दुई पार्टी एकीकरण गरेर राष्ट्रव्यापी शक्ति बन्ने योजनामा रहेका जनमत र नागरिक उन्मुक्ति पार्टी (नाउपा) ले एकताको खाका कोर्न थालेका छन्।
पार्टी एकीकरणका लागि जनमत र नाउपाले गठन गरेको कार्यदलले आइतबार साँझ संयुक्त रूपमा बैठक बसेर एकताको गृहकार्य थालेका हुन्।
आइतबार साँझ बसेको बैठकले विगतमा पार्टीहरूले गरेको एकीकरण–एकता र सहकार्यबारे समीक्षा गरेको जनमतका तर्फबाट गठित कार्यदलका संयोजक अब्दुल खानले जानकारी दिए।
पार्टी उपाध्यक्षसमेत रहेका उनले आइतबार पहिलो बैठक भएकाले विषयमा धेरै प्रवेश गर्न नपाएको जानकारी दिए।
उनका अनुसार पार्टीको नाम, चुनाव चिह्न, एकीकृत पार्टीको नेतृत्वलगायत विषयमा दुई पार्टीका शीर्ष नेताहरूबीच मोटामोटी कुरा भइसकेको छ। त्यसलाई अन्तिमरूप दिन मात्रै बाँकी छ।
यसअघि नै जनमत अध्यक्ष सिके राउत र नाउपा संरक्षक चौधरीबीच धेरै चरणमा कुरा भइसकेकाले एकतापछि बन्ने पार्टीको नाम, चुनावचिह्न र नेतृत्वबारे करिब सहमति जुटिसकेको छ। संरक्षक चौधरीले त निर्वाचन आयोगमा पेस गर्ने एकीकृत पार्टीको दस्तावेजमा हस्ताक्षर मात्रै बाँकी रहेको दाबी गरेका छन्।
अतः शीर्ष नेताहरूका बीचमा संवाद भएर टुंगिएका विषयलाई कार्यदलले प्रस्तावको रूप दिने छ। त्यसलाई कार्यदलमा मिहीन छलफल गर्ने र दुवै पार्टीको केन्द्रीय समितिबाट पारित गराउने तयारी छ। नाउपाले वैशाख ३ गते केन्द्रीय समिति तय गरेको छ। जनमतले केन्द्रीय समितिको बैठकको मिति तय गर्न बाँकी छ भने राष्ट्रिय परिषद समिति बैठक चैत १५ गतेका लागि बोलाएको छ।
जनमत पार्टीका उपाध्यक्ष खानका अनुसार एकीकृत पार्टीको नाम नागरिक जनमत या जनमतमध्ये एउटा राख्ने विषयमा सघन छलफल भइरहेको छ। चुनाव चिह्न भने ढकिया राख्ने सहमति जुटिसकेको छ।
नेतृत्वबारे पनि करिब सहमति जुटिसकेको खानले बताए।
उनका अनुसार जनमत अध्यक्ष सिके राउत अध्यक्ष बन्नेछन्। नाउपा अध्यक्ष रञ्जिता श्रेष्ठलाई सहअध्यक्ष बनाउने कि अध्यक्ष नै बनाएर जाने भनेर जनमत अध्यक्ष राउत र संरक्षक चौधरी छलफलमै छन्।
चौधरी पार्टी संरक्षक रहनेछन्। दुई अध्यक्षीय प्रणालीमा जाँदा राउत पहिलो वरीयताको अध्यक्ष बन्ने खानले बताए।
उनले एकीकृत पार्टीको राजनीतिक प्रतिवेदन, विधान, नियमावली आदिमा पनि छलफल सुरू भइसकेको बताए। उपाध्यक्ष खानका अनुसार पार्टी एकीकरणको मूल प्रस्तावनाको मुख्य मर्म संघीय लोकतान्त्रिक गणतन्त्रात्मक बहुराष्ट्रिय राज्य नै हुनेछ। त्यसमा पहिचानको मुद्दालाई विशेष जोड दिइने उनले बताए।
२००७ सालको विद्रोह, २०४६ र २०६३ सालको जनआन्दोलन र माओवादी जनक्रान्तिदेखि विभिन्न समयमा भएका आदिवासी जनजाति, मधेस, स्वराज, थरूहट–थारूवान, दलित र मुस्लिम आन्दोलनहरूले आफ्नो पहिचान, अधिकार र आत्मनिर्णयको लागि गरेको संघर्षलाई परिवर्तनको कडीका रूपमा लिइएको पनि खानले बताए।
खनाले शासकीय स्वरूप बदल्नुपर्ने बताए।
अहिले दुवै पार्टीले प्रत्यक्ष निर्वाचित कार्यकारी प्रधानमन्त्रीको अवधारणा अघि सारेका छन्। यसैलाई एकीकृत पार्टीको शासकीय संरचनाको मान्यताका रूपमा अंगीकार गरिने उनले बताए।
संघ र प्रदेश दुवैतिर गैरसांसद मन्त्री बनाउने प्रस्ताव एकीकृत पार्टीको हुनेछ।
‘जनताको प्रत्यक्ष मतदानबाट चुनिएको प्रधानमन्त्री, गैरसांसद र विज्ञ मन्त्री बन्ने कुरा हाम्रो मान्यता हो। त्यसैलाई एकीकृत पार्टीको मान्यताका रूपमा अघि सार्छौं,’ उनले भने।
त्यस्तै प्रधानन्यायाधीश, संवैधानिक अंगका प्रमुखहरू, प्रदेश प्रमुख, मुख्यमन्त्री पनि जनताको प्रत्यक्षबाट चुनिनुपर्ने पक्षमा दुवै पार्टी रहेको र त्यसैलाई एकीकृत पार्टीको मान्यताका रूपमा अघि बढाउने उनले बताए।
दुवै पार्टीका शीर्ष नेताले वैशाखको पहिलो हप्ताभित्रमा जनमत र नाउपाबीच एकता भइसक्ने बताएका छन्। दुवै पार्टीले एकताका लागि नेपाल समाजवादी पार्टी (नयाँ शक्ति) सँग पनि छलफल गरिरहेका छन्।
शनिबार सकिएको नाउपाको केन्द्रीय समिति बैठकमा एकताको शुभकामना दिन नेसपा (नयाँ शक्ति) की उपाध्यक्ष मानुषी यमी भट्टराई पनि पुगेकी थिइन्। त्यही बैठकमा जनमत अध्यक्ष सिके राउतले पनि सम्बोधन गरेका थिए।
पार्टी एकताका लागि जनमतको फागुन २५ र २६ गते महोत्तरीको बर्दिबासमा बसेको बैठकले उपाध्यक्ष खानको नेतृत्वमा शरदसिंह यादव, गौविन्द चौधरी सदस्य रहेको कार्यदल गठन गरेको थियो।
नाउपाको गत शुक्रबार र शनिबार बसको बैठकले सांसद गंगाराम चौधरीको नेतृत्वमा सुनीता चौधरी र रामलाल डगोरा थारू सदस्य रहेको कार्यदल बनाएको थियो।
कार्यदलले आइतबारबाटै गृहकार्य थालिसकेको छ।
-1742803814.jpeg)
-1742801159.jpg)
