राष्ट्रिय स्वतन्त्र पार्टी (रास्वपा) का सभापति रवि लामिछानेसहित चार जनालाई पुर्पक्षका लागि धरौटीमा छाड्ने आदेश बदर गरी थुनामा राख्न मागसहित उच्च अदालत पाटनमा निवेदन दायर भएको छ।
काठमाडौंको कालिमाटीस्थित स्वर्णलक्ष्मी बहुउद्देश्यीय सहकारीको बचत रकम अपचलनको कसुरमा धरौटीमा छाड्ने आदेश त्रुटिपूर्ण रहेको भन्दै उच्च सरकारी वकिलले आइतबार उच्च अदालत पाटनमा निवेदन दायर गरेको हो।
रवि लामिछानेसहित निवर्तमान लेखा समिति सदस्य सुनिता नेवा, वर्तमान कर्जा उपसमिति सदस्य कमल लामा र गोर्खा मिडिया नेटवर्क प्रालिका पूर्वसञ्चालक छविलाल जोशीविरूद्ध निवेदन दायर भएको हो।
जिल्ला अदालत काठमाडौंले रविलामिछानेसँग ६० लाख, छविलालसँग ५० लाख, सुनिता नेवासँग ४ लाख र कमल लामासँग ३ लाख धरौटी माग गरेको थियो। उनीहरू उक्त धरौटी तिरेर छुटिसकेका छन्।
उच्च सरकारी वकिल स्रोतका अनुसार २९ पाने निवेदन दर्ता भएको छ।
वकिलले निवेदन दिँदा विभिन्न प्रमाणहरूले गर्दा सहकारी ठगी र संगठित अपराध पुष्टि हुने उल्लेख गरेको छ।
‘उक्त सहकारीमा गोरखा मिडियाका प्रबन्ध निर्देशक रवि समेतले विभिन्न ऋण खाता खोलेर रकम प्राप्त गरेको देखिएको समेतबाट प्रतिवादी जिबी राई समेतको संगठित समूहले विभिन्न प्रलोभन देखाई आफूले सञ्चालन गरेको सहकारीमा बचतकर्ताहरूलाई आकर्षक व्याज प्रदान गर्ने भनेर रकम बचत गर्न लगाएको,’ निवेदनमा भनिएको छ।
‘उक्त रकम बेइमानीपूर्वक आफ्नो समूहले सञ्चालन गरेको रवि र छविलाल समेत विभिन्न कम्पनीहरूमा सहकारीको मूल्य, मान्यता, नियम विपरीत उक्त कम्पनीहरूमा बिना धितो ऋण, पेश्की लगायतका रकम प्रवाह गराई सो रकम आफ्नो व्यक्तिगत काममा आफ्नो अनुकूल खर्च गरी यी प्रतिवादीहरूले गोरखा मिडियाको आवरणमा सहकारी संस्थामा बचतकर्ताहरूले निक्षेप गरेको रकम आफ्नो कम्पनीमा लेराई ठगी गर्ने कार्यमा संलग्नता रहेको पुष्टि भएको देखिन्छ।’
वकिलले निवेदन दिँदा विभिन्न प्रमाणहरूले गर्दा सहकारी ठगी र संगठित अपराध पुष्टि हुने उल्लेख गरेको छ।
पहिलो, रवि लामिछानेले गोर्खा मिडिया नेटवर्क प्रालिको सञ्चालक समिति समक्ष सेयर खरिद गरी पाऊँ भनेर निवेदन दिएका थिए। मिडियाको २०७७ चैत २० गते बसेको बैठकमा जगेडामा रहेको सेयरमध्ये एक लाख ८० हजार सेयर लामिछानेलाई खरिद गर्ने अनुमति दिने निर्णय भएको उल्लेख छ।
१६ प्रतिशत सेयर खरिद गरी कम्पनीको सञ्चालक समितिको २०७८ असोज २३ गते बसेको बैठकले कम्पनीको बाँकी कार्यकालको लागि सञ्चालकमा नियुक्त गर्ने निर्णय गरेर लामिछाने प्रबन्ध निर्देशक तथा सञ्चालक भएर काम गरेका थिए।
लामिछानेले २०७९ असार १ गते सम्पूर्ण सेयर जिबी राईलाई बिक्री गरी त्यसबापतको एक करोड ८० लाख रुपैयाँ नगद बुझी लिएको भर्पाइ कागज समेत गरी राजीनामा स्वीकृत गरी पाऊँ भनेर समितिमा पेस गरेका थिए। उक्त समितिले बैठक बसेर निर्णय समेत गरेको प्रमाण सरकारी वकिल कार्यालयले पेस गरेको छ।
दोस्रो, ग्लोबल आइएमई बैंकमा लामिछाने, छविलाल जोशी र जिबी राईमध्ये कुनै एक जनाको हस्ताक्षर र कार्यालय छापबाट सञ्चालन हुने गरी खाता समेत खोलिएको उल्लेख छ। उक्त खाता सन् २०२० अक्टोबर २२ (२०७७ कात्तिक ६) मा खोलेको देखिएको भनिएको छ।
नबिल बैंकमा रहेको बैंक खाता भने रवि र जिबी दुबै जनाको अनिवार्य हस्ताक्षर र कार्यालयको छापबाट सञ्चालन भएको प्रमाणमा उल्लेख गरेको छ।
तेस्रो, ग्लोबल आइएमई बैंकबाट जारी भएका चेकहरूमार्फत् स्वर्णलक्ष्मी बहुउद्देश्यीय सहकारी संस्थाको नाममा चेक काटेर भुक्तानी गरेको हुँदा पनि लामिछानेलाई पुर्पक्षका लागि थुनामा पठाउनुपर्ने माग उच्च सरकारी वकिलले गरेको छ।
‘गोरखा मिडिया नेटवर्क प्रा.लि.को ग्लोबल आइएमई बैंकमा रहेको खाताबाट जारी भएको प्रतिवादी रवि लामिछानेको हस्ताक्षर रहेको चेकमार्फत् स्वर्णलक्ष्मीको नाममा काटिएको देहायका १६ थान चेकहरूबाट जम्मा नगद ९० लाख १६ हजार ६६० रुपैयाँ सहकारीलाई भुक्तानी गरेको देखिन्छ,’ निवेदनमा प्रस्तुत गरिएको छ।
त्यस्तै, सोही बैंक खातामा स्वर्णलक्षमीको नामबाट सिधै निक्षेप हुने गरी दुई करोड ६५ लाख रुपैयाँ आएको थियो। जसमध्ये दुई करोड ४० लाख रवि लामिछाने सेयर सदस्य तथा प्रबन्ध निर्देशक हुँदा प्रत्यक्ष रूपमा निक्षेप हुन आएको पनि निवेदनमा उल्लेख गरेको छ।
चौथो, ग्लोबल आइएमई बैंककै खाताबाट सन् २०२० नोभेम्बर १९ देखि २०२२ जुलाई २४ बीच रविको हस्ताक्षरबाट ८२० वटा चेकहरू विभिन्न शीर्षकमा जम्मा ४९ करोड १८ लाख ४१ हजार २४६ रुपैयाँको वित्तीय कारोबार गरेको सरकारी वकिलले जिकिर गरेको छ।
‘सहकारीमा जाहेरवालाहरू समेतले बचत गरेको रकम ठगी गरी अवैध रूपमा गोरखा मिडियाको बैंक खातामा रकमान्तर गरी गराई यी प्रतिवादी लामिछानेले अवैध रूपमा प्राप्त भएको रकम हो भन्ने कुरा जानीजानी प्रयोग गरी/धारण गरी वित्तीय कारोबार गरेको देखिन्छ,’ निवेदनमा उल्लेख छ।
त्यसैगरी पाँचौंमा २०२० सेप्टेम्बर १३ देखि २०२४ फेब्रुअरी १४ बीच रवि र अन्य सञ्चालकहरूबाट जम्मा १२३७ वटा चेकबाट ५९ करोड ४९ लाख ४४ हजार ९५५ रुपैयाँको चेक जारी भएको जनाएको छ।
छैटौंमा, स्वर्णलक्ष्मीको जिसिएस बैंकिङ सफ्टवेयर सिस्टममा पनि रवि र जिबीको नाममा ऋण खाता भेटिएको हो। जसबाट २०७८ भदौ ४ गते फोरह्विलर लोनका लागि १४.७५ प्रतिशत ब्याजदरमा ३२ लाख २१ हजार ६३३ रुपैयाँ र २०७८ मंसिर १ गते इको सेभेन सिटर भ्यानको लागि १४.७५ प्रतिशत ब्याजदरमा ५६ लाख ४८ हजारको ऋण लिएको हुँदा पनि लामिछानेलाई थुनामै राख्न माग गरेको हो।
उक्त सफ्टवेयरबाटै रवि र जिबीको संयुक्त ऋण खाताको प्रमाण फेला परेको थियो।
‘लामिछानेले गोरखा मिडियाको नाममा ग्लोबल बैंकको खाताबाट जारी भएको चेकमार्फत् स्वर्णलक्ष्मी सहकारीको कुमारी बैंकमा रहेको खातामा भुक्तानी गरेको र सो रकम भुक्तानी भएपछि लामिछाने र जिबीको स्वर्णलक्ष्मी सहकारीमा रहेको ऋण खातामा जनाई हिसाब मिलान गरिएको अनुसन्धानको क्रममा संकलन भएको मिसिल संलग्न कागजातहरूबाट स्पष्ट रूपमा देखिएको हुँदा लामिछानेले स्वर्णलक्ष्मी सहकारीको रकम अपचालन गरी ठगी गरेको कुरा स्पष्ट रूपमा देखिएको छ,’ सरकारी वकिलले भनेको छ।
जिबी र रविको नाममा खोलिएको ऋण खाताबाट विभिन्न शीर्षकमा ८२ लाख ९७ हजार ६ सय पेश्की एवं ऋण स्वरूपमा लिएको रकमको चेकमा रवि आफैले सही गरेर सहकारीलाई फिर्ता गरेको पनि उल्लेख छ। यसरी रविले संगठित रूपमा ठगी गरेको जिकिर गरेको छ।
