राजावादीको प्रदर्शनका कारण काठमाडौंको तीनकुने क्षेत्र अशान्त बनेको छ।
सुरूमा प्रहरीसँग मुठभेडमा उत्रिएका उनीहरू प्रहरीको डफ्फातर्फ गाडी हुइँक्याएर उत्तेजित बनाउन लागिपरेका थिए।
त्यसपछि ढुंगा हानाहानमा उत्रिएका राजसंस्था समर्थक प्रदर्शनकारीले निजी घरमा तोडफोड गरे। प्रदर्शनकारीको ढुंगा लागेर क्षतविक्षत बनेको घरमा उनीहरूले आगजनी गरे।
यहाँसम्मकी आगो निभाउन गएको दमकललाई समेत उनीहरूले बाटो छाडेनन्। ढुंगा प्रहार गरे।
त्यसपछि उनीहरूले सञ्चार गृहलाई समेत निशाना बनाए। प्रदर्शनकारीले कान्तिपुर टेलिभिजनको कार्यालयमा ढुंगा प्रहार गरेका थिए। प्रदर्शनकारीको ढुंगा लागेर कार्यालयको सिसा फुटेको कान्तिपुर टिभीले जानकारी दिएको छ।
त्यस्तै तीनकुनेमै रहेको अन्नपूर्ण पोष्टको केन्द्रीय कार्यालयमा पनि ढुंगा प्रहार गरिरहेका छन्।
प्रदर्शनकारीले निरन्तर ढुंगा हानिरहेकाले त्यहाँ कार्यरत सञ्चारकर्मी बाहिर निस्कन सकेका छैनन्।
‘प्रदर्शनकारीले अहिले पनि ढुंगा हानिरहेका छन्। हामी लुकेर बस्नुपर्ने अवस्था छ। उनीहरूले सात तलामाथिसम्म ढुंगा प्रहार गरिरहेका छन्,’ अन्नपूर्ण पोष्टका एक सञ्चारकर्मीले भने।
प्रहरीले स्थिति नियन्त्रणमा लिन तीन राउण्ड हवाई फायरसमेत गरेको थियो।
प्रदर्शनकारीले अहिले पनि प्रहरीतर्फ ढुंगा हानिरहेका छन्।
