सत्तारूढ नेकपा (एमाले) को सचिवालय बैठक सोमबार बस्दैछ। ललितपुरस्थित पार्टी केन्द्रीय कार्यालयमा दिउँसो १ बजे बस्ने सचिवालय बैठकमा पछिल्लो राजनीतिक अवस्थाबारे छलफल हुने एमाले प्रचार विभाग प्रमुख राजेन्द्र गौतमले जानकारी दिए।
‘पछिल्लो सचिवालय बैठकयता विकसित राजनीतिक घटनाक्रम, सरकारको कामबारे समीक्षा हुनेछ। पछिल्लो राजनीतिक अवस्थाबारे धारणा बनाउने काम पनि हुनेछ,’ उनले भने, ‘पार्टीका केही आन्तरिक विभागीय कामहरू पनि छन्। त्यसबारे सचिवालय बैठकले निर्णय लिनेछ।’
पछिल्लो समय राजावादी शक्ति चलमलाएको, व्यवस्थाविरूद्ध घृणा फैलाएपछि त्यसबारे धारणा बनाउन सचिवालय बैठक बोलाइएको एमालेका नेताहरूले बताएका छन्।
गत फागनु २५ गते पूर्वराजा ज्ञानेन्द्र शाहको स्वागतमा राजावादी र राजसंस्था पुनर्स्थापना गर्न चाहने राष्ट्रिय प्रजातन्त्र पार्टी, राष्ट्रिय प्रजातन्त्र पार्टी नेपाल लगायत शक्तिहरूले काठमाडौंका बृहत जनप्रदर्शन गरेका थिए।
त्यसपछि नेपालको राजनीति तरंगित बनेको छ।
गणतन्त्रविरोधी शक्ति चलमलाएको भन्दै सत्ता गठबन्धन र प्रतिपक्षमा रहेका दलहरूले धारणा दिँदै आएका छन्।
एमालेले पनि बैठकबाट आधिकारिक दृष्टिकोण सार्वजनिक गर्न लागेको हो।
