सडक निर्माणमा जिम्मेवार निकाय र ठेकेदार कम्पनीको गैरजिम्मेवारीका कारण सास्ती भोगिरहेका नागरिकले पछिल्लो समय विरोधको नयाँ शैली अपनाएका छन्- सार्वजनिक ठाउँमा ठेकेदारको तस्बिर टाँसेर नैतिक दबाब दिने।
भक्तपुरको नगरकोटका स्थानीयले ठेकेदारविरूद्ध थालेको उक्त विरोध शैली अहिले अन्यन्त्रका नागरिकले पनि पछ्याउन थालेका छन्।
केहीदिन अघि दोलखाको चरिकोटका स्थानीयले पनि बाटो नबनाउने ठेकेदारको फोटो बस र बिजुलीका पोलमा टाँसे।
मंगलबार मोरङको विराटनगरमा पनि त्यस्तै दृश्य देखियो। तर विराटनगरवासीको निशानामा ठेकेदार होइन महानगर प्रमुख भीम पराजुली परेका छन्।
महानगरपालिकाले सडक निर्माणमा चासो नदेखाएको भन्दै विराटनगर–६ का स्थानीयले मेयर पराजुलीको पोटो सडकको पोलमा टाँगेका छन्।
कोसी राजमार्गबाट शिवमन्दिर चोक हुँदै पश्चिमतर्फ जाने बाटो निर्माण नभएपछि स्थानीयले मेयरको फोटो राखेर विरोध जनाएका हुन्।
स्थानीयले ‘हाम्रो विराटनगर, राम्रो विराटनगर’ लेखिएको पोष्टर बिजुलीको पोलमा राखेका छन्। सडकमा धुलो उडेर आजित भएकाहरूले मंगलबार बिहान भद्र विरोध गर्दै पोलमा तस्बिर टाँगेको स्थानीय टेकेन्द्र भट्टराईले जानकारी दिए।
विराटनगर महानगरपालिकाभित्र ढल तथा नाला निर्माण गर्ने गरी क्षेत्रीय सहरी विकास परियोजना सञ्चालित छ। परियोजनाको काम समयमा नै सम्पन्न नहुँदा नगरबासीले समस्या भोग्दै आएका छन्।
यता चरिकोटवासीले मंगलबार पनि ठेकेदारलाई दबाब दिन नयाँ जुक्ति निकालेका छन्।
असारमै कालोपत्रे गरिसक्नुपर्ने सडक निर्माणमा ठेकेदारले ढिलाइ गरेपछि दोलखाको चरिकोटमा स्थानीय वासिन्दाले मानव साङ्लो बनाएर विरोध गरेका छन्।
गत शनिबार सडक अलपत्र पार्ने ठेकेदार दीपक सापकोटाको फोटो बस, चोक र पोलमा टाँसेर विरोध गरेका उनीहरूले मंगलबार मानव साङ्लो बनाएका हुन्।
सिन्धुपाल्चोक खाडीचौर– मुडे २५ किमी र मुडे–चरिकोट ३० किमी बेग्लाबेग्लै ठेक्का निकालेर सडक निर्माणको जिम्मेवारी दिए पनि सडक निर्माण अलपत्र छ।
मंगलबार बिहान चरिकोटस्थित सातदोबाटोमा सडक निर्माण काम सुरू गर्न माग गर्दै मानव साङ्लो बनाइएको हो। उनीहरूले शंकरमाली निर्माण सेवाका प्रमुख सापकोटाविरूद्ध कारबाही गर्न पनि माग गरेका थिए।
