अमेरिकी राष्ट्रपति डोनाल्ड ट्रम्पलाई दोस्रो कार्यकालमा नोबेल शान्ति पुरस्कार जित्ने उत्कट इच्छा छ।
ट्रम्पको पहिलो कार्यकालभन्दा अघिका राष्ट्रपति बाराक ओबामाले केही नगरी नोबेल पुरस्कार पाएको, आफूले भने मध्यपूर्वमा 'अब्राहम' सम्झौता गराउँदा पनि नपाएको भनेर उनले अहिलेसम्म गुनासो गर्छन्।
रूस र युक्रेनको युद्ध रोक्न सके वा इरानसँग सम्झौता गरेर मध्यपूर्वमा स्थायी शान्ति स्थापना गर्न सके नोबेल पुरस्कार जित्ने उनको ठम्याइ रहेको मानिन्छ।
त्यसैले गाजामा र युक्रेनमा युद्ध रोक्न उनले उट्पट्याङ खाले सर्त पनि अघि सारेका छन्।
युद्ध रोकेर नोबेल पुरस्कार पाउने उनको धोको पूरा गर्न उनले लामो समय अघि देखिका मित्र स्टिभ विट्कफलाई खटाएका छन्।
मध्यपूर्वका लागि दूत बनाएका अर्बपति विट्कफले ट्रम्पले कार्यभार सम्हालन अघि नै सफलता दिलाइसकेका छन्।
विट्कफले नै इसराइली प्रधानमन्त्री बेन्जामिन नेतन्याहुलाई दबाब दिएर हाल गजामा जारी रहेको युद्ध विरामका लागि राजी पारेका थिए।
ट्रम्प अघिका राष्ट्रपति जो बाइडेनले धेरै अघिदेखि युद्ध विराम गराउन खोजे पनि नेतन्याहुले मानेका थिएनन्। तर ट्रम्पको सन्देश लिएर जनवरीमा इसराइल पुगेका विट्कफले ट्रम्पको शपथ ग्रहणअघि नै बाइडेनले राखेका सर्तमा नै युद्ध विराम गर्न नेतन्याहुलाई राजी गराए।
विट्कफको पद खासमा मध्यपूर्वका लागि दूत भए पनि रूस-युक्रेन वार्तामा उनी नै प्रमुख वार्ताकार भएको अमेरिकी मिडियाहरूले लेखेका छन्।
रूससँगको वार्तामा अमेरिकी विदेश मन्त्री मार्को रूबियोभन्दा पनि उनी शक्तिशाली हुने मानिन्छ। गत हप्ता विट्कफ आफै रूस गएर अमेरिकी शिक्षक मार्क फोगललाई छुटाएका थिए।
७८ वर्षीय ट्रम्प र उनीभन्दा ११ वर्ष कान्छा विट्कफको सम्बन्ध १९८० को दशकको मध्यतिर सुरू भएको हो। त्यतिबेला ट्रम्प न्यू योर्कमा उदाउँदा ‘बिल्डर’ थिए र विट्कफ रियल इस्टेट वकिल थिए। दुई जना सँगै गल्फ खेल्ने र खाना खाने गर्थे। त्यति बेलादेखि नै विट्कफलाई ट्रम्पले सौदा गर्ने मामलामा आफूजस्तै अब्बल मान्छन्।
ट्रम्पले विट्कफलाई प्रमुख वार्ताकार बनाउनुको मुख्य कारण उनले अरू जस्तो कामको जस लिन खोज्दैनन्। जसका कारण सबै सफलताको जस ट्रम्पले लिन पाउने छन्।
विट्कफ छुच्चा ट्रम्पका फरासिला वार्ताकार भनेर अमेरिकी अनलाइन एक्सियसले लेखेको छ।
उनले जे डी भान्सलाई उपराष्ट्रपतिको उम्मेदवार छान्न र रूबियो लगायतलाई मन्त्री चयन गर्न ट्रम्पलाई सल्लाह दिएकाले वार्तामा उनको प्रमुख भूमिकाका कारण रूबियो र अरू अधिकारीलाई केही समस्या नहुने एक्सियसले जनाएको छ।
चुनाव प्रचारका क्रममा ट्रम्पमाथि गोली प्रहार भएपछि आत्तिएका ट्रम्पले धेरै पटक विट्कफको निजी जेट विमान प्रयोग गरेको मानिन्छ।
ट्रम्पको इरानप्रति आक्रामक नीति छ। पहिलो कार्यकालमा इरानले चलाउने 'एक्सिस अफ रेजिस्टेन्स' को नेतृत्व गर्ने इरानको इस्लामिक रिभोलुसनरी गार्ड कोर (आइआरजिसी) को कुर्दस् फोर्सका प्रमुख कासिम सुलेमानीलाई मार्ने आदेश पनि उनले नै दिएका थिए। त्यसैले चुनाव प्रचारका क्रममा इरानले ट्रम्पलाई मार्न षड्यन्त्र गरिरहेको भनेर अमेरिकी खुफिया संस्थाहरूले उनलाई सजग पारेका थिए। त्यसैले आफ्नो निजी जहाज चिनेर इरानले खसाल्ला भन्ने डरका कारण धेरै पटक कसैलाई थाहा नदिई ट्रम्पले सुटुक्क विट्कफको निजी विमानको प्रयोग गरेको मानिन्छ।
ट्रम्प रिपब्लिकन पार्टीको तर्फबाट राष्ट्रपतीय उम्मेदवार छानिएपछि विट्कफले नै ट्रम्प र पार्टीको प्राइमरीको बेलाका उनका कट्टर प्रतिद्वन्द्वी फ्लोरिडाका गभर्नर रन डिसान्टिस र संयुक्त राष्ट्रसंघका लागि पूर्वअमेरिकी राजदूत निक्की हेलीसँग सुलह गराएको मानिन्छ।
इसराइल-हमासको युद्ध विराम गराउने क्रममा सामेल अरब वार्ताकरको हवाला दिँदै विट्कफ नै ट्रम्पका सच्चा प्रतिनिधि रहेको र सम्झौता उनीसँग मात्रै हुन सक्ने भनेर एक्सियसले लेखेको छ।
रूस र युक्रेनको युद्ध रोक्ने सम्झौता भए अन्त्यमा ट्रम्प र रूसी राष्ट्रपति भ्लादिमिर पुटिन नै सहभागी हुने छन्। तर त्यसको आधार तयार गर्न भने विट्कफकै मुख्य भूमिका हुनेछ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
