नेकपा (एमाले) प्रचार विभाग सचिव गणेश पाण्डेले राजीनामा दिएका छन्। उनले शुक्रबार प्रचार सचिवबाट राजीनामा दिएको बताएका हुन्।
एमाले सचिवालयको ४५ औं बैठकले पाण्डेलाई प्रचार विभाग सचिवमा मनोनीत गरेको थियो।
तर प्रेस चौतारी अध्यक्षको दाबेदार रहेको भन्दै पाण्डेले प्रचार विभाग सचिवमा बस्न अस्वीकार गरेका छन्।
‘म प्रेस चौतारी नेपालको झन्डै १० वर्षदेखि (दुई कार्यकाल) केन्द्रीय उपाध्यक्षको जिम्मेवारीमा रहेको र प्रेस चौतारी नेपालको आगामी १०औं राष्ट्रिय महाधिवेशनमा अध्यक्ष पदको दाबेदार रहेका कारण दोहोरो जिम्मेवारीमा नरहने मनसायका साथ मैले विभागको सचिव पदबाट राजीनामा दिने निर्णय गरेको छु,’ उनले राजीनामा पत्रमा भनेका छन्।
प्रेस चौतारीको १० औं अधिवेशन चैत १० देखि १२ गतेसम्म विराटनगरमा हुँदैछ। प्रेस चौतारी अध्यक्षका लागि उपाध्यक्ष राजेश राईले पनि उम्मेदवारी घोषणा गरेका छन्।
