नेपाल विद्युत प्राधिकरणका कार्यकारी निर्देशक कुलमान घिसिङलाई हटाएको विरोधमा आन्दोलित हुने कार्यक्रममा सहभागी हुने राष्ट्रिय स्वतन्त्र पार्टी (रास्वपा) ले कुनै संस्थागत निर्णय गरेको थिएन।
रास्वपा सांसद सुमना श्रेष्ठ मंगलबार माइतीघर मण्डलमा आयोजित विरोध प्रदर्शनमा सहभागी भइन्।
रास्वपाले मंगलबार साँझ औपचारिक रूपमा विज्ञप्ति निकाल्दै घिसिङलाई कार्यकारी निर्देशकबाट हटाएकोमा विरोध मात्र जनाएन, यस्तै क्रियाकलापहरूले गर्दा सरकारको औचित्य सकिएको निष्कर्ष निकाल्यो। वर्तमान सरकार भ्रष्टाचारी जोगाउने र बिचौलिया पोस्ने जगमा बनेकाले यसको विरोधमा गरिने शान्तिपूर्ण कार्यक्रमहरूमा रास्वपाको नेतृत्व, सहभागिता एवं ऐक्यबद्धता हुने समेत बतायो।
रास्वपाको यही विज्ञप्तिको भाषाप्रति अहिले टिप्पणी भइरहेको छ।
गत फागुन २५ गते पोखराबाट फर्किएका पूर्वराजा ज्ञानेन्द्र शाहको स्वागतमा राजसंस्था पुनर्स्थापना पक्षधरले गरेको कार्यक्रमप्रति रास्वपाले मुख खोलेको थिएन। पार्टी सभापति रवि लामिछानेले दलहरूले मलाई पुर्न ठूलो खाल्डो खनेको र त्यसमा आफै पर्नेबाहेक अरू टिप्पणी गरेका थिएनन्।
राजावादीहरूले सुरू गरेको व्यवस्थाविरोधी आन्दोलनमा रास्वपाको नबोल्ने नै नीति थियो। त्यही अनुसार उनले पार्टी कमिटीलाई निर्देशित गरेका थिए।
तर मंगलबारको विज्ञप्तिमा अमूर्त भाषा बोल्दै सरकार विरूद्ध गरिने आन्दोलनमा ऐक्यबद्धता हुने बताएपछि रास्वपा राजावादीको आन्दोलनमा पनि सहभागी हुने हो भन्ने प्रश्न उठेको छ।
यसबारे हामीले पार्टीका कार्यवाहक सभापति डोलप्रसाद (डिपी) अर्याललाई सोध्यौं।
उनले नेपाली कांग्रेस र नेकपा एमाले दुई ठूला दल मिलेर बनेको सरकारले सम्पूर्ण रूपमा औचित्य गुमाइसकेको बताए। सरकार बनेको ६ महिना रवि लामिछाने विरूद्ध प्रतिशोध साधेको, राज्य संयन्त्रलाई त्यसका लागि परिचालन गरेको र अहिले कर्मचारी हटाउन लागि परेको बताए।
'सरकारले ६ महिना सभापति रवि लामिछानेविरुद्ध प्रतिशोध साधेर बस्यो। अहिले कुलमान घिसिङलाई बर्खास्त गरेको छ। सरकार विरूद्ध असन्तुष्ट बनिरहेकाहरूलाई झन् उत्तेजित बनाउने काम गरेको छ। सरकारको यस प्रकारको गतिविधिप्रति हामी आफै पनि आन्दोलित हुनुपर्ने हुनसक्छ,' उनले भने।
बिचौलिया पोस्ने सरकारको कार्यशैली विरूद्ध र सुशासनका पक्षमा हुने आन्दोलनमा पार्टीको नेतृत्व, सहभागिता र ऐक्यबद्धता रहने उनले बताए।
चैत १५ गते मेडिकल व्यवसायी दुर्गा प्रसाईंले जनप्रदर्शनको तयारी गरेका छन्। राष्ट्र, राष्ट्रियता धर्म संस्कृति र नागरिक बचाउन 'महाअभियान नेपाल' मार्फत् गतिविधि गरिरहेका उनले राजसंस्था फर्काउन, माओवादी केन्द्र र एकीकृत समाजवादी लगायतले गणतन्त्रको पक्षमा एकै दिन प्रदर्शन आह्वान गरेका छन्।
चैत २६ गते राष्ट्रिय प्रजातन्त्र पार्टी (राप्रपा) ले पनि राजसंस्था र हिन्दु राज्य माग गर्दै काठमाडौंमा प्रदर्शन गर्दैछ।
राजसंस्था पक्षधरहरूले पनि सरकारले सुशासन दिन सकेन, भ्रष्टाचार, अनियमितता बढ्यो भनिरहेका छन्।
गणतन्त्र पक्षधरहरूले पनि सरकारको बिचौलिया पोस्ने प्रवृत्तिले व्यवस्था विरूद्ध नै वितृष्णा जगायो भनिरहँदा रास्वपाको सहभागिता कता भन्ने प्रश्न उठेको छ।
अर्यालले यसमा अलमलिनु नपर्ने बताए।
'राप्रपा, ज्ञानेन्द्र शाह या अरू कसैले राजसंस्था फर्काउने आन्दोलनतिर हामीलाई जोड्न आवश्यक छैन। यसमा हामीलाई चासो छैन। हामी सुशासनका पक्षमा हुने आन्दोलनमा ऐक्यबद्धता, सहभागिता, समर्थन जनाउँछौं,' उनले भने।
व्यवस्था विरूद्ध अहिले भइरहेका गतिविधि र राजसंस्था पक्षधरहरूले घोषणा गरेका आन्दोलनप्रति अहिले नै पार्टीले बोल्ने बेला नभएको बताए।
'ती आन्दोलन, गतिविधिप्रति हामीले बोल्ने बेला भएको छैन। समय आएपछि यसबारे बोल्छौं। अहिले हाम्रो कुनै टिप्पणी छैन,' उनले भने।
-1742801159.jpg)
