ‘उहाँबाट समाजले सिक्नुपर्ने थुप्रै कुराहरू छन्। उहाँ बिरामी हुनुभन्दा अघिसम्म निरन्तर रूपमा सक्रिय रहनुभयो, उहाँलाई निष्ठामा रहने व्यक्तिका रूपमा हामीले सधैं सम्झन्छौं।’
प्रधानमन्त्री केपी शर्मा ओलीले सांसद बोहराको निधनको खबरले दु:खी बनाएको उल्लेख गर्दै भनेका छन्, ‘मेरो क्याबिनेटमा मन्त्रीका रूपमा उहाँको प्रभावकारी भूमिका सदा स्मरणीय रहनेछ।’
लामो समयसम्म सहकार्य गरेका राप्रपा नेपालका अध्यक्ष कमल थापाले सांसद बोहराको निधनले मर्माहत बनाएको उल्लेख गरेका छन्।
‘विद्यार्थी जीवनदेखिको मेरो अभिन्न साथी, रूपन्देहीका लोकप्रिय नेता, सांसद बोहराको निधनबाट मर्माहत भएको छु, तिमी मेरो मन मस्तिष्कमा सदैव जीवन्त रहने छौं,’ अध्यक्ष थापाले भनेका छन्।
बोहरा ५० वर्षभन्दा लामो समयदेखि नेपाली राजनीतिमा सक्रिय थिए।
उनी २००७ सालमा पाल्पामा जन्मेका थिए। १७ वर्षको उमेरदेखि नै उनी राजनीतिमा सक्रिय भएका थिए। पछि उनको परिवार भैरहवा झरेको थियो।
बोहरा पञ्चायतकालमा राष्ट्रवादी विद्यार्थी मण्डलका नेता पनि भएका थिए। पञ्चायत सदस्य हुँदै उनी २०३८ र २०४० सालमा पर्यटन राज्यमन्त्री बनेका थिए।
उनी २०६७ सालमा वन तथा भू-संरक्षण मन्त्री पनि बनेका थिए भने सोही साल राष्ट्रिय प्रकृति संरक्षण कोषका अध्यक्षसमेत भएका थिए।
२०७० सालको दोस्रो संविधान सभा निर्वाचनमा बोहरा रूपन्देही क्षेत्र नम्बर २ बाट संविधान सभा सदस्य निर्वाचित भएका थिए। त्यसको दुई वर्षपछि उनी श्रम तथा रोजगार मन्त्री बने भने २०७३ मा आपूर्ति मन्त्री बनेका थिए।
२०७४ सालमा राप्रपा फुट्यो। कमल थापाको साथ छाडेर बोहरा पशुपति शम्शेर जबराको नेतृत्वमा गठन भएको राप्रपा (प्रजातान्त्रिक) मा गए। त्यहाँ उनी वरिष्ठ उपाध्यक्ष र संसदीय दलका नेता बनेका थिए। त्यसबेला राप्रपा (प्रजातान्त्रिक) मा १८ जना सांसद थिए। त्यसबेला बोहरा स्वास्थ्य मन्त्री पनि बने।
तर यो पार्टीमा बोहरा धेरै समय बसेनन्। कमल थापा नेतृत्वकै राप्रपामा फर्किए। २०७५ फागुन १२ गते पशुपति शम्शेर र प्रकाशचन्द्र लोहनीलाई छाडेर बोहरा कमल थापा नेतृत्वको पार्टीमा फर्किएका थिए।
पछिल्लो समय बोहरा बालुवाटारस्थित घरमै बस्दै आएका थिए। उनी झोलिलो पदार्थ मात्रै पिउन सक्थे। श्रीमती उन्नति बोहरा ‘शिला’ र सहयोगीले उनको हेरचाह गर्दै आएका थिए। गत फागुन १ गते उनकी छोरी जेनी चाँदनी बोहरा ग्यारेटको पनि निधन भएको थियो।
बोहराको श्रीमती र दुई छोरा छन्।
राप्रपा प्रवक्ता मोहन श्रेष्ठका अनुसार बोहराको शव मंगलबार गृहनगर सिद्धार्थनगर रूपन्देही लगिनेछ र त्यहाँ पार्टी कार्यालयमा श्रद्धाञ्जलीका लागि राखिनेछ।
हेलिकप्टरमार्फत् शव मंगलबार नै काठमाडौं ल्याइने र बुधबार दिउँसो १ बजेदेखि अपराह्न ४ बजेसम्म राप्रपा केन्द्रीय कार्यालय चाबहिलमा शव श्रद्धाञ्जलीका लागि राखिनेछ। बोहराको बुधबार अपराह्न पशुपति आर्यघाटमा अन्त्येष्टि गरिनेछ।
