ताप्लेजुङको पाथीभरा (मुक्कुम्लुङ) क्षेत्रमा केबलकार निर्माणलाई लिएर उत्पन्न विवादमा सरकारी वार्ता टोली र स्थानीय संघर्ष समितिबीच ६ बुँदे सहमति भएको छ।
यो सहमतिसँगै गत माघ १५ देखि कोशी प्रदेशका ९ जिल्लामा जारी यातायात बन्द स्थगन गरिएको छ। अहिलेलाई केबलकार स्टेसन माथिको निर्माण कार्य स्थगन गरी स्टेसनका सन्दर्भमा आगामी वार्तामा विस्तृत छलफल गर्न सरकारी पक्ष तयार भएको छ।
मंगलबार लगभग दिनभरि भएको वार्तापछि यस्तो सहमति भएको हो। यसअघि सोमबार पनि दुई पक्षबीच सात घन्टाभन्दा बढी वार्ता भएको थियो।
दुई पक्षबीच भएको सहमतिअनुसार सरकारले आन्दोलन क्रममा घाइते भएकाहरूको नि:शुल्क उपचार गर्नेछ।
त्यस्तै, २०८१ माघ १२ गते भएको घटनामा छानबिन गरी कानुनी कारबाही गर्ने, आन्दोलन क्रममा थुनामा रहेकाहरूको बिनासर्त तत्काल रिहाइ प्रक्रिया सुरू गर्ने सहमति भएको छ।
केबलकार निर्माणमा रहेका असहमतिबारे विस्तृत छलफल गर्न अर्को वार्ता माघ २७ गते बिहान ११ बजे बस्न पनि दुवै पक्ष सहमत भएका छन्।
सरकारले मुक्कुम्लुङ क्षेत्रमा केबलकार निर्माण क्रममा उत्पन्न विवाद समाधानका लागि सम्बद्ध पक्षहरूसँग वार्ता गर्न गृह मन्त्रालयका सहसचिव प्रेमप्रसाद भट्टराईको संयोजकत्वमा वार्ता टोली गठन गरेको थियो।
-1742801159.jpg)
