नेत्रविक्रम चन्द ‘विप्लव’ नेतृत्व नेपाल कम्युनिष्ट पार्टी (माओवादी) का प्रवक्ता खड्गबहादुर विश्वकर्मा ‘प्रकाण्ड’लाई प्रहरीले पक्राउ गरेको छ।
उनलाई मंगलबार साँझ काठमाडौंको चाल्नाखेलबाट पक्राउ गरिएको प्रहरीले जनाएको हो।
गत वर्ष स्थानीय र आमचुनावमा विभिन्न स्थानमा हिंसा भड्काएको र चन्दा असुली गरेको उजुरीको अनुसन्धान गर्न उनलाई पक्राउ गरिएको हो।
उनीसँगै स्वकिय सचिव मनबहादुर श्रेष्ठ र चालक हरिशचन्द्र आचार्य पनि पक्राउ परेका छन्।
उनीहरूबाट बरामद् कागजात हेर्दा ७ करोड रूपैयाँ चन्दा उठाएको देखिएको प्रहरीले जनाएको छ। प्रहरीले उनीहरूमाथि थप अनुसन्धान गरिरहेको छ।
तत्कालीन माओवादी पार्टीका पोलिटब्युरो सदस्य रहेका विश्वकर्मा पूर्वमन्त्री समेत हुन्।
