प्रधानमन्त्री केपी शर्मा ओलीले पाँच वर्षअघि आफ्नो नेतृत्वमा बनेको सरकार पनि पुष्पकमल दाहाल 'प्रचण्ड' र माधवकुमार नेपालले गिराएको बताएका छन्।
बिहीबार दिउँसो आफ्ना पक्षका केन्द्रीय कमिटी सदस्यको बालुवाटारमा भएको बैठकलाई सम्बोधन गर्दै ओलीले अहिले पनि उनीहरू नै आफ्नो सरकार हटाउन लागि परेको बताए।
‘सरकारको पक्षमा कहिल्यै बोलेनन्, राष्ट्रको पक्षमा बोलेनन्। भूमिसहितको नक्सा जारी गर्दा सम्बन्ध बिगारेको आरोप लगाइयो,’ ओलीले भने,‘पहिला पनि संविधान बनाएबापत्, नाकाबन्दीको सामना गरेबापत्, एउटा देशसँग मात्रै भएकोमा अर्को देशमा समेत समुन्द्र पुग्ने ढोका खोलेबापत मलाई हटाउन यिनीहरू नै लागेका थिए। अहिले पनि कुनातिर गएर साउती मारेर झुत्तो बनाएर लागेका छन्।'
उनले आफूलाई नेकपाको अध्यक्षबाट हटाउने कुरा तमासा भएको जिकिर गरे।
'पहिले प्रस्ताव अरे, अहिले त अध्यक्षमाथि स्पष्टिकरण अरे, प्रथम अध्यक्षलाई स्पष्टीकरण अरे, यो कुन तमासा हो?,’ ओलीले भने, 'अहिले त पार्टीबाटै निकाले अरे भन्ने सुन्दैछु। कसलै लहडमा निकाल्यो अरे। चेस खेल्दा हात्ती उँट घोडा खाएँ भनेजस्तै हो।'
उनले प्रचण्ड-नेपाल समूहलाई अझै पनि सम्हालिएर आउन आग्रह गरे।
'नत्र कारबाही गर्छौं,' उनले भने।
प्रचण्ड-नेपाल समूहको आजै बसेको केन्द्रीय कमिटी बैठकले प्रतिनिधि सभा विघटनविरूद्ध पुस १४ गते देशव्यापी आन्दोलन गर्ने निर्णय गरेको छ। आन्दोलन परिचालन समितिको संयोजकमा उक्त समूहका प्रवक्ता नारायणकाजी श्रेष्ठ छन्।
प्रधानमन्त्री ओलीले श्रेष्ठको नेतृत्वमा हुने भनिएको आन्दोलनको पनि खिसिटिउरी गरे।
'न जनयुद्ध लडेको, न जनआन्दोलनमा छ। उसकै संयोजकत्वमा आन्दोलन अरे। प्रचण्ड र बादल खुला रहँदा पनि नारायणकाजी पर्दाभित्रबाट अन्तर्वार्ता दिन्थे,’ ओलीले भने, ‘उसकै नेतृत्वमा आन्दोलन अरे। खुट्टी हेर्दै चाल पाइयो!’
उनले आन्दोलन गर्नुको औचित्य पनि नभएको बताए।
'आन्दोलन किन गर्ने, चुनावमा जान किन डराको। टाउको ठूलो भए पनि जनमत छैन। त्यही भएर संसद पुनर्स्थापना गरेर जालझेल गरेर आशीर्वाद लिएर खान पाइन्छ कि भन्ने छ,’ उनले भने।
प्रचण्ड र नेपालले राष्ट्रका हितलाई कुठाराघात गर्न खोजेकाले उनीहरूको भ्रममा नपर्न पनि उनले आग्रह गरे।
मध्यावधि चुनाव भए पनि यो व्यवस्था नजाने ओलीको कथन छ।
'हामी छौं यो प्रणालीको रक्षा गर्ने। अब एक-दुई चुनाव लडेर राम्रा काम गरेपछि हाम्रा सन्ततिले सुख पाउने छन्,' उनले भने, ‘हामीले हार्यौं भने देशले हार्छ। त्यसैले तपाईंहरू दृढ साहस लिएर जनतामा जानुस्। कोही हिमचिमका भएर त्यता जानुभएको भने यता फर्किनुस्। दुई जनाको लहडमा सती नजानुस्, परिवार र पैसाका पछि लाग्नेलाई साथ नदिनुस्।'
उनले प्रचण्ड र नेपाल अहिले आपतमा रहेको बताए।
'उहाँहरूलाई आपत छ। एक जना उधारो हुन्न भन्नुहुन्थ्यो। जे होस् हाताहाती लिनुभएछ। तेस्रो त यतै बन्नुस् भन्या हो। दोस्रो र तेस्रोमा के फरक छ र? माधवजीले उता पनि गोल्ड त पाउनुभएन। सिल्भर र कास्यमा त के फरक छ र!’ ओलीले भने।
