टेस्लाका मालिक एलन मस्क अमेरिकी राष्ट्रपति डोनाल्ड ट्रम्पले भर्खरै बनाएको डिपार्टमेन्ट अफ गभर्नमेन्ट एफिसियन्सी (डोज) को प्रशासक वा कर्मचारी केही पनि होइनन् भनेर ह्वाइट हाउसले स्पष्ट पारेको छ।
ट्रम्पले गत नोभेम्बरमा भएको चुनावअघि नै सरकारी सेवालाई चुस्त बनाउन मस्कको नेतृत्वमा एउटा निकाय बनाउने घोषणा गरेका थिए। चुनाव जितेपछि नोभेम्बरमै सो विभागको घोषणा गर्दा उनले मस्क त्यसको प्रमुख भनेर खुलाएका थिए।
सो विभागले युएसएड लगायत धेरै अमेरिकी सरकारी कार्यालयमा वितण्डा मच्चाएको छ। हजारौं सरकारी कर्मचारीलाई निष्कासन गरेको छ भने अर्बौं डलरको सरकारी बजेट रोकेको छ। त्यसैले अहिले डोज र मस्कविरूद्ध धेरै मुद्दा परेका छन्।
विश्वका सबभन्दा धनी मान्छे र अमेरिकी सरकारका विभिन्न निकायसँग अर्बौं डलरको करार भएका कम्पनीहरूका मालिक मस्कलाई चुनाव नलडी र संसदीय सुनुवाइ पनि नगरिकन त्यति शक्तिशाली पद दिइएको भनेर धेरैले विरोध गरेका छन्।
डोजको आफ्नै कानूनी अधिकार र हैसियत पनि स्पष्ट नभएकोमा व्यक्तिगत रूपमा स्वार्थको द्वन्द्व भएका मस्कले अधिकार मिचेर अरू निकायमा हस्तक्षेप गरेपछि उनी लगायत सो विभागका धेरै अधिकारीमाथि मुद्दा परेको छ।
न्यू मेक्सिको राज्यले मस्क लगायतमाथि एक संघीय अदालतमा दायर गरेको त्यस्तै एक मुद्दामा लिखित जबाफ पठाउँदै मस्क डोजको प्रशासक वा कर्मचारी केही पनि होइनन् भनेर ह्वाइट हाउसले स्पष्ट पारेको छ।
‘ह्वाइट हाउसका अरू वरिष्ठ सल्लाहकारहरू जस्तै मस्कसँग पनि सरकारी निर्णय आफै गर्ने वास्तविक वा औपचारिक अधिकार छैन,’ ह्वाइट हाउसको प्रशासन कार्यालयका निर्देशक जोशुआ फिसरले हस्ताक्षर गरेको सो दस्तावेजले जोड दिएको छ।
संघीय अदालतलाई पठाएको कानूनी दस्तावेजमा उनको कुनै अधिकार छैन भनिए पनि गत हप्ता एक अन्तर्वार्तामा ट्रम्पले सरकारी निकायहरूलाई प्रभावकारी बनाउने काममा मस्कले ठूलो सहयोग गरेको बताएका थिए। छिट्टै नै मस्कलाई शिक्षा मन्त्रालयमा पनि धावा बोल्न लगाउने पनि उनले जनाएका थिए।
पहिले ट्विटर भनिने सामाजिक सञ्जाल एक्स पनि किनेका मस्कले ट्रम्पलाई चुनाव जिताउन २५ करोड डलरभन्दा बढी खर्च गरेका थिए।
आफ्नो सामाजिक सञ्जाल एक्सलाई पनि ट्रम्पको समर्थनमा परिचालन गरेका थिए। चुनावपछि पनि दिनको करिब दुई हजार डलर खर्च गरेर मस्क ट्रम्पको फ्लोरिडास्थित मर-आ-लागो रिसोर्टमा ट्रम्पसँगै बसेका थिए।
मस्कको गुन तिर्न ट्रम्पले उनलाई डोजको प्रमुखमा नियुक्त गरेका हुन्। ट्रम्पले मन्त्री चयन गर्नेदेखि लिएर विदेशी सरकार प्रमुखहरूसँगको छलफलमा पनि मस्क सहभागी भएका थिए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
