गत नोभेम्बरमा डोनाल्ड ट्रम्पसँग राष्ट्रपतीय निर्वाचन हारेकी पूर्व उपराष्ट्रपति कमला ह्यारिसले क्यालिफोर्नियाको गभर्नर पदका लागि सन् २०२६ मा हुने निर्वाचन लड्ने संकेत गरेकी छिन्।
गत साता अस्कर पुरस्कार अगाडि भएको पार्टीमा एक जनाले ह्यारिसलाई क्यालिफोर्नियाको गभर्नर पदका लागि लड्न कहिले निर्णय लिने भनेर सोधेका थिए। 'पोलिटिको' अनलाइनका अनुसार ह्यारिसले 'गर्मीको अन्त्यसम्ममा' भनेर उत्तर दिएकी थिइन्। पोलिटिकोले ह्यारिस र ती व्यक्तिबीच भएको कुराकानी सुनेका दुई जनाको भनाइ उद्धृत गर्दै यसबारे लेखेको हो।
क्यालिफोर्नियाका अहिलेका गभर्नर ग्याभिन न्युसम तेस्रो कार्यकालका लागि सन् २०२६ मा लड्न पाउने छैनन्। त्यसैले ह्यारिसले सो पदमा लड्न गम्भीर रूपमा विचार गरिरहेकी र केही महिनाभित्र निर्णय गर्ने भनेर आफ्ना समर्थक, सहयोगी र विश्वास पात्रहरूलाई फोन गरेर भनिरहेकी पनि पोलिटिकोले लेखेको छ।
ह्यारिसले क्यालिफोर्नियाको सान फ्रान्सिस्कोको जिल्ला सरकारी वकिलबाट राजनीतिक जीवन सुरू गरेकी हुन्। सन् २०२० मा जो बाइडेनले उनलाई उपराष्ट्रपतिको उम्मेदवार छान्दा उनी क्यालिफोर्नियाबाट जितेकी संघीय सिनेटर थिइन्।
क्यालिफोर्निया छुट्टै मुलुक हुने भए विश्वको पाँचौं ठूलो अर्थतन्त्र भएको देश हुनेछ। त्यत्रो ठूलो र धनी राज्यको गभर्नर हुने ह्यारिसको लामो समयदेखिको इच्छा भएको उनका सहयोगीहरू बताउँछन्।
अहिलेसम्म अमेरिकामा कोही अश्वेत महिला कुनै राज्यको गभर्नर भएका छैनन्। अमेरिकाकी पहिलो महिला उपराष्ट्रपति बनेर इतिहास रचेकी ह्यारिसलाई अर्को इतिहास रच्ने मौकाले पनि लोभ्याएको हुन सक्छ।
उनी गभर्नर पदका लागि सन् २०२६ मा लडिन् भने त्यसको दुई वर्षपछि हुने राष्ट्रपतीय निर्वाचन लड्ने छैनन्। अर्को राष्ट्रपतीय निर्वाचन नलड्ने निर्णय लिनुपर्ने भएकाले पनि उनले गभर्नर पदका लागि लड्नेबारे सोच्न समय लिएको मानिन्छ।
तर सन् २०१६ र २०२४ मा राष्ट्रपति निर्वाचनमा महिला उम्मेदवारहरू पराजित भए। त्यसैले डेमोक्र्याटिक पार्टीका कार्यकर्ताले फेरि महिला उम्मेदवार नउठाऊलान् भन्ने आकलन गरेर पनि उनले राष्ट्रपतिको प्राइमरी नलड्ने विचार गरेकी हुन सक्छिन्।
रिपब्लिकन पार्टीले भने अहिलेसम्म महिलालाई राष्ट्रपति उम्मेदवार बनाएको छैन। डेमोक्र्याटिकले बनाएका दुवै महिला उम्मेदवार डोनाल्ड ट्रम्पसँग हारेका हुन्।
ह्यारिस गभर्नर पदका लागि डेमोक्र्याटिक पार्टीको प्राइमरी लड्ने भइन् भने, सो पदका लागि लड्ने विचार गरिरहेका धेरै जना पछि हट्ने अनुमान छ। त्यसैले पार्टीमा उनी बलियो उम्मेदवार हुनेछिन्। पार्टीको प्राइमरी जितेमा डेमोक्र्याटिकको बलियो पकड भएको क्यालिफोर्नियामा उनले रिपब्लिकनका उम्मेदवारलाई हराउने पक्का जस्तै हुनेछ।
ह्यारिस अहिले ६० वर्ष पुगिन्। उनले अहिल्यै राजनीति छोड्नुभन्दा डेमोक्र्याटिक बलियो भएको ठूलो राज्यको गभर्नर भएर ट्रम्पको जितपछि धर्मराइरहेको आफ्नो पार्टीको नेता बन्ने विचार गरेकी पनि हुन सक्छिन्।
अर्कोतर्फ अहिलेका गभर्नर ५७ वर्षीय न्युसमले सन् २०२८ मा डेमोक्र्याटिक पार्टीबाट राष्ट्रपतिको प्राइमरी लड्ने अपेक्षा छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
