गृहमन्त्री रमेश लेखकले दुर्गा प्रसाईंले आफैले गाडी चलाएर प्रहरीलाई मार्न खोजेको बताएका छन्।
सेतोपाटीसँगको कुराकानीमा मन्त्री लेखकले निजी सम्पत्ति आगजनी गर्ने र मिडिया हाउसमा आक्रमण गर्नेलाई कानुन बमोजिम कारबाही गर्ने बताएका छन्।
मन्त्री लेखकले राजावादीको आन्दोलनमा प्रहरीले संयमता र धैर्यता अपनाएको उल्लेख गरे। तर उदण्डताको अगाडि केही नलागेको उनले बताए।
राजावादी आन्दोलनकारीहरूको अनियन्त्रित भिडले काठमाडौंको कोटेश्वर र तीनकुने क्षेत्रमा निजी सम्पत्तिमा आगजनी र मिडिया हाउसमाथि आक्रमण भएको छ।
साथै, नेकपा एकीकृत समाजवादी पार्टीको कार्यालयमा आगजनी भएको छ। प्रहरी भिड नियन्त्रणमा चुकेको देखिएको छ।
सेतोपाटीका मनोज सत्यालले गृहमन्त्रीलाई आन्दोलन हिंसात्मक हुने सूचना प्रहरीलाई थिएन भनेर सोधेका छन्।
राजावादीको भिड किन अनियन्त्रित भयो?
उनीहरूले चाहेकै त्यही थियो। आउने बित्तिकै प्रहरीलाई ढुङ्गा हान्ने काम भयो। दुर्गा प्रसाईंले आफैले गाडी चलाएर प्रहरी मार्न खोजे। उनीहरूको उग्रता उदण्डता गैरजिम्मेवारीको पराकाष्ठा भयो।
गृह प्रशासनलाई राजवादीको आन्दोलन हिंसात्मक हुने सूचना थिएन?
हामीले सुरक्षा निकायले आफूले अपनाउनुपर्ने सर्तकता, संयमता, धैर्यता अपनाएको छ। तर उदण्डताको अगाडि केही लागेन।
अब सरकारले के सोचिरहेको छ? निजी सम्पती तोडफोड भयो, मिडिया हाउसमा आगजनी भयो।
निजी सम्पत्ति तोडफोड भएको छ। मिडिया हाउसमा आगजनी भएको छ। पार्टी कार्यालयहरूलाई निशाना बनाइएकोछ छ। यी सबै विषयमा कानुन बमोजिम कारबाही हुन्छ।
कसलाई जिम्मेवार बनाउँछ सरकारले? पूर्वराजालाई?
जसले आयोजन गरेको हो। ऊ जिम्मेवार हुन्छ।
सरकारले के कदम चाल्छ? कुन कानुन आकर्षिक हुन्छ?
जो जसले यो कार्यक्रम आयोजना गरे, उग्रता गरे ती सबैलाई कारबाहीमा दायरामा ल्याउनुपर्छ।
प्रहरीमाथि पनि आक्रमण भएको छ नि!
प्रहरीमाथि मात्र होइन। व्यक्तिगत सम्पत्ति आगजनी भएको छ। मिडिया हाउसमा आगजनी भएको छ। व्यक्तिगत सम्पत्तिको क्षति भएको छ। प्रहरीलाई छानीछानी आक्रमण भएको छ। यो उग्रता र उदण्डताको जिम्मेवारी कसकसले लिनुपर्छ छानबिन गरेर कारबाही गर्नुपर्छ।
