नेकपा एमालेका सांसद योगेश भट्टराईले आफूले रोजेर भैरहवा एयरपोर्ट छानबिनका लागि गठित उपसमितिको जिम्मेवारी नलिएको बताएका छन्।
समितिले नै पूर्वमन्त्री भइसकेको र विषय बुझेको मान्छेका रूपमा आफूलाई जिम्मेवारी दिएको भट्टराईले बताए।
राष्ट्रिय स्वतन्त्र पार्टीका सांसद मनिष झाले पूर्वपर्यटन मन्त्री समेत रहेका सांसद भट्टराईको नेतृत्वमा भैरहवामा निर्माण भएको गौतमबुद्ध अन्तर्राष्ट्रिय विमानस्थल निर्माणसम्बन्धी छानबिनको प्रतिवेदन तयार पारे प्रश्न उठ्न सक्ने बताएका थिए।
‘आठ महिना भयो उपसमिति बनेको। म पर्यटन मन्त्री थिएँ भन्ने सबैलाई थाहा थियो,’ भट्टराईले भने, ‘मैले उपसमितिमा बस्छु भनेको होइन। राम्ररी अध्ययन गर्न सक्नुहुन्छ, तपाईंलाई ज्ञान पनि छ भनेर सांसदहरूले भनेर नै उपसमितिमा राखिएको हो।’
आफूले उपसमितिको कुनै पनि काम लुकाएर नगरेको भट्टराईले दाबी गरे।
‘मैले केही लुकाएर छिपाएर गरेको छैन। सबै कुरा पारदर्शी गरेको छु,’ भट्टराईले भने, ‘तपाईंहरूलाई (मनिष झा, अमरेशकुमार सिंहलाई) प्रतिवेदन फाइनल गर्नुस् भनेर दिएको छु।’
भट्टराईले भैरहवा एयरपोर्ट निर्माणसँग सम्बन्धित उपसमितिको प्रतिवेदन टुंगिएको र प्रतिवेदन पेस गर्न मात्र बाँकी रहेको बताए।
लेखा समितिको बैठकमा सांसद भट्टराईले उपसमितिले प्रतिवेदन दिए पनि समिति निर्णायक हुने बताए।
‘भैरहवा वा पोखरा एयरपोर्ट मेरो जिम्मेवारीको विषय पनि होइन। कुनै बेला म मन्त्री थिएँ। कुनै बेला प्रेम आले मन्त्री हुनुहुन्थ्यो। प्रेम आले भएकै बेला भैरहवा एयरपोर्ट उद्घाटन भएको हो। मैले उद्घाटन गरेको होइन। उहाँले नियुक्ति गरेका व्यक्ति नागरिक उड्डयन प्राधिकरणमा महानिर्देशक छन्। वायु सेवा निगममा अध्यक्ष छन्,’ भट्टराईले भने, ‘एयरपोर्टको सन्दर्भमा उपसमिति बन्यो। त्यो उपसमितिबारे मनिष झाले जायज कुरा उठाउनुभयो। तर समयमा उठाउनुभएन।’
उनले अब आफू भैरहवा र प्रेम आले पोखरा एयरपोर्टको छानबिन उपसमितिबाट बाहिरिने बताए।
‘एयरपोर्टहरूको छानबिनमा म पनि बस्दिनँ, आले पनि बस्नुहुन्न। आले पोखराबाट हट्नुपर्यो। म भैरहवाबाट हटिहाल्छु। म भैरहवामा ध्यान दिन्नँ। आलेजी पोखरामा ध्यान नदिनुहोस्,’ भट्टराईले भने, ‘उपसमिति बनाएर संयोजक चयन गर्छौं। जो संयोजक बन्नुहुन्छ उहाँले थप छानबिन गरेर ल्याउनुहुन्छ। म सदस्य पनि रहन्नँ।’
भट्टराईले सांसद आलेको पालामा नियुक्ति भएका अध्यक्ष भए पनि नेपाल एयरलाइन्सको अवस्था बिग्रिएको टिप्पणी गरे।
‘नेपाल वायु सेवा निगमको चक्का आकाशमा उडिसके। हजुरले नियुक्ति गरेको मान्छे हो,’ आलेतर्फ हेर्दै योगेशले व्यङ्ग्य गरे, ‘पर्यटनसँग सम्बन्धित कुनै पनि विषयमा मैले पनि भाग लिन्नँ। प्रेम आलेले पनि भाग लिनुहुन्न। उहाँ पनि पोखरासँग छानबिनको सम्बन्धित समितिमा हुनुहुन्छ। तपाईंले नियुक्ति गरेको हो। नागरिक उड्डयन प्राधिकरण र नेपाल एयरलाइन्समा तपाईंले नियुक्त गरेका महानिर्देशक छन्। एयरलाइन्सको हालत के छ। चक्का कहाँ छ। तपाईंलाई थाहा छ!’
लगत्तै पूर्वमन्त्री आलेले उपसमितिमा आफूले नेकपा एकीकृत समाजवादीका नेता एवं पूर्वप्रधानमन्त्री झलनाथ खनाल र अन्य नेताको दबाबमा नागरिक उड्डयन प्राधिकरणमा प्रदीप अधिकारी र वायु सेवा निगममा युवराज अधिकारीलाई नियुक्त गरेको बताए।
सम्बन्धित समाचार:
नयाँ पार्टी चलायमान बनाउन जुनियर नियुक्त गरेँ: प्रेम आले
भैरहवा एयरपोर्ट छानबिन समितिको संयोजक योगेश भट्टराईको नेतृत्वमा रास्वपा सांसद मनिष झाले उठाए प्रश्न
राजेन्द्र लिङ्देन उपसमितिको प्रतिवेदन: पोखरा अन्तर्राष्ट्रिय विमानस्थल निर्माणमा अनियमितता भएको छैन भन्न सकिन्न
-1742552037.jpg)
