राष्ट्रिय स्वतन्त्र पार्टी (रास्वपा) का सांसद शिशिर खनालले पूर्वप्रधानमन्त्री झलनाथ खनाल र पूर्वपर्यटन मन्त्री प्रेमबहादुर आलेमाथि छानबिन गर्न माग गरेका छन्।
अन्तर्राष्ट्रिय सम्बन्ध तथा पर्यटन समितिको सोमबारको बैठकमा बोल्दै रास्वपा सांसद खनालले पूर्वप्रधानमन्त्रीसमेत रहेका नेकपा (एकीकृत समाजवादी) का सम्मानित नेता खनाल र पूर्वमन्त्रीसमेत रहेका एकीकृत समाजवादीकै सांसद आलेमाथि छानबिनको माग गरेका हुन्।
यो पनि: नयाँ पार्टी चलायमान बनाउन जुनियर नियुक्त गरेँ: प्रेम आले
प्रतिनिधि सभा अन्तर्गतको सार्वजनिक लेखा समितिको गत शुक्रबार बसेको बैठकमा पूर्वमन्त्री प्रेम आलेले आफू संस्कृति, पर्यटन तथा नागरिक उड्डयन मन्त्री हुँदा पार्टीका सम्मानित नेता झलनाथ खनाललगायत नेताको दबाबमा नागरिक उड्डयन प्राधिकरण र वायु सेवा निगममा दुई अधिकारी नियुक्ति गर्नु परेको बताएका थिए।
नेपाल नागरिक उड्डयन प्राधिकरणका महानिर्देशक प्रदीप अधिकारी र नेपाल वायुसेवा निगमका कार्यकारी अध्यक्ष युवराज अधिकारीलाई आफूले पार्टीको दबाबमा नियुक्त गरेको पूर्वमन्त्री आलेको भनाइ थियो।
यो प्रसंग निकाल्दै संसदको अन्तर्राष्ट्रिय सम्बन्ध तथा पर्यटन समितिको सोमबारको बैठकमा रास्वपा सांसद शिशिर खनालले छानबिन गर्नुपर्ने बताएका हुन्।
‘पूर्वमन्त्री प्रेम आलेले लेखा समितिमा दिएको धारणाबारे छानबिन गर्नुपर्छ, उहाँको धारणा नियुक्तिसँग जोडिएको भ्रष्टाचारको विषयसँग सम्बन्धित छ,’ रास्वपा सांसद खनालले भने, ‘नियुक्तिमा भ्रष्टाचार भएको विषय पूर्वमन्त्रीले स्वीकार गर्नु भएको छ। यो विषयमा पूर्वप्रधानमन्त्रीले पनि स्वीकार गरेको विषय सञ्चार माध्यमहरूमा आएका छन्। यो अन्तर्राष्ट्रिय सम्बन्ध तथा पर्यटन समितिको क्षेत्राधिकारमा पनि पर्छ, यसमा हामीले छानबिन गर्नुपर्छ।’
समितिको क्षेत्राधिकारमा पर्ने विषयमा पनि छानबिन नगरेको भन्ने सन्देश जाने भएकोले छानबिनमा अग्रसरता देखाउन उनले आग्रह गरेका थिए।
तर समितिका सभापति राजकिशोर यादवले पूर्वमन्त्रीले लेखा समितिमा अभिव्यक्ति दिएकोले अन्तर्राष्ट्रिय सम्बन्ध समितिले त्यसैका लागि छानबिन गर्न उपसमिति बनाउन नहुनेमा जोड दिए। ‘अर्को समितिमा उठेको विषय हो, सम्बन्धित मन्त्रालय (पर्यटन मन्त्रालय) ले दोषी पत्ता लगाओस्,’ उनले भने।
