स्थानीय तह उपनिर्वाचनअन्तर्गत हेटौंडा उपमहानगरपालिका वडा नम्बर १२ का १०२ वर्षका गोविन्द लामिछानेले मतदान गरेका छन्।
वडाध्यक्ष पदका लागि आइतबार भएको मतदानमा लामिछाने सहभागी भएका हुन्।
उनले वडाको भोर्लेस्थित विष्णुज्योति आधारभूत विद्यालयको मतदान केन्द्रबाट मतदान गरेका हुन्।
बिहान ७ बजेदेखि सुरु भएको मतदान कार्यक्रममा मतदाताहरूको उत्साहजनक उपस्थिति छ। निर्वाचन कार्यालयले दुई वटा मतदानस्थलको व्यवस्था गरेको छ।
कूल आठ हजार ५३ मतदातामध्ये दिउँसो १ बजेसम्ममा चार हजार दुई सय २३ मतदाताले मतदान गरेका छन्। मतदान केन्द्रमा मतदाताहरू अहिले पनि मतदान गर्न लामबद्ध छन्।
विष्णुज्योति आधारभूत विद्यालयमा रहेको मतदान केन्द्रमा एक हजार आठ सय ४३ मत खसेको छ भने वडाको सिग्रेनीस्थित प्रतिभा आधारभूत विद्यालयमा रहेको मतदान केन्द्रमा दुई हजार तीन सय ८० मत खसेको मतदान अधिकृत सरोज पौडेलले जानकारी दिए।
