राष्ट्रिय प्रजातन्त्र पार्टी (राप्रपा) का महामन्त्री धवल शम्शेर राणाले पार्टीको नीतिविपरीत पुराना पञ्च नेता नवराज सुवेदीकै नेतृत्वमा राजसंस्था पुनर्स्थापना आन्दोलन गर्ने उद्घोष गरेका छन्।
उनको यो घोषणाले चैत ५ गते राप्रपाको केन्द्रीय कार्यसमितिले गरेको निर्णयलाई नै चुनौती दिएको छ।
राप्रपाले अध्यक्ष राजेन्द्र लिङ्देन नेतृत्वको आन्दोलन परिचालन मूल समितिबाट नै राजसंस्था पुनर्स्थापनालगायत आन्दोलन अघि बढाउने निर्णय गरेको छ।
चैत १२ गते कार्यक्रम गरेर काठमाडौं उपत्यकाकेन्द्रित आन्दोलन घोषणा गर्ने तयारीमा राप्रपा जुटेका बेला महामन्त्री राणा भने सुवेदी नेतृत्वको ‘संयुक्त जनआन्दोलन समिति’ मै सक्रिय छन्।
राजसंस्था पुनर्स्थापना गर्ने आन्दोलनको नेतृत्व अध्यक्ष लिङ्देन आफैले गर्ने भएपछि महामन्त्री राणा सुवेदी संयोजक रहेको समितिमै सक्रिय हुन लागेका हुन्।
सुवेदी संयोजक रहेको समिति मातहत महामन्त्री राणाकै नेतृत्वमा आन्दोलन परिचालन समिति छ।
शुक्रबार आन्दोलन परिचालन समितिको बैठकसमेत बसेको छ। राप्रपाले यसअघि महामन्त्री राणा नेतृत्वको आन्दोलन परिचालन समितिबाट आन्दोलनका कार्यक्रम तय गर्दै आएको थियो।
तर पार्टीलाई जानकारीबिनै सुवेदी नेतृत्वको समितिमा बसेपछि महामन्त्री राणाको पार्टीभित्रै आलोचना भयो र उनको भूमिकासमेत खुम्च्याइएको थियो।
सुवेदी संयोजक रहेको ‘संयुक्त जनआन्दोलन समिति’ ले शुक्रबार महामन्त्री राणा नेतृत्वमा आन्दोलन परिचालन समिति गठन गर्ने निर्णय गरेको छ।
संवैधानिक राजसंस्था पुनर्स्थापना, सनातन हिन्दु अधिराज्य पुनर्स्थापना, संघीयता खारेजी, भ्रष्टाचार नियन्त्रण र सुशासन बहाली गर्न यो समितिले काम गर्नेछ।
राजनीतिक दल, संघसंस्था तथा अभियानहरूको सहभागिता रहेको वैठकले राणाको संयोजकत्वमा आन्दोलन परिचालन समिति गठन गर्ने निर्णय गरेको हो।
‘संयुक्त जनआन्दोलन’लाई व्यवस्थित र प्रभावकारी बनाउन उपसमितिहरू पनि गठन गर्दै लैजाने निर्णय भएको छ।
आन्दोलन परिचालन समिति र मातहत विभिन्न विभाग तथा समितिमा रहेर एकताबद्ध भई सहकार्य गर्न राष्ट्रवादी देशभक्त नागरिक, अभियान र राजनीतिक दलहरूलाई बैठकले अपिलसमेत गरेको राणाले निकालेको विज्ञप्तिमा उल्लेख छ।
पार्टीका वरिष्ठ नेता रवीन्द्र मिश्र र महामन्त्री धवल शम्शेर राणा सुवेदी नेतृत्वको ‘संयुक्त जनआन्दोलन समिति’ मा सक्रिय भएपछि अध्यक्ष लिङ्देनसहित उनी समर्थित नेताहरू असन्तुष्ट थिए।
चैत ५ को केन्द्रीय कार्यसम्पादन समिति बैठकमा वरिष्ठ उपाध्यक्ष मिश्रले प्रक्रियागत त्रुटि भएको भन्दै आत्मआलोचनासमेत गरेका थिए।
पार्टी अध्यक्षकै नेतृत्वमा आन्दोलन गर्ने तयारी भइरहेका बेला महामन्त्री राणा फेरि सुवेदी नेतृत्वको समितिमा क्रियाशील भएपछि राप्रपा संस्थापन पक्षले यसलाई नजिकबाट नियालिरहेको बताएको छ।
‘पार्टीका जिम्मेवार नेता, महामन्त्री धवल शम्शेर राणाले दुइटा डुंगामा खुट्टा राख्न सुहाउँदैन, पार्टीले नै अध्यक्षको नेतृत्वमा आन्दोलन गर्ने भनेपछि दलका जिम्मेवार नेता उहाँ गैरदलीय (नवराज सुवेदी) नेतृत्वको आन्दोलनमा जानु राम्रो हुँदैन,’ राप्रपाका एक पदाधिकारीले सेतोपाटीसँग भने, ‘हामीले उहाँका गतिविधि नजिकबाट नियालेका छौं, समय आएपछि पार्टीले केही न केही एक्सन त लिनैपर्छ।’
दुवैतिर एकै व्यक्तिले आन्दोलन परिचालन समिति संयोजक हुन नमिल्ने पनि उनले बताए।
‘राप्रपामा पनि महामन्त्री धवल शम्शेर राणा नेतृत्वमा आन्दोलन परिचालन समिति छँदैछ, त्यसको केही अधिकार खुम्च्याए पनि त्यो समिति अस्तित्वमा त छ, भलै आन्दोलन परिचालन मूल समितिले अब कार्यक्रम गर्छ नै,’ ती पदाधिकारीले भने, ‘समान उद्देश्यका लागि दुईतिर संयोजक त हुन नमिल्ला नि जिम्मेवार नेताले।’
यसअघि अध्यक्ष लिङ्देनले महामन्त्री राणालाई संगठन विभाग प्रमुखबाट पनि हटाएका थिए।
तर महामन्त्री धवल शम्शेर राणा भने सुवेदी नेतृत्वको ‘आन्दोलन परिचालन समिति’ राजावादी दल तथा समूहहरूको साझा भएको तर्क गर्छन्।
उनले फरक-फरक आन्दोलनका कार्यक्रम नल्याउन आग्रह गर्दै सुवेदी नेतृत्वमा नै सबै अटाउने बताएका छन्।
‘नवराज सुवेदीजीको नेतृत्वमा एउटा छाता बनेको छ, त्यही छाताअन्तर्गत यो सबै भइरहेको छ। हामी सबै पार्टीहरू, दुर्गा प्रसाईंजीहरू पनि। शाही शक्ति, सबै अभियन्ता र पार्टीहरू मिलेर अघि बढ्ने हो,’ रिपोर्टर्स क्लबमा शुक्रबार भएको कार्यक्रममा महामन्त्री राणाले भने, ‘कसैले आफ्नो कार्यक्रम गर्छ भने गर्न दिने, उसलाई सहयोग गर्ने हो।’
आफू राप्रपाको आन्दोलन परिचालन समिति अध्यक्ष भएको डेढ वर्ष भएको र यसबीचमा धेरै कार्यक्रम गरेको उनले बताए।
‘नवराज सुवेदीको नेतृत्वमा समिति बनेपछि मेरो जिम्मेवारी यता पनि भयो, म राप्रपामा पनि छु। राप्रपा, कमल थापा, शिव सेना सबैले एकअर्कालाई सहयोग गर्ने सहमति छ,’ उनले भने।
तर राप्रपा र सुवेदी नेतृत्वमा हुने आन्दोलन जुधेको खण्डमा महामन्त्री राणा कुन कार्यक्रममा सहभागी हुन्छन् अहिले प्रष्ट छैन।
अध्यक्ष राजेन्द्र लिङ्देनले सुवेदी नेतृत्वमा हुने गतिविधिलाई पार्टीले अपनत्व नलिने प्रष्टाइसकेका छन्।
अध्यक्ष लिङ्देनले राप्रपाको आन्दोलन परिचालन मूल समितिलाई साथ दिन समान विचार राख्ने राजनीतिक दलहरू, समूह वा व्यक्तिहरूलाई पनि आह्वान गरेका थिए।
यो पनि:
आन्दोलनको नेतृत्व राजेन्द्र लिङ्देनले आफै लिने, खुम्च्याइयो धवल शम्शेरको भूमिका
रवीन्द्र र धवलले पूर्वराजासँग बढाएको निकटताले राप्रपामा उत्पन्न गरेको तनाव
नवराज सुवेदीलाई प्रश्न-कसले हो तपाईंलाई अघि सारेको?
राजसंस्था फर्काउने आन्दोलनका ‘कमान्डर’ सुवेदीले आत्मकथामा ज्ञानेन्द्र शाह र पञ्चायतबारे लेखेका दुई प्रसंगले राजावादीको मुख रातो
