अमेरिकी राष्ट्रपति डोनाल्ड ट्रम्पले चीनको उत्पादनमा मंगलबारदेखि लागू हुने गरी १० प्रतिशत थप भन्सार महसुल लगाउने भएका छन्।
ट्रम्पले फेब्रुअरी ४ देखि लागू हुने गरी पनि चीनबाट आउने वस्तुमा १० प्रतिशत भन्सार थप महसुल लगाएका थिए। बर्सेनि दसौं हजार अमेरिकीको ज्यान लिने फेन्टनिल बनाउन चाहिने कच्चा रसायन लागुपदार्थको पैठारी गर्ने गिरोहलाई चीनले बेचेको आरोप लगाएर एक महिनाअघि थप १० प्रतिशत भन्सार लगाएका थिए।
तर फेन्टनिल बनाउन चाहिने कच्चा रसायनको निर्यात रोक्न चीनले यसबीचमा केही नगरेको भन्दै मंगलबारदेखि लागू हुने गरी १० प्रतिशत थप भन्सार महसुल लगाउने भएका हुन्।
ट्रम्पले मंगलबारदेखि लागू हुने गरी १० प्रतिशत थप भन्सार महसुल लगाउने भएपछि चीनको वाणिज्य मन्त्रालयले त्यसको प्रतिकार गर्ने प्रतिबद्धता जनाइसकेको छ।
ट्रम्प सरकारले फेन्टानिलको प्रवाहको लागि बेइजिङलाई ‘दोष थोपर्न’ र त्यही बहानामा चीनमाथि दादागिरी गर्न खोजिरहेको मन्त्रालयले भन्यो भनेर समाचार संस्था रोएटर्सले जनाएको छ।
मंगलबारदेखि लगाइने थप भन्सारको जबाफमा चीनले अमेरिकी कृषि र खाद्य उत्पादनलाई निशाना लगाउने भनेर सोमबार चिनियाँ कम्युनिस्ट पार्टीको अंग्रेजी मुखपत्र ग्लोबल टाइम्सले लेखेको थियो। चीनले भन्सार र गैर-भन्सार दुवै खाले उपायहरूको अबलम्बन गर्ने पनि ग्लोबल टाइम्सले जनाएको थियो।
ट्रम्पले अन्तिम समयमा फेब्रुअरी ४ देखि लागू हुने गरी क्यानडा र मेक्सिकोको उत्पादनमा लगाउने भनेको २५ प्रतिशत भन्सार महसुल ३० दिनका लागि रोकेका थिए। तर चीनलाई लगाउने भनेको १० प्रतिशत थप भन्सार महसुल दर भने लगाएका थिए।
त्यतिबेला रोकेको क्यानडा र मेक्सिकोको उत्पादनमा लगाउने भनेको २५ प्रतिशत भन्सार महसुल मंगलबारदेखि उनले लगाउने भएका छन्। त्यस्तै, चीनलाई १० प्रतिशत थप भन्सार महसुल लगाउने भएका हुन्।
एक महिनाअघि लगाएको १० प्रतिशत थप भन्सारको बदलामा चीनले अमेरिकाबाट आयात हुने कोइला र तरल प्राकृतिक ग्यास उत्पादनहरूमा १५ प्रतिशत भन्सार अनि कच्चा तेल, कृषि मेसिनरी र ठूला इन्जिन भएका कारहरूमा १० प्रतिशत भन्सार लगाएको थियो।
त्यस्तै, उच्च गुणस्तरको प्राविधिक वस्तु उत्पादनमा प्रयोग हुने केही महत्वपूर्ण दुर्लभ खनिज पदार्थहरूको अमेरिका निर्यातमा पनि प्रतिबन्ध लगाएको थियो। त्यसदेखि बाहेक चिनियाँ बजार नियामकले अमेरिकी कम्पनी गुगलविरूद्ध प्रतिस्पर्धा विरोधी गतिविधि गरेको भनेर जाँच पनि सुरू गरेको थियो। चीनमा गुगल ब्लक गरिएको छ। त्यो कदमले भने उसलाई चिनियाँ कम्पनीहरूसँग कारोबार गर्न पनि अप्ठ्यारो पारेको थियो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
