समकालीन राजनीतिक नेतृत्वमा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ तुलनात्मक रूपमा खुला र पारदर्शी सुनिन्छन्।
परिस्थिति अनुकूलन भए उनी खुलेर आफ्ना अभिव्यक्ति राख्न रूचाउँछन् पनि।
बुधबार संसद् भवन परिसरमा प्रमुख प्रतिपक्षी दलका नेतासमेत रहेका प्रचण्ड त्यस्तै खुलस्त सुनिए।
प्रसंग थियो, नेपाल विद्युत प्राधिकरणको कार्यकारी निर्देशकबाट बर्खास्तीमा परेका कुलमान घिसिङको।
कार्यकाल सकिन चार महिना बाँकी हुँदा घिसिङलाई अपमानजनक तरिकाले हटाएको भन्दै प्रमुख प्रतिपक्षी दल माओवादी केन्द्रसहित अरू विपक्षी दल एक स्वरले सरकारको विरोध गरिरहेका छन्। सबै विपक्षी दल उभिएर विरोध जनाउँदै बुधबार संघीय संसद्को दुवै सदन अवरूद्ध पारे।
प्रधानमन्त्री केपी शर्मा ओलीले घिसिङ बर्खास्तीको चित्तबुझ्दो जबाफ दिनुपर्ने उनीहरूको माग छ। विपक्षी दलहरूको यही मागका कारण आज दोस्रोपटक बसेको प्रतिनिधि सभा बैठक पनि चल्न सकेन। बिहीबार बिहान ११ बजे सम्मका लागि स्थगित भयो।
संसद् भवन परिसरबाट बाहिरिँदै गर्दा अध्यक्ष प्रचण्डले आफूमाथि यस पटक पनि प्रधानमन्त्री ओलीले जालझेल र षड्यन्त्र गर्न खोजेको बताए।
घिसिङलाई बर्खास्त गरेकै दिन सोमबार दिउँसो सिंहदरबारमा प्रमुख तीन दलको बैठक बसेको थियो।
नेपाली कांग्रेसका सभापति शेरबहादुर देउवा, प्रधानमन्त्री ओली र प्रचण्ड त्यस बैठकमा थिए।
प्रधानमन्त्रीले बारम्बार संक्रमणकालीन न्यायसम्बन्धी बाँकी विषय टुंग्याउन छलफलमा आउन आग्रह गरेपछि आफूले उनको वचन काट्न नसकेको प्रचण्डले बताए।
प्रमुख तीन दलको बैठकलगत्तै मन्त्रिपरिषद्को बैठक बसेर कुलमान घिसिङलाई हटाउँदा त्यसमा प्रचण्डको पनि साथ थियो भन्ने भान पार्न खोजिएको प्रचण्डले बताए।
यसले प्रचण्डलाई चिन्तित तुल्याएको रहेछ। जुन उनले सञ्चारकर्मी सामु बताए पनि।
‘निकै ठूलो जालझेल, षड्यन्त्र भएजस्तो मलाई महसुस भयो। एक दुई दिन पर्खिएको भए पनि हुन्थ्यो। म सिंहदरबार गएर टिआरसी (संक्रमणकालीन न्याय) टुंग्याएको लगत्तै गर्नुपर्ने त केही बाध्यता थिएन,’ उनले भने।
त्यस दिनको बसेको तीन दलको बैठकले संक्रमणकालीन न्याय निरूपणसँग जोडिएका दुई आयोग (सत्य निरूपण तथा मेलमिलाप र बेपत्ता पारिएका व्यक्ति छानबिन आयोग) को पदाधिकारी सिफारिस गर्न सर्च कमिटी बनाउने समझदारी गरेको थियो। जसअनुसार सोमबार नै बसेको मन्त्रिपरिषद् बैठकले पुरानै कार्यावधि सकिएको ओमप्रकाश मिश्र नेतृत्वको समितिलाई पुनः पदाधिकारी सिफारिस गर्न दिने निर्णय गरेको थियो।
त्यो सहमतिसँग कुलमान घिसिङ साटेको भनेर राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाही र अरू सांसदले पनि टिप्पणी गरेकाप्रति आफूलाई दुःख लागेको उनले बताए।
त्यस्तो भान परोस् भनेरै सरकारले सुविचारित ढंगबाट त्यही दिन टिआरसी छलफल राखेको प्रचण्डको आशय थियो।
‘त्यही दिन तुरून्तै राप्रपाको ज्ञानबहादुर शाहीले र अरूले पनि भने–ल प्रचण्डले टिआरसीसँग कुलमानलाई साट्यो। यो भन्दा झूटो र बेइमानीपूर्ण प्रचार अर्को हुनसक्छ,’ प्रचण्डले भने।
यसले आफूलाई स्वर्ग र नर्कको पुरानो प्रसंग सम्झाएको प्रचण्डले बताए।
गत असार १७ गते नेपाली कांग्रेस र नेकपा (एमाले) बीच ७ बुँदे सहमति भएर नयाँ सत्ता समीकरण बनेको थियो। त्यस दिन बिहान बालुवाटारको छलफलको प्रधानमन्त्री ओलीले ‘कांग्रेससँग कुनै सहमति भएको छैन, स्वर्ग गए पनि, नर्क गए पनि हामी सँगै जाने हो’ भन्दै आफूलाई छल–कपट गरिएको प्रचण्डले बताउँदै आएका छन्।
प्रधानमन्त्री ओलीले विश्वासको मत लिएको दिन प्रचण्डले यो प्रसंगबारे बताएका थिए।
टिआरसी आयोग बनाउन समझदारी गरेकै दिन कुलमान हटाएर त्यही पुरानो स्वर्ग, नर्कको प्रसंगलाई सरकारले स्मरणमा ल्याइदिएको प्रचण्डले बताए।
भिडिओ:
