अमेरिकी राष्ट्रपति डोनाल्ड ट्रम्पले ‘वास्तविक समस्याहरू समाधान गर्न’ फेरि निम्तो दिएमा आफू भेट्न तयार रहेको युक्रेनका राष्ट्रपति भोलोदिमिर जेलेन्स्कीले बताएका छन्।
युक्रेनको विषयमा छलफल गर्न बेलायती प्रधानमन्त्री कियर स्टार्मरले आइतबार लन्डनमा आयोजना गरेको युरोपेली देशहरूको भेलापछि बोल्दै उनले अमेरिकासँग सम्बन्धको अहिलेको अवस्था सुध्रिने विश्वास पनि व्यक्त गरेका छन्।
यदि अमेरिकी राष्ट्रपतिले वास्तविक समस्याहरू समाधान गर्न र निर्णायक कदम चाल्न रचनात्मक संवादका लागि निम्तो दिएमा आफू फेरि अमेरिका जाने जेलेन्स्कीले बताए। युक्रेन अमेरिकासँग बराबरको हैसियतमा वार्ता गर्न लायक भएकोमा पनि उनले जोड दिए।
शुक्रबार ह्वाइट हाउसमा ट्रम्प र अमेरिकी उपराष्ट्रपति जेडी भान्ससँग भएको चर्काचर्कीबारे कुरा गर्दै उनले सो कुराकानी खुल्लमखुल्ला गर्नु अमेरिका र युक्रेन दुवैका लागि सकारात्मक नभएको बताए। त्यस्तो हुन नदिन बन्द कोठामा कुराकानी हुनुपर्ने बताएका छन्।
अमेरिकासँगको खनिज सम्झौता गर्न पनि युक्रेन तयार रहेको र मन्त्रीहरूले त्यसमा हस्ताक्षर गर्न सक्ने बताएका छन्। चर्काचर्कीपछि पनि जेलेन्स्की खनिज सम्झौता गर्न ह्वाइट हाउसमा केहीबेर कुरेर बसेका थिए। उनले त्यसपछि निकालेको वक्तव्यमा पनि खनिज सम्झौता गर्न युक्रेन तयार रहेको भनेका थिए।
शुक्रबार जेलेन्स्की खनिज सम्झौतामा हस्ताक्षर गर्नकै लागि ह्वाइट हाउस पुगेका थिए। ट्रम्प र जेलेन्स्कीको राष्ट्रपति स्तरको संयुक्त पत्रकार सम्मेलन सौहार्दपूर्ण चलिरहेका बेलामा उपराष्ट्रपति भान्स बीचमा पसेर कटुता थपेका थिए। सो पत्रकार सम्मेलनमा एक पत्रकारले ट्रम्पलाई युक्रेनतर्फ कि रूसतर्फ? भनेर सोधेका थिए।
ट्रम्पले उनी कसैतर्फ नभएर अमेरिका र संसारको पक्षमा भएको उत्तर दिएर अन्तिम प्रश्न लिने भनिसकेका थिए। तर भान्सले आफूले त्यसमा थप्ने भनेर बोलेका थिए।
भान्सले कडा शैलीमा बोल्दै अघिल्ला राष्ट्रपति जो बाइडेनले पत्रकार सम्मेलनहरूमा रूसविरूद्ध आक्रामक शैली अपनाउँदा पनि काम नलागेकाले ट्रम्पले कूटनीति थालेको बताए। त्यसको प्रतिकार गर्दै जेलेन्स्कीले पुटिनले कैयौं सम्झौता तोडेको फेहरिस्त सुनाउँदै कस्तो खाले कूटनीतिको कुरा गरेको भनेर भान्सलाई सोधेका थिए।
त्यसपछि राष्ट्रपति स्तरको पत्रकार सम्मेलनको मर्यादा मिचेर भान्स जेलेन्स्कीमाथि खनिए। जेलेन्स्कीले पनि कडा रूपमा प्रतिवाद गरे। अनि ट्रम्प पनि आक्रामक भएर सौहार्दपूर्ण चलिरहेको पत्रकार सम्मेलनमा चर्काचर्की भएको थियो। युक्रेनलाई सहयोग गरेकामा ट्रम्पलाई धन्यवाद समेत नभनेको भनेर भान्सले निहुँ खोजेका थिए।
पछि जेलेन्स्कीले निकालेको वक्तव्यमा उनले सबैखाले सहायताका लागि कृतज्ञ रहेको भन्दै ट्रम्प, अमेरिकी संसद र जनतालाई धन्यवाद दिएका थिए।
अमेरिकाको सहयोग युक्रेनलाई बाँच्न मद्दत गर्नमा महत्त्वपूर्ण रहेको भन्दै उनले थपे, 'हामीलाई राष्ट्रपति ट्रम्पको समर्थन हुनु महत्त्वपूर्ण छ।'
बेलायती प्रधानमन्त्री स्टार्मर र फ्रान्सका राष्ट्रपति म्याक्रोंले जेलेन्स्की र ट्रम्पको सुलह गराउने प्रयास गरिरहेका छन्। चर्काचर्कीपछि म्याक्रों लगायत कैयौं युरोपेली सरकार प्रमुखले वक्तव्य निकालेर जेलेन्स्कीको समर्थन गरेका थिए।
तर चर्काचर्कीको २४ घण्टाअघि ह्वाइट हाउसमै ट्रम्पसँग सौहार्दपूर्ण वार्ता गरेका स्टार्मरले त्यस्तो वक्तव्य निकाल्नुको साटो तुरून्तै ट्रम्प र जेलेन्स्की दुवैसँग कुरा गरेका थिए। स्टार्मरले दुई नेतालाई शुक्रबार नै फेरि भेट्न आग्रह गरेको भनेर द न्यूयोर्क टाइम्सले लेखेको छ।
तर ट्रम्प र जेलेन्स्की दुवै जनाले रिस अलिक मत्थर भएपछि उचित हुने बताएका थिए।
ह्वाइट हाउसको घटनापछि लामो हवाई यात्रा गरेर शनिबार सिधै बेलायत पुगेका जेलेन्स्कीले आइतबारको युरोपेली देशहरूको भेलापछि फेरि आफू ट्रम्पसँग कुरा गर्न तयार रहेको बताएका हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
यो पनि:
अमेरिका र युक्रेनको युद्ध–साझेदारी सकियो कि बाँकी छ?
