दुई कार्यकाल राष्ट्रपति बनेकी विद्यादेवी भण्डारी बिहीबार रूपन्देहीका एमाले नेता-कार्यकर्तासँगको भेटघाटमा व्यस्त छिन्।
भण्डारी गत वर्षदेखि नै नेकपा एमालेको राजनीतिमा फर्किने चर्चा चलिरहेको थियो। पछिल्लो समय विभिन्न जिल्लाहरू पुगेर एमालेका नेता-कार्यकर्ताहरूसँगको भेटघाटलाई बढाएपछि उनले एमालेको राजनीतिमा फर्किन सक्ने प्रस्ट संकेत गरेकी छन्।
पूर्वराष्ट्रपति भण्डारीले सुरू गरेको जिल्ला भ्रमणलाई एमालेको सक्रिय राजनीतिमा फर्किन गरेको तयारीका रूपमा लिन थालिएको छ।
भण्डारी बिहीबार रूपन्देही आएकी छन्। धार्मिक र सामाजिक भ्रमण र भेटघाटका लागि भनेर रूपन्देही आएकी भण्डारीलाई स्वागत गर्न गौतमबुद्ध अन्तर्राष्ट्रिय विमानस्थलमा एमालेका नेता-कार्यकर्ताहरूको बाक्लो उपस्थिति थियो।
गौतमबुद्ध अन्तर्राष्ट्रिय विमानस्थलदेखि होटल सिद्धार्थ भिलासासम्म ल्याउन एमाले नेता कार्यकर्ताहरूको ठूलो पंक्ति पुगेको थियो।
उनलाई भेट्न एमाले पोलिटब्यूरो सदस्य एवं लुम्बिनी प्रदेशका पूर्वमुख्यमन्त्री लिला गिरी, केन्द्रीय सदस्य खिमलाल भट्टराई, लुम्बिनी प्रदेशका अध्यक्ष राधाकृष्ण कँडेल, प्रतिनिधिसभा सदस्य बासुदेव घिमिरे, नेताहरू दधिराम न्यौपाने, जिल्ला अध्यक्ष यज्ञ गैरे पुगेका थिए।
भण्डारीसँग पूर्वमन्त्री एवं एमाले सचिव पद्या अर्याल, पूर्वमन्त्री एवं प्रतिनिधिसभा सदस्य कृष्णगोपाल श्रेष्ठ पनि सँगै छन्।
यस्तै, एमालेबाट निर्वाचित बुटवल उपमहानगरपालिकाका उपप्रमुख सावित्रादेवी अर्याल, एमाले जिल्ला उपाध्यक्ष हितराज पन्थी, अनेरास्ववियु, युवा संघ, पार्टीका गाउँनगर कमिटी अध्यक्ष तथा पदाधिकारी, अनेमसंघका नेतृहरु भण्डारीलाई भेट्न पुगेका छन्।
तीन दिनसम्म रूपन्देहीमा रहने भण्डारीले नेकपा एमाले नेता-कार्यकर्तासँग भेटघाट गर्ने तथा लुम्बिनी र भैरहवामा हुने केही कार्यक्रममा सहभागिता जनाउने र केही धार्मिक यात्रा समेत गर्ने कार्यक्रम छ।
बिहीबार उनले एमाले नेता कार्यकर्ताहरूसँगको भेटघाट सँगै बुटवलस्थित लुम्बिनी केबलकारको भ्रमण गरी बसन्तपुरमा रहेको कामाख्यादेवी मन्दिरको दर्शन गरेकी छन्।
कार्यतालिका अनुसार शुक्रबार उनले लुम्बिनीमा आयोजित एक कार्यक्रममा सहभागी भएपछि दिउँसो २ बजेदेखि साढे तीन बजेसम्म एमाले नेता कार्यकर्तासँग भेटघाट गर्ने छिन्।
दिउँसो साढे तीन बजे त्रिवेणीधाममा धार्मिक यात्राका लागि निस्किने र त्यहाँबाट फर्किएपछि बेलुका ८ बजेदेखि १० बजेसम्म पुनः भेटघाटमा व्यस्त हुने छिन्।
१६ गते शनिबार बिहान ११ बजेदेखि बेलुका साढे ६ बजेसम्म भैरहवामा हुने महिला नेतृहरूबीचको अन्तरसंवाद कार्यक्रममा सहभागी जनाई १७ गते उनी काठमाडौं फर्किने कार्यतालिका छ।
दुई कार्यकाल मुलुकको सर्वोच्च निकाय राष्ट्रपति पद सम्हालेकी भण्डारीले जिल्ला दौडाहामा निस्किएर आफ्नो पुरानो राजनीतिक विरासत फर्काउन खोजेको बताइएको छ।
नेकपा एमालेको एघारौं महाधिवेशन अर्को वर्ष हुँदैछ। उक्त महाधिवेशनमा भण्डारी अध्यक्षमा प्रतिस्पर्धा गर्ने तयारी गरिरहेको चर्चा लामो समयदेखि हुँदै आएको छ।
अहिलेसम्म खुलेर एमालेको राजनीतिमा नदेखिए पनि उनले भित्रभित्र आफ्नो पक्षमा माहोल बनाइरहेको एमाले नेताहरू नै बताउँछन्।
बिहीबार सिद्धार्थ भिलासामा प्रतिक्रिया लिन खोज्दा तत्काल केही नबोल्ने भन्दै पन्छिइन्।
आगामी महाधिवेशनमा एमालेमा हालका अध्यक्ष केपी शर्मा ओली दोहोरिन चाहेको बताइन्छ। राष्ट्रपति बन्नुअघि पार्टी उपाध्यक्ष रहेकी भण्डारीले पनि अध्यक्षमा चाहना राख्दै आएकी छन्।
यो पनि:
एमालेमा विद्या भण्डारीको खोजी
-1743076452.jpg)
-1743076451.jpg)
-1743076451.jpg)
-1743076451.jpg)
-1743076451.jpg)
-1743076451.jpg)
