उच्च अदालत तुलसीपुर बुटवल इजलासले सुप्रिम सहकारी ठगि प्रकरणमा पुर्पक्षका लागि कारागार चलान भएका पूर्वडिआइजी छविलाल जोशी बन्जाडेको कैफियत प्रतिवेदन झिकाउन आदेश गरेको छ।
गत सोमबार जिल्ला अदालत रुपन्देहीले जोशीलाई पुर्पक्षका लागि कारागार चलान गरेपछि उनी उच्च अदालत गएका थिए।
उच्च अदालत तुलसीपुर बुटवल इजलासका सूचना अधिकारी रामबहादुर कुँवरले मंगलबार जोशीको तर्फबाट उनका छोरा रोचक जोशीले दिएको निवेदनको सुनुवाई गर्दै उच्च अदालत तुलसीपुर बुटवल इजलासले कैफियत प्रतिवेदन झिकाउने आदेश गरेको जानकारी दिए।
‘जोशीको तर्फबाट उहाँको छोरा रोचक जोशीले निवेदन दिनुभएको थियो, सोही निवेदनमाथि सुनुवाई गर्दै उच्च अदालत तुलसीपुर, बुटवल इजलासका मुख्य भई काम गर्ने न्यायाधीश राजेश्वर तिवारीको एकल इजलासले कैफियत प्रतिवेदन माग्ने आदेश दिएको हो,’ सूचना अधिकारी कुँवरले भने।
न्यायाधीश तिवारीको आदेशपछि छिट्टै कैफियत प्रतिवेदन प्राप्त हुने र त्यसपछि संयुक्त इजलासमा मुद्दाको सुनुवाई हुने उनले बताए।
‘उच्च अदालत तुलसीपुर बुटवल इजलासले कैफियत प्रतिवेदन झिकाउने आदेश गरेको हो, जिल्ला अदालतबाट छिट्टै उपलब्ध हुन्छ र त्यसपछि मात्र थप प्रक्रिया अगाडि बढ्छ,’ कुँवरले भने।
बुटवलको सुप्रिम सहकारीको रकम ठगी गरेको मुद्दामा जिल्ला अदालत रुपन्देहीले गोर्खा मिडिया नेटवर्क प्रालिका उपाध्यक्ष समेत रहेका जोशीलाई पुर्पक्षका लागि कारागार चलान गर्ने निर्णय गरेको थियो।
यही मुद्दामा राष्ट्रिय स्वतन्त्र पार्टीका सभापति रवि लामिछानेलाई भने जिल्ला अदालते एक करोड रुपैयाँ धरौटी लिएर छोडेको थियो।
सहकारीका एक हजार ८३१ बचतकर्ताको ८६ करोड १८ लाख २३ हजार ७५४ रुपैयाँ हिनामिना गरेको अभियोगमा लामिछाने र जोशी सहित २२ जना विरुद्ध अदालतमा मुद्दा दर्ता भएको छ।
जोशीलाई यसअघि पोखराको सूर्यदर्शन सहकारीमा ८८ लाख र काठमाडौंको स्वर्णलक्ष्मी सहकारी ठगी मुद्दामा ५० लाख धरौटीमा रिहा गरिएको थियो। उनीविरूद्ध चितवनको सहारा सहकारीको रकम ठगीमा पनि मुद्दा दर्ता भइसकेको छ।
-1724404034-1727005455.jpeg)
-1742801159.jpg)
