अलबिदा मणी शाह (भिडियो र फोटोफिचर)

सेतोपाटी संवाददाता

काठमाडौं, जेठ १

नेपाली राष्ट्रिय फुटबल टोलीका पूर्व खेलाडी मणी विक्रम शाहको आज अन्तिम संस्कार हुँदैछ। पित्तथैली र कलेजोको समस्याबाट पीडित शाहलाई आइतबार साँझ नर्भिक अस्पतालमा भर्ना भएका सोमबार साँझ निधन भएको हो।

शाहको शव अन्तिम श्रद्धाञ्जलीका लागि मंगलबार बिहान १० देखि १२ बजेसम्म दशरथ रंगशालामा राखिएको थियो। उनलाई श्रद्धाञ्जली दिन एमाले वरिष्ठ नेता माधवकुमार नेपाल, कांग्रेसका नेता विजयकुमार गच्छदार लगायतका नेताहरू उपस्थित थिए।

शाहको मंगलबार नै पशुपति आर्यघाटमा अन्तिम संस्कार गरिँदैछ।

शाह नेपाली फुटबलको उत्कृष्ट मिडफिल्डर हुन् । सन् १९८५ देखि १९९८ सम्म राष्ट्रिय टोलीबाट खेलेका छन्।

शाह सन् १९८५ मा १७ वर्षको उमेरमा दोस्रो दक्षिण एसियाली खेलकुदमा पहिलोपल्ट राष्ट्रिय टोलीमा समावेश भएका थिए । त्यसपछि उनले करिब १० वर्ष नेपाली फुटबलमा राज गरे।

सन् १९९३ ढाकामा भएको छैटौं दक्षिण एसियाली खेलकुदमा नेपालले स्वर्ण जित्दा उनी टिमको महत्वपूर्ण सदस्य रहेका थिए।

मनाङ मस्र्याङ्दी क्लबलाई ए डिभिजन लिगको उपाधि समेत जिताएका उनले १९९७ मा फुटबलबाट संन्यास लिए।

सन् १९९८ को बैंकक एसियाडमा नेपालको झण्डा बोक्ने मौका पाएका थिए। एसियाडमा राष्ट्रिय झन्डा बोक्ने उनी एक्ला फुटबल खेलाडी हुन्।