प्रधानमन्त्री केपी शर्मा ओलीले मंगलबार कोशी प्रदेश सभालाई गर्ने सम्बोधन बहिष्कार गर्ने विपक्षी दलहरूले चेतावनी दिएपछि मुख्यमन्त्री हिक्मत कार्कीले माओवादी र एकीकृत समाजवादीसँग संवाद थालेका छन्।
मुख्यमन्त्री कार्कीले मुख्य विपक्षी माओवादी र विपक्षी दल एकीकृत समाजवादीका संसदीय दलका नेताहरूलाई टेलिफोन गरेर प्रदेश सभाको बैठक बहिष्कार नगर्न अनुरोध गरेका हुन्।
प्रदेशको प्रमुख प्रतिपक्षी माओवादी संसदीय दलका नेता इन्द्र आङ्बो र एकीकृत समाजवादी दलका नेता एवम् पूर्व मुख्यमन्त्री राजेन्द्र राईलाई फोन गरेर मुख्यमन्त्रीले प्रधानमन्त्रीले सम्बोधन गर्ने प्रदेश सभा बैठकमा उपस्थित हुन आग्रह गरेको नेताहरूले बताएका छन्।
प्रधानमन्त्रीले सम्बोधन गर्ने बैठकमा उपस्थित हुन अनुरोध गर्दै मुख्यमन्त्री कार्कीले आफूलाई टेलिफोन गरेको पूर्वमुख्यमन्त्री राईले स्वीकारे।
‘हो, मुख्यमन्त्रीले फोन गर्नुभएको थियो,’ उनले भने। फोनमा भएको कुराकानीबारे भने राईले खुलाउन चाहेनन्।
माओवादी दलका नेता आङ्बोले पनि आफूलाई मुख्यमन्त्रीले फोन गरेको तर बैठकमा भएका कारण पछि कुरा गर्ने भनेको सुनाए।
एकीकृत समाजवादी स्रोतका अनुसार पूर्वमुख्यमन्त्री राजेन्द्र राईले मुख्यमन्त्री कार्की सामु मुख्यतः दुई सर्त राखेका छन्।
‘प्रदेश सभामा प्रधानमन्त्रीले सम्बोधन गर्ने कुरा महत्वको विषय हो। यति महत्वको कुराबारे मुख्यमन्त्री र सभामुखले दलका नेतासहित मिटिङ राख्नुपर्ने थियो। उपस्थितिको लागि अनुरोध गर्नुपर्ने थियो। हाम्रो अन्तको काम मिलाउन अनुरोध गर्नुपर्ने थियो। हाम्रो काम छाड्न नमिल्ने भए अर्को दिन प्रमको समय मिलाउन अनुरोध हामीले गथ्यौं होला’ राईले कार्कीलाई भनेका थिए।
जबाफमा मुख्यमन्त्री कार्कीले ‘यसबारे कमजोरी भएको भन्दै आत्मालोचित छु’ भनेको स्रोतको भनाइ छ।
पूर्वमुख्यमन्त्री राईले मुख्यमन्त्रीसामु राखेको अर्को सर्त चाहिँ प्रधानमन्त्रीको सम्भावित अभिव्यक्तिबारे रहेको थियो।
‘गठबन्धनभन्दा बाहिरका पार्टीलाई सदनमै आएर प्रधानमन्त्रीले घोचपेच गर्ने र तितो बोल्नु भएन,’ राईले भनेका थिए, ‘यदि हामी विपक्षी दलहरूलाई प्रधानमन्त्रीले घोचपेच गर्ने हो भने हामी बीचैमा सभा बहिष्कार गरेर बाहिरिने छौं। उहाँले तितो नबोल्ने कुराको ग्यारेन्टी गर्नुस् हामी उपस्थित हुन्छौं।’
जबाफमा मुख्यमन्त्री कार्कीले आफूले विपक्षी दलहरूको सन्देश प्रधानमन्त्री सामु पुर्याइसकेको र फेरि पनि दोहोर्याएर पुर्याउने बताएका थिए।
स्रोतका अनुसार कोशीका एमाले प्रमुख सचेतक विदुर लिंथेपमार्फत् यी दुई सर्त विपक्षीले सरकारलाई पठाएका थिए। लगत्तै मुख्यमन्त्रीले फोन गरेका थिए।
त्यसक्रममा मुख्यमन्त्री कार्कीले ‘प्रधानमन्त्रीले परिस्थितिले संविधान मान्ने दलहरू एक हुनुपर्ने अवस्थामा तितोपिरो गर्नु हुँदैन भन्नु भएको छ’ भनेर राईलाई आश्वस्त पारेका थिए।
‘हामी अब उपस्थित हुने कि नहुने अन्य विपक्षी दलसँग सल्लाह गरेर निर्णय लिन्छौं,’ एकीकृत समाजवादीका एक सांसदले भने।
मुख्य विपक्षी माओवादीका नेता आङ्बोले आइतबार प्रदेश सभामा र सोमबार सेतोपाटीसँगको कुराकानीमा ‘यथास्थितिमा सम्बोधन बैठकमा सहभागी नहुने’ बताएका थिए।
मुख्यमन्त्रीले फोन गर्दा नेता आङ्बोले कुरा गर्न नपाएको र साँझमा पुनः कुराकानी हुने त्यसपछि के गर्ने टुंगो हुने एक सांसदले जानकारी दिए।
यो पनि:
प्रधानमन्त्रीसँग बदला लिने तयारीमा कोशीका माओवादी सांसदहरू
