राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले स्थानीय तहमा प्रमुख प्रशासकीय अधिकृत नपठाउँदा कर्मचारीको तलब रोकिएको बताएका छन्।
प्रतिनिधि सभाको मंगलबारको बैठकमा बोल्दै सांसद शाहीले काठमाडौं महानगरपालिकामा सरसफाइ गर्ने कर्मचारीले तलब खान नपाएको बताएका हुन्।
‘गाउँ-गाउँमा सिंह गयो, दरबार गएन। ओली सरकारबाट जनताको कहिल्यै पनि भलो भएन। आज काठमाडौं महानगरपालिका लगायत सबै नगरपालिका, धेरैभन्दा धेरै गाउँपालिकामा प्रमुख प्रशासकीय अधिकृत ठप्प रोकेर राखिएको छ। सबै शिक्षक, कर्मचारीहरू सबका सब ठप्प छन्। काठमाडौं महानगरपालिकामा आज सरसफाइ गर्ने कर्मचारीले तलब खान पाएका छैनन्। ओली सरकारलाई त्यसको पाप लाग्ला,’ उनले भने।
जुम्लामा पनि त्यही हालत रहेको भन्दै उनले ८३ हजार ५५८ जना निजामती कर्मचारी नेताको घरमा चाकडी गर्न, घरदैलो अभियान गर्न नियुक्ति गरिएको हो भन्दै प्रश्न गरे।
‘म भन्न चाहन्छु यदि सरकारलाई त्यो लाग्छ भने अब आउने स्थानीय तह निर्वाचनमा...चुनाव किन गराएको? आफ्नो आसेपासे कार्यकर्तालाई टीका लगाएर, अबिर जात्रा गरेर घोषणा गरिदिनूस्। आज देशभरि हालत बेहाल बनाइएको छ। आज देशका सबै प्रमुख प्रशासकीय अधिकृत यहाँबाट रोकेर ठप्प बनाइएको छ। यसको घोर भर्त्सना गर्न चाहन्छु,’ उनले भने।
उनले वित्तीय समानीकरण अनुदान काटिएको भन्दै त्यसलाई निरन्तरता दिन पनि आग्रह गरे।
