नेकपा (एकीकृत समाजवादी) ले चैत २५ गते देशभर भण्डाफोर अभियान चलाउने भएको छ।
एकीकृत समाजवादीले आइतबार पत्रकार सम्मेलन गर्दै राजावादी समूहले प्रदर्शनको क्रममा गरेको निजी तथा सार्वजनिक सम्पत्तिमा आगजनी, तोडफोड लगायतका कार्यप्रति निन्दा व्यक्त प्रदर्शन गर्न लागेको हो।
आलोकनगरस्थित पार्टी केन्द्रीय कार्यालयमा बसेको पार्टी स्थायी कमिटीको बैठकले राजावादी समूहले प्रदर्शनको क्रममा गरेको अराजकताप्रति देशव्यापी रूपमा भण्डाफोर गर्ने निर्णय गरेको उपमहासचिव प्रकाश ज्वालाले जानकारी दिए।
राजावादीहरूको प्रदर्शनका नाममा भएको हत्या, हिंसा, आगजनी, तोडफोड र लुटपाटमा संलग्न व्यक्तिहरूलाई तत्काल कडाभन्दा कडा कानूनी कारबाही गर्न माग गरिएको ज्वालाले जानकारी दिए।
‘अराजकतावादीहरूको प्रदर्शनमा उचित ढंगले सुरक्षाकर्मी परिचालन गरेर हत्या, हिंसा, आगजनी, तोडफोड, लुटपाट नियन्त्रण गर्न र शान्ति सुरक्षा कायम गर्न नसक्नु सरकारको असक्षमता र कमजोरी भएको बैठकले ठहर गरेको छ,’ ज्वालाले भने।
उनले प्रदर्शनका क्रममा मृत्यु भएकाहरूको परिवारलाई उचित क्षतिपूर्ति दिन माग समेत गरे।
सञ्चार गृहमाथि आक्रमण गरेर प्रस स्वतन्त्रता कुण्ठित गर्ने दुष्प्रयास गरिएको भन्दै उक्त आक्रमणप्रति पार्टीले निन्दा व्यक्त गरेको पनि बताए।
‘हाम्रो पार्टी नेकपा (एकीकृत समाजवादी) को काठमाडौं आलोकनगरस्थित केन्द्रीय कार्यालय र काठमाडौं जिल्ला कार्यालय तथा पार्टी अध्यक्ष माधवकुमार नेपालको निवास लगायतका स्थानमा भएको ढुंगामुडा, तोडफोड र आगजनी विरूद्ध यही चैत २५ गतेभित्र सबै प्रदेश, जिल्ला, स्थानीय कमिटी र जनसंगठनहरूले सम्बन्धित तहमा देशव्यापी विरोध प्रदर्शन गर्ने निर्णय गरिएको छ,’ उनले भने।
गत शुक्रबार राजावादीहरूले एकीकृत समाजवादीको पार्टी कार्यालय तोडफोड र आगजनी गरेका थिए। त्यसबाट करिब ५० लाख बराबरको क्षति भएको पार्टीका वरिष्ठ उपाध्यक्ष राजेन्द्र पाण्डेले जानकारी दिए।
यो पनि:
तीनकुनेमा राजावादीको विध्वंश रोक्न गृह प्रशासन विफल भएको एकीकृत समाजवादीको निष्कर्ष
