९ महिनाभन्दा लामो समयदेखि संगठन कमिटीका भरमा चलिरहेको नेकपा (एमाले) मोरङको नयाँ नेतृत्व चयनका लागि १० औं जिल्ला अधिवेशन शनिबार सुरु भएको छ।
प्रधानमन्त्रीसमेत रहेका पार्टी अध्यक्ष केपी शर्मा ओलीले उद्घाटन गर्ने भनेर प्रचारित कार्यक्रममा ओली भने अनुपस्थित रहे। तर, उनकै शब्दमा ‘अध्यक्ष ओलीको सन्देश लिएर’ उपाध्यक्ष रामबहादुर थापा बादल शनिबार विराटनगर आएका थिए।
जिल्ला अधिवेशन उद्घाटनका क्रममा थापाले केन्द्रीय कमिटीको सन्देश भन्दै ओलीको सन्देश कार्यकर्तामाझ सुनाए। ‘म अध्यक्षको सन्देश लिएर यहाँ आएको छु’, थापाले भने ‘ पार्टी अध्यक्षको सन्देश छ प्यानलको रूपमा उम्मेदवार खडा गरे गुटबन्दी गर्ने छुट कसैलाई छैन। अधिवेशनमा प्यानल खडा हुनु गुटबन्दीलाई संस्थागत गर्नु हो। सहमतिबाटै नेतृत्व चयन गर्नु पर्छ।’
थापासहित ९ जना पुरुष नेताहरुले पालैपालो बोलेको उद्घाटन समारोहमा महिला वक्ता गयल पारिएको थियो। ती सबै वक्ताहरुले जोड दिएर ‘गुटबन्दी सह्य नहुने, सहमतिबाटै नेतृत्व चयन हुनुपर्ने’ बताए। उपाध्यक्ष बादलले ‘गुटबन्दी पार्टीभित्र वर्जित छ’ भन्दै अध्यक्ष ओलीको निर्देशन र इच्छा सुनाइदिए।
कोशी प्रदेशका अरु १३ जिल्लामा अधिवेशन भइसकेको एमालेको मोरङमा भने संगठन कमिटीले काम गरिरहेको थियो। निर्वाचित कमिटी नभएको र अर्को कमिटी बनिनसकेको अवस्थामा उपल्लो कमिटीले संगठन कमिटी बनाउने एमालेमा वैधानिक प्रावधान छ। सोही अनुसार तत्कालीन मोरङ अध्यक्ष ऋषिकेश पोखरेलले अध्यक्ष छाडेपछि उपाध्यक्ष बाबुराम कार्कीलाई अध्यक्ष बनाएर गएको जेठमा एमालेले संगठन कमिटी बनाएको थियो। बेलैमा अधिवेशन हुन नपाएको मोरङ एमालेभित्र अध्यक्ष ओलीले चाहेजस्तो ‘प्रतिस्पर्धा वर्जित’ हुने अवस्था भने छैन।
कुनैबेला ओलीकै विश्वास पात्र रहेका र पछिल्लो समय पूर्व राष्ट्रपति विद्या भण्डारीनिकट मोरङकै नेता विनोद ढकाल समूह र संस्थापन समूहबीच जिल्लामा प्रतिस्पर्धाको अवस्था छ।
गत वर्षको असोजमा घनश्याम खतिवडासँग प्रदेश अध्यक्षमा पराजित भएका ढकाल मोरङ एमालेको संगठनमा प्रभाव भएका नेता मानिन्छन्। जिल्लामा आफ्नो प्रभाव कायमै रहेको सन्देश दिन पनि ढकाल पक्ष जसरी पनि निर्वाचनमा जाने योजनामा छ। यद्यपि संस्थापन पक्ष भने ‘गुटबन्दी वर्जित’ छ भन्दै प्रतिस्पर्धा नै रोक्न लागेको छ।
अहिले एकातिर केन्द्रदेखि प्रदेशसम्मका हेभिवेट नेताहरुको एउटा टिम र अर्कातिर विनोद ढकाल एक्लैको अर्को टिम चुनावी मैदानमा जाने तयारीमा छ। सहमतिको प्रयासमा रहेका नेताहरुको प्रयास निष्कर्षमा नपुगे यसपटक बहुसंख्यक नेताहरुको टिम भर्सेस विनोद ढकाल समूहबीचको प्रतिस्पर्धा मोरङ एमालेमा हुनेछ।
संस्थापन पक्षले पूर्व प्रदेश सांसद राजकुमार ओझालाई अध्यक्षका रुपमा अघि सार्ने लगभग तय गरेको छ भने ढकाल समूहले जिसस मोरङका प्रमुख अजम्बर राईलाई अध्यक्षका रुपमा अघि सार्ने तयारी गरेको छ। यद्यपि दुवै समूहले अहिलेसम्म औपचारिक रुपमा उम्मेद्वार घोषणा गरेका छैनन्।
संगठन कमिटी अध्यक्ष बाबुराम कार्की संस्थापन पक्षबाट आफै उम्मेद्वार हुने बताइरहेका छन्।
ओली टिमको प्रतिनिधित्व गर्ने पार्टीका कोशी इन्चार्ज एवम् पूर्व मुख्यमन्त्री शेरधन राई, एमाले कोशी अध्यक्ष घनश्याम खतिवडा लगायतका नेताहरु राजकुमार ओझालाई अध्यक्षको रुपमा अघि सार्ने तयारीमा छन् । उनीहरुको योजनालाई मुख्यमन्त्री हिक्मत कार्की, जीवन घिमिरे लगायतका नेताहरुको पनि साथ रहेको छ । यो टिमले जिल्ला उपाध्यक्षमा शान्ति लिम्बू र सचिवमा रविन थापालाई अघि सार्ने तयारी गरेको छ।
संस्थापन समूहमै रहेर पनि कोशीमा फरक समूहको नेतृत्व गरिरहेका नेता ढकालका लागि मोरङ अधिवेशन पार्टीभित्रको आफ्नो शक्ति परीक्षणको निर्णायक घडी बनेर उपस्थित छ। अघिल्लो वर्ष सम्पन्न प्रदेश अधिवेशनबाट ढकालले कोशीमा ओली समूहका नेताहरुलाई चुनौती दिएयता उनी प्रदेशमा फरक समूहको नेता बनेर अघि बढिरहेका छन्। कोशीका सबै जिल्लामा अधिवेशन भइसक्दा केही जिल्लामा ढकालले समर्थन गरेका उम्मेद्वारहरुले जित हात पारेका छन्। गृहजिल्ला मोरङमा पनि आफ्नो प्रभाव बलियो तुल्याउन यो समूह लागिपरेको छ।
कोशीमा पूर्व मुख्यमन्त्री शेरधन राई, हालका मुख्यमन्त्री हिक्मत कार्की, भानुभक्त ढकाल, ऋषिकेश पोखरेल, घनश्याम खतिवडासहितका नेताहरुसँग एक्लै भिडिरहेका ढकाल पक्षले ६० प्रतिशतभन्दा बढी प्रतिनिधि आफ्नो समूहको रहेको दाबी गर्दै आएको छ।
ढकाल पक्षले उपाध्यक्षमा सागर थापा र सचिवमा सोम थापालाई अघि सार्ने सम्भावना छ।
‘इमान्दार कार्यकर्ता भर्सेस पार्टीका बेइमान नेताहरुबीचको प्रतिस्पर्धा मोरङमा छ’, ढकाल पक्षका नेता सागर थापाले भने ‘कार्यकर्तालाई पेल्ने, कारवाही गर्ने नेताहरुलाई कार्यकर्ताले यसपटक देखाउने आत्मविश्वास छ।’ थापा यसअघि विराटनगर महानगर अध्यक्ष थिए।
तर, विराटनगरकै एउटा खानेपानी आयोजनाको चुनावमा फरक व्यक्तिलाई समर्थन गरेको आरोपमा थापालाई एमालेको जिल्ला संगठन कमिटीले उनलाई पार्टी सदस्यबाटै हटाएको थियो। कारवाही फुकुवा भएपछि ढकाल पक्षका उनीसहितका नेताहरु चुनावबाटै नेतृत्व चयन हुनुपर्ने अडानमा छन्।
