सरकारले राष्ट्रिय सभामा जस्तोसुकै परिस्थिति आए पनि बैठक सञ्चालन गर्न अध्यक्ष नारायणप्रसाद दाहाललाई दबाब दिएको पाइएको छ।
स्रोतका अनुसार सत्तारूढ दलका सांसद र मन्त्रीले राष्ट्रिय सभा अध्यक्ष दाहाललाई प्रतिपक्षीको विरोध वा बहिष्कार जुनसुकै परिस्थिति आए पनि बैठक सञ्चालन गर्न दबाब दिएका हुन्।
'हामीलाई अरू कुरा थाहा छैन, तपाईंले संसदको प्रक्रिया टुंग्याइदिनुपर्छ,' सत्तापक्षका ती सांसदले अध्यक्ष दाहाललाई भनेका थिए।
सरकारले ल्याएका पाँच वटा प्रतिस्थापन विधेयक प्रतिनिधि सभाबाट स्वीकृत भएर राष्ट्रिय सभामा पुगेको छ।
राष्ट्रिय सभाले चैत १८ गतेसम्म ती विधेयकहरू पारित गर्नुपर्छ। सँगै पारित भएको सूचना प्रतिनिधि सभालाई पनि दिनुपर्छ।
प्रतिस्थापन विधेयक राष्ट्रिय सभाबाट पारित हुनुपर्ने समयसLमा सकिन एक दिन मात्रै बाँकी छ। संसदको दुवै सदनमा प्रमुख प्रतिपक्षीलगायत सवै विपक्षी दलहरूले अवरोध गर्दै आएका छन्।
प्रतिनिधि सभा र राष्ट्रिय सभामा विपक्षीहरूको अवरोधका कारण दुई पटक बैठक स्थगित भइसकेको छ।
यस्तो अवस्थामा राष्ट्रिय सभाबाट विधेयक पारित नहुने परिस्थिति निर्माण भएपछि सरकारका मन्त्री र सत्तारूढ दलका सांसदहरूले राष्ट्रिय सभा अध्यक्षलाई जुनसुकै परिस्थितमा संसद सञ्चालन गर्न र विधेयक टुंगो लगाइदिन दबाब दिएका हुन्।
उनीहरूले राष्ट्रिय सभामा सत्तापक्षकै बहुमत भएको दाबी गरेका छन्। भूमिसम्बन्धी अध्यादेश निष्क्रिय बनाउने तयारी छ। त्यसो हुँदा अन्य विधेयकमा जनता समाजवादी पार्टी नेपालले पनि समर्थन गर्नेछ।
'एट् एनी कस्ट यो टुंग्याइदिनुपर्छ। राष्ट्रिय सभामा हाम्रो बहुमत छ। प्रतिपक्षले बहिष्कार गरूँन् वा नगरूँन् हामीलाई थाहा छैन,' अध्यक्ष दाहाललाई सरकारका मन्त्री र सांसदले भनेका छन्।
राष्ट्रिय सभाका अध्यक्ष दाहालले भने प्रतिपक्षीविहीन संसद चलाउने अभ्यास नरहेको भनेर सरकारका मन्त्री र सांसदहरूलाई जबाफ दिएको स्रोतले बताएको छ।
सत्तापक्षले भने कानुनमा प्रतिपक्षी उपस्थित हुनैपर्ने भन्ने कतै उल्लेख नगरिएको दलिल पेस गरेका थिए। 'एक चौथाइ उपस्थित भए पुग्छ, प्रतिपक्षी चाहिन्छ भनेर लेखेको छैन,' उनीहरूले अध्यक्ष दाहाललाई भनेका थिए।
प्रतिनिधि सभाले पठाएका सबै विधेयकहरूबारे राष्ट्रिय सभामा सैद्धान्तिक छलफल सकिएको छ, पारित गर्न मात्रै बाँकी छ।
राष्ट्रिय सभाको आइतबारको बैठक बिहान सवा ११ बजेका लागि बोलाइएको छ। बैठकमा तिनै विधेयकहरू पारित गर्ने कार्यसूची छ।
