जनमत पार्टीका प्रदेशसभा सदस्य सतिशकुमार सिंह मधेस प्रदेशमा मुख्यमन्त्री बन्ने भएका छन्।
सप्तरी क्षेत्र नम्बर २ को (१) बाट निर्वाचित भएका उनलाई मुख्यमन्त्री बनाउन लागिएको जनमत पार्टीका नेता बिपी साहले बताए।
उनकाअनुसार पार्टीले सप्तरीबाटै समानुपातिक सांसद रहेकी रंजुकुमारी मंडल खंगलाई तत्काल बिनाविभागीय राज्यमन्त्रीको शपथ खुवाउने निर्णय गरेको छ।
बिहीबार बिहान १० बजे बस्ने गठबन्धन दलको बैठकबाट कुन पार्टीबाट कसलाई मन्त्री नियुक्त गर्ने निर्णय गर्ने तयारी छ।
बुधबार प्रदेशसभामा जनता समाजवादी पार्टी (जसपा) नेता सरोजकुमार यादवले विश्वासको मत प्राप्त गर्न नसकेपछि प्रदेश प्रमुख सुमित्रा सुवेदी भण्डारीले नयाँ मुख्यमन्त्रीका लागि शुक्रबार बिहान १० बजेसम्म दाबी पेस गर्न आह्वान गरेकी थिइन्।
जनमतको नेतृत्वमा नयाँ सरकार गठनका लागि चार दलबीच पहिल्यै सहमति भइसकेको छ। नेकपा (एमाले), माओवादी केन्द्र, एकीकृत समाजवादी र जनमत पार्टीबीच नयाँ सरकार गठनका लागि सहमति भएको थियो।
चार दलीय गठबन्धनको सरकारमा मन्त्रालय भागबन्डा गर्ने विषयमा बुधबार अबेर राति नेताहरूबीच छलफल भएको थियो। छलफलमा कुन दलले कुन कुन मन्त्रालय पाउने टुंगो नलागेको बैठकमा सहभागी एक नेताले बताए।
ती नेताका अनुसार बिहीबार दिउँसो फेरि मन्त्रालयको भागबन्डा टुंग्याउन बैठक बस्नेछ। प्रदेश स्तरमा सहमति नभए केन्द्रीय नेतृत्वले नै मन्त्रालयको भागबन्डा टुंगो लगाउने नेताहरूले बताएका छन्।
बुधबार मधेस प्रदेशका मुख्यमन्त्री यादव विश्वासको मत लिन असफल भएपछि नयाँ सरकार गठनको तयारीलाई तीव्रता दिइएको हो। असार १ गते बजेट ल्याउनुपर्ने संवैधानिक बाध्यताका कारण दलहरूले सरकार गठनलाई तीव्रता दिएका हुन्।
मुख्यमन्त्री बन्न लागेका सतिश को हुन्?
मुख्यमन्त्री बन्न लागेका सतिश सिंह लोकतान्त्रिक समाजवादी पार्टी (लोसपा) बाट जनमत पार्टीमा प्रवेश गरेका थिए। उनी २०७४ को स्थानीय तह निर्वाचनमा सप्तरीको तिलाठी कोइलाडीका गाउँपालिका अध्यक्षमा निर्वाचित भएका थिए।
२०७९ को स्थानीय तह निर्वाचनमा पनि उनी सोही गाउँपालिकाको अध्यक्षमा उम्मेदवार बने पनि पराजित भए। त्यसपछि जनमत प्रवेश गरेका उनी सप्तरी २ (१) बाट उम्मेदवार बनेर निर्वाचित भए।
उनी प्रदेश सभामा अर्थ समिति सभापति पनि छन्।
जनमत पार्टीको प्रदेश संसदीय दल नेतामा महेशप्रसाद यादव छन्।
संविधानको धारा १६८ (२) मा प्रदेश सभामा कुनै पनि दलको स्पष्ट बहुमत नरहेको अवस्थामा प्रदेश सभामा प्रतिनिधित्व गर्ने दुई वा दुई भन्दा बढी दलहरूको समर्थनमा बहुमत प्राप्त गर्न सक्ने प्रदेश सभाको सदस्यलाई प्रदेश प्रमुखले मुख्यमन्त्री नियुक्त गर्ने प्रावधान रहेकाले सोही व्यवस्थाअनुसार सिंहले नेतृत्व पाउन लागेका हुन्।
