प्रहरी भन्छ- विप्लव कार्यकर्ताले बम बनाएर अन्त लैजान लाग्दा विस्फोट

प्रकाश ढुंगाना

काठमाडौं, वैशाख १२

आइतबार दिउँसो राजधानीका घट्टेकुलो र सुकेधारामा भएका बम विस्फोटमा नेत्रविक्रम चन्द ‘विप्लव’ को नेपाल कम्युनिष्ट पार्टीको संलग्नता रहेको प्रहरीको प्रारम्भिक अनुसन्धानले देखाएको छ।

‘सो स्थानमा बम बनाएर अर्कै स्थानमा लैजाने क्रममा विस्फोट भएको देखिन्छ,’ अनुसन्धानमा खटेका एक प्रहरी अधिकारीले भने, ‘यस विषयमा हामीले गहन रूपमा अनुसन्धान गरिरहेका छौं।’

घट्टेकुलो विस्फोटमा विप्लव माओवादीको विद्यार्थी संगठनका त्रिचन्द्र कलेज अध्यक्ष रविन केसी घाइते भएका छन्। घटनास्थलबाट प्रहरीले उक्त समूहले जेठ १३ गते आयोजना गरेको नेपाल बन्दका पर्चा पनि भेटिएको प्रहरीले जनाएको छ।

यसैबिच सुकेधारामा बम विस्फोटमा परी मृत्यु भएको दुई जनामध्ये एक जनाको सनाखत भएको छ।

महोत्तरी भइ सुकेधारामा सैलुन चलाउँदै आएका ५९ वर्षका जीवकुमार ठाकुरको घटनास्थलमै मृत्यु भएको हो। अस्पतालमा उपचारका क्रममा मृत्यु भएका एक जनाको भने सनाखत हुन सकेको छैन। घटनामा ४ जना घाइते भएका छन्।

घटनास्थलबाट विप्लव नेकपाको पर्चा भेटिएपनि ठाकुर भने सो पार्टीमा आबद्ध रहेको वा नरहेको खुल्न सकेको छैन्।

‘ठाकुर संलग्न नभए बम त्यहाँ कसरी पुग्यो, हामी अनुसन्धानमा जुटेका छौं,’ ती अधिकारीले भने।

यसअघि विप्लवले जेठ ८ गते निकालेको विज्ञप्तिमा केपी ओली सरकारले गरेको जघन्य घटनाको बदला जनताले उचित समयमा लिने नै चेतावनी दिएका थिए। प्रहरीले आफ्ना कार्यकर्ता तीर्थराज घिमिरेलाई भोजपुरमा हत्या गरेको भन्दै विप्लवले बदला लिने चेतावनी दिएका थिए।