कोशी प्रदेश सभाको आइतबारको बैठकमा 'केही प्रदेश ऐनलाई संशोधन गर्न बनेको अध्यादेश, २०८१ लाई प्रतिस्थापन गर्न बनेको विधेयक' सर्वसम्मतिले पारित भएको छ।
सभामुख अम्बरबहादुर विष्टले उक्त विधेयक निर्णयार्थ प्रस्तुत गर्दा सर्वसम्मतिले पारित भएको हो।
कोशी प्रदेश सरकारका आन्तरिक मामिला तथा कानुनमन्त्री रेवतीरमण भण्डारीले सो विधेयक पेस गरेका थिए। मन्त्री भण्डारीले प्रदेशमा संकटग्रस्त सहकारी संस्थालाई समिति बनाएर हस्तान्तरण, निजामती कर्मचारी ऐनमा भएको प्राविधिक त्रुटि सच्याउन र विपदका कारण क्षति भएका संरचना पुनः निर्माण गर्न यो विधेयक आवश्यक रहेको जानकारी दिए।
त्यस्तै शून्य समयमा कोशी प्रदेश सभा सदस्य विनोद राई, गोबिन्द गिरी, गणेशप्रासद उप्रेती, सपना दर्जी, प्रेमराज थाम्सुङ, गोपालबहादुर विश्वकर्मा, कमलप्रसाद जवेगु र राधाकृष्ण खनालले आ–आफ्ना निर्वाचन क्षेत्रमा रहेका समस्याबारे सदनको ध्यानाकर्षण गराएका थिए।
प्रदेश सभाको अर्को बैठक सोमबार बिहान ११ बजे बस्नेछ।
