नेकपा (एमाले) मोरङको १० औं जिल्ला अधिवेशन विराटनगरमा जारी छ।
अधिवेशनमा अध्यक्ष केपी शर्मा ओली र उनका समूहका सबैजसो नेता र विनोद ढकाल समूहबीचको प्रतिस्पर्धामा परिणत हुने निश्चित भएको छ।
कुनैबेला ओलीका विश्वासपात्र मानिने विनोद ढकाल पूर्वको पार्टी संगठनमा माधव नेपालको जगजगी हुँदा ओली पक्षका एक मात्रै स्तम्भजस्तो मानिन्थे। समयक्रममा उनै ढकाल यतिबेला ओली र उनको टिमका नेताहरूसँग एक्लै भिड्ने विन्दुमा आइपुगेका छन्।
यसको सुरूआत २०८० असोजमा भएको प्रदेश अधिवेशनबाट भएको थियो। त्यसबेला ढकाल केन्द्रीय सदस्य थिए। तर उनले प्रदेश अध्यक्षका दाबी गरे। ओली टिममा रहेका कोशीका नेताहरू गुरू बराल शेरधन राई, भानुभक्त ढकाल, हिक्मत कार्की लगायतले घनश्याम खतिवडालाई अघि सारिसकेका थिए।
२०७४ मा शेरधन राई मुख्यमन्त्री बनेपछि एकै टिममा भएर पनि ढकालको राई र कार्कीहरूसँग सम्बन्ध चिसिएको थियो। सोही कारण नेताहरूले कुनै बेला माधव नेपाल निकट रहेका खतिवडालाई च्यापे। आफ्नो टिमका नेताहरूले साथ दिएका खतिवडालाई अध्यक्ष ओलीले पनि समर्थन गरे। प्रदेशमा ढकाल हारे, खतिवडा जिते। त्यहीबेलादेखि ओली र उनको टिमसँग एक्लै भिडिरहेका ढकाल जिल्ला अधिवेशनमा आइपुग्दा पनि भिड्ने योजनासहित टिम लिएर मैदानमा छन्।
भन्नलाई त ढकाल आफू ओली टिममै रहेको बताइरहेका छन्।
‘अध्यक्ष कमरेडको नाम लिएर तलका साथीहरू मनपरी गर्न खोजिरहेको’ भन्दै उनले केपी शर्मा ओलीको समर्थन लिने प्रयास जारी राखेका छन्। यद्यपि पूर्वराष्ट्रपति विद्यादेवी भण्डारी निकट उनलाई र उनको टिमलाई ओलीले प्रदेश र जिल्ला दुवैमा ‘ग्रिन सिग्नल’ दिएका छैनन्।
अहिले मोरङ अधिवेशनमा भिडिरहेका ढकाल पक्षीय नेताहरू पनि उही कुरा दोहोर्याइरहेका छन्।
‘हामी अध्यक्ष कमरेड (ओली) कै टिमका हौं। केही नेताहरूले संस्थापन इतर भनेर दुष्प्रचार गरिरहेका छन्,’ अजम्बर राईको अध्यक्षतामा उपाध्यक्ष भिड्ने तयारीमा रहेका सागर थापाले भने ‘अध्यक्षको नाम लिएर जथाभावी गर्नेहरूलाई मोरङका कार्यकर्ताले अधिवेशनबाट जवाफ दिनेछन्।’
अनेरास्ववियुको केन्द्रमा लामो समय काम गरेर पार्टी भूगोलमा काम गरिरहेका मोरङका ढकाल अहिलेसम्म संसदीय राजनीतिमा सफल नभएका नेता हुन्। २०७४ मा विराटनगरको मेयरमा पनि पराजित उनी पार्टी संगठनमा भने राम्रो ‘होल्ड’ भएका नेता मानिन्छन्।
यसको प्रमाण आइतबार बन्दसत्रभित्र भएको नाराबाजीमा पनि देखिएको थियो। अधिवेशनको बन्द सत्रमा आइतबार एउटा रोचक दृश्य देखियो। बन्दसत्रमा सहभागी नेताहरूले दिएको जानकारी अनुसार प्रतिनिधि मनोनयनको विषय बन्द सत्रमा विवादको माध्यम बनेको हो।
बन्दसत्र चल्दै गर्दा मोरङका उपसचिव सोमराज थापासहितका बहुसंख्यक जिल्ला कमिटीका सदस्यहरू नाराबाजीमा उत्रिए। नाराबाजी गर्नेमध्येका एक नेता थिए, सागर थापा।
कूल ९११ जना प्रतिनिधिमध्ये ४६ जना प्रतिनिधि जिल्लाले मनोनित गरेको विषयमा विनोद ढकाल पक्षका कार्यकर्ता असन्तुष्ट सुनिन्थे। आफूहरूलाई जानकारी नदिई एकपक्षीय रूपमा प्रतिनिधि मनोनित गरिएको भन्दै हालका उपसचिव सोमराज थापाले भने, ‘म जिल्ला संगठन कमिटीको उपसचिव, प्रतिनिधिहरू कसरी मनोनित भए मलाई सुइँकोसम्म दिइएन। यसरी मापदण्ड मिचेर गरिएको मनोनयन हामीलाई स्वीकार्य छैन।’
उनले यति भनेपछि हलमा नाराबाजी सुरू भयो। आफ्ना प्रतिनिधि धेरै भएकाले सिंगो हलले विरोध गरेको ढकाल पक्षको दाबी छ।
यही क्रममा यसपटक ढकाल पक्षबाट जिल्ला कमिटी उपाध्यक्षको उम्मेद्वार बन्ने तयारीमा रहेका सागर थापा नारा लगाइरहेका थिए। मञ्चमा बसेका एमाले उपाध्यक्ष गुरु बरालले उनलाई रोक्न खोजे। ‘सागर, ए सागर, यो भएन। यो त अराजकता भयो,’ उपाध्यक्ष बरालले भने।
उनले यसो भन्नासाथ अर्का कार्यकर्ता भोला बराल जुरुक्क उठे र उपाध्यक्ष बरालको प्रतिवाद गरे, ‘कार्यकर्ताले बोल्नासाथ अराजकता हुन्छ? नेताले जे पायो त्यही गर्दा अराजकता हुँदैन?’
उपाध्यक्ष बराल नाजबाफ जस्तै भए। आफ्नै सहोदर भाइले त्यसरी प्रतिवाद गरेपछि उपाध्यक्ष बराल मौन रहे। नारा लागिरह्यो।
केहीबेरमा बन्दसत्र स्थगित भयो। सोमबार बिहानैबाट निर्वाचन कार्यक्रम सुरू हुने तय थियो। तर, मनोनित प्रतिनिधि विवाद कायमै रहेपछि ढिलोगरी कार्यक्रम सुरू भयो।
केहीबेर अघि प्रतिनिधिको नामावली प्रकाशित भएको छ। मनोनीत भएका ती ४६ जनाकै नाम राखेर नामावली प्रकाशित भएपछि संस्थापन इतर (ढकाल) पक्षले असन्तोष प्रकट गरेकोछ। यद्यपि अहिले मनोनयन दर्ता चलिरहेको छ।
निर्वाचन कमिटीले टाँस गरेको सूचनाअनुसार, १० औं जिल्ला अधिवेशनमा भूगोलतर्फ ७४५, जनसंगठनतर्फ १२० र मनोनित ४६ गरी जम्मा ९११ प्रतिनिधि कायम भएका छन्।
निर्वाचन सम्पन्न गर्न एमाले केन्द्रीय निर्वाचन आयोगका सदस्य समीर नेपालको नेतृत्वमा वरिष्ठ अधिवक्ता सुरेशलाल श्रेष्ठको संयोजकत्वमा सात सदस्यीय निर्वाचन कमिटी बनाइएको छ।
पार्टी अध्यक्ष केपी शर्मा ओलीको सन्देश भन्दै उपाध्यक्ष रामबहादुर थापा बादलले उद्घाटन सत्रमा आएर ‘गुटबन्दी सह्य नहुने’ भन्दै सहमतिमा नेतृत्व चयन गर्न निर्देशन दिएका थिए।
उपाध्यक्ष गुरू बराल, उपमहासचिव प्रदीप ज्ञवाली, प्रदेश इन्चार्ज शेरधन राई, कोशीका मुख्यमन्त्री हिक्मत कार्की, प्रदेश अध्यक्ष घनश्याम खतिवडा, अर्का नेता भानुभक्त ढकाल, ऋषिकेश पोखरेल सबैले सहमतिमा नेतृत्व छान्नुपर्ने भन्दै निर्वाचन रोक्ने कसरत गरेका थिए।
यो टिमले प्रदेशका पूर्वसांसद राजकुमार ओझालाई अध्यक्षका रूपमा अघि सार्ने तयारी गरिरहेको छ। ओझाको नाममा सहमति गर्न यो समूहले गरेको प्रयास नेता विनोद ढकालले अस्वीकार गरेका छन्।
ढकाल टिमले उपाध्यक्षमा अघि सार्न खोजेका सागर थापालाई केही महिनाअघि मात्रै संस्थापन टिमले पार्टीको साधारण सदस्यबाटै हटाउने कारवाही गरेको थियो।
विराटनगरको मानगढ खानेपानीमा पार्टीले भनेभन्दा फरक व्यक्तिलाई उम्मेदवार बनाएको आरोपमा उनलाई जिल्ला संगठन कमिटीका अध्यक्ष बाबुराम कार्कीले कारबाही गरेका थिए।
अधिवेशनबाट कार्की जिल्ला अध्यक्ष बन्ने दौडमा थिए। तर, थापा लगायतलाई कारबाही गर्न परिचालन गरिएका कार्कीलाई संस्थापन पक्षले अध्यक्षको उम्मेद्वार नबनाउने भएको छ।
ढिलोगरी निर्वाचन कार्यक्रम सुरु भएको एमाले मोरङमा निर्वाचन भने अनिश्चित रहेको नेताहरू बताउँछन्।
‘आफ्नो मार्गदर्शक सिद्धान्त मान्ने ‘जनताको बहुदलीय जनवाद’ (जबज) ले आन्तरिक तथा बाह्य प्रतिस्पर्धा र त्यसमार्फत श्रेष्ठता हासिल गर्नुपर्ने मान्यता राख्छ,’ ढकाल पक्षमा प्रतिनिधि देशबन्धु ढकालले भने ‘हामी सोही मान्यतामा अडिग रहेर निर्वाचनबाट नेतृत्व चयन हुनुपर्छ भन्नेमा छौं।’
यसअघि ‘सहमतिमै नेतृत्व चयन गर्ने’ भन्दै कोशी प्रदेशका झापासहितका जिल्लाहरूमा एक हप्तासम्म अधिवेशनको बन्द सत्र लम्ब्याइएको थियो।
झापामा अध्यक्ष केपी शर्मा ओलीले भनेकै मान्छेलाई अध्यक्ष र सचिव बनाउन एक हप्तासम्म बन्द सत्र स्थगित गरिएको थियो।
उदयपुर, तेह्रथुम सहितका जिल्लामा भने चुनाव हुँदा संस्थापन पक्षका धेरैले पराजय सहेका थिए।
‘प्रतिष्पर्धामार्फत् श्रेष्ठता हासिल गर्न पाउनु जबजले गरेको सुन्दर व्यवस्था हो’, ढकालले भने, ‘प्रतिस्पर्धामा उत्रिनै नदिने तयारीमा नेताहरु लागेको देखिन्छ, त्यो राम्रो हुँदैन।’
