नेकपा (एमाले)का महासचिव शंकर पोखरेलले सरकारले ल्याएको अध्यादेशको विरोध गरेर पारित हुनबाट नरोकिने बताएका छन्।
शुक्रबार पार्टी केन्द्रीय कार्यालय च्यासलमा आयोजित अन्तरक्रिया कार्यक्रममा महासचिव पोखरेलले अध्यादेशको विरोध भयो भनेर पारित गर्ने कोशिस असफल नहुने बताएका हुन्।
'अनेक विकल्पहरु छन् । विकल्प प्रयोग गरेर भएपनि हामी त्यसलाई राज्यको कानूनमा ढालिहाल्छौँ । यद्यपि अध्यादेश आफैमा कानून हो । प्रयोगमा आइसकेको छ,' उनले भने।
पोखरेलले सरकारले देशको अर्थतन्त्र चलायमान बनाउने र उद्योग क्षेत्रलाई प्रबर्द्धन गर्ने हिसावले अध्यादेश ल्याएको बताए। दुई प्रमुख राजनीतिक दलहरु नेपाली कांग्रेस र एमालेले सचेततापूर्वक अध्यादेश ल्याएको उल्लेख गर्दै जसरी पनि टुंग्याउने बताए।
'हामी त्यसलाई जसरी पनि टुंग्याउँछौँ । कसैले बिरोध गर्यो भनेर त्यो बिरोधले रोकिनेवाला छैन,' उनले भने।
(न्युज एजेन्सी नेपाल)
