राजावादीले जडिबुटी कारखानामा लगाएको आगो चार घन्टादेखि आएन नियन्त्रणमा

सेतोपाटी संवाददाता

काठमाडौं, चैत १५

कोटेश्वरस्थित जडिबुटी उत्पादन तथा प्रशोधन कम्पनी लिमिटेडको कारखानामा राजावादीले लगाएको आगो अझै नियन्त्रणमा आएको छैन। सञ्चोलगायत औषधि उत्पादन गर्ने उक्त कारखानामा चार घन्टादेखि आगो दन्किइरहेको छ।

राजावादीहरूले उक्त कारखानाको पार्किङमा रहेको ९ वटा सवारी साधनमा आगजनी गरेका थिए।

तीनकुनेमा हिंसात्मक प्रदर्शनपछि तितरवितर भएका प्रदर्शनकारीले पेप्सीकोलातर्फ जाने चोकमा रहेको जडिबुटी कारखानामा आगो लगाएका थिए।

मेडिकल व्यवसायी दुर्गा प्रसाईंको आह्वानमा शुक्रबार राजावादीहरूले प्रदर्शन र सभाको आयोजना गरेका थिए।

तर सभा सुरू हुनुपूर्व नै प्रहरीसँग मुठभेडमा उत्रिएपछि तीनकुने क्षेत्रको प्रदर्शन हिंसात्मक बन्न पुगेको थियो।

उत्तेजित राजावादीहरूले सञ्चार गृह र निजी घरमा समेत निशाना बनाएका थिए। तीनकुनेको निजी घरमा तोडफोड र आजजनी गरेका राजावादीले कान्तिपुर टेलिभिजन र अन्नपूर्ण पोष्टमा समेत तोडफोड र आगजनी गरेका थिए।

त्यसपछि उनीहरूले एकीकृत समाजवादीको मुख्यालयमा समेत आगजनी गरेका थिए।

राजावादीको प्रदर्शन हिंसात्मक बनेपछि काठमाडौं जिल्ला प्रशासन कार्यालयले तीनकुने र आसपासका क्षेत्रमा ४ः२४ बजेदेखि कर्फ्यु आदेश जारी गरेको छ।

कर्फ्यु आदेशसँगै नेपाली सेनाले सडकमा तैनाथी बढाएको छ।

लुटपाट, आगजनी र तोडफोड रोक्न सेनाले गस्ती गरिरहेको हो। अहिले नेपाली सेना तीनकुने, जडिबुटी क्षेत्रमा तैनाथ भएको हो।

साँझ ढल्किइसक्दा पनि प्रदर्शनकारी सडकमै छन्। उनीहरूले सरकारी भवन र सवारी साधनलाई निशाना बनाइरहेका छन्।

यसैबीच प्रहरीको गोली लागि एकजना प्रदर्शनकारीको मृत्यु भएको छ। कीर्तिपुरका २६ वर्षीय सविन महर्जनको प्रहरीको गोली लागेर मृत्यु भएको हो।

यस्तै राजावादीहरूले तीनकुनेको निजी घर जलाउँदा एकजना भिडिओ पत्रकारको निधन भएको छ। एभिन्यूज टेलिभिजनको भिडिओ पत्रकार सुरेश रजकको त्यही आगोमा परेर मृत्यु भएको हो।