मिनेन्द्रको कटाक्ष-रामचन्द्र दाइले लेखेको चिठी 'बाउलाई फाल्ने डोको' हुन्छ

सेतोपाटी संवाददाता

काठमाडौं, वैशाख १३

दुई महिना अघि पार्टी सभापति शेरबहादुर देउवालाई नेता रामचन्द्र पौडेलले एउटा चिठी लेखेका थिए। चुनावको समिक्षा गर्न भन्दै अहिले चलिरहेको केन्द्रीय समिति बैठकमा उक्त चिठीको फेरि चर्चा चलेको छ।

पार्टी र मातहतका भ्रातृ संस्थाहरू अस्तव्यस्त हुँदा पनि सम्हाल्न असफल भएको आरोप लगाउँदै पौडेलले देउवालाई लेखेको चिठीमा भनेका थिए,'तपाईंले एउटै काम गर्नुभो–आफ्नो गुटको भरणपोषण। हो, तपाईंको आफ्नो गुट मजबुत बन्यो होला, तर विचरा कांग्रेस झनझन दुर्बल बन्यो।’

आइतबार केन्द्रीय समितिमा नेतृ इश्वरी न्यौपानेले पौडेलको चिठीबारे बोलेकी थिइन्। पार्टी सभापति देउवालाई पौडेलले त्यसरी चिठी लेखेर गल्ति गरेको उनको जिकिर थियो।

उक्त चिठीबारे बुधबार नेता विमलेन्द्र निधिले फेरि प्रश्न उठाए।

लिखित र सार्वजनिक रूपमा पौडेलले सभापतिलाई त्यसरी चिठी लेख्न नहुने निधिको धारणा थियो। निधि देउवाका उत्तराधिकारी भनेर चिनिन्छन्।

'कांग्रेसको इतिहासमा त्यो चिठीको रेकर्ड हुने भएकाले लिखित रूपमा सार्वजनिक नगरेको भए हुन्थ्यो। बरू मौखिक रूपमै भन्न सक्नुहुन्थ्यो,' निधिलाई उदृत गर्दै एक नेताले भने,'तपाईं सभापति भएको बेला त्यस्तै चिठी आए के गर्नुहुन्थ्यो?'

ती नेताका अनुसार प्रश्न सोधेपछि निधि एकछिन रोकिए। उनी रोकिएकै बेला अर्का नेता मिनेन्द्र रिजालले कटाक्ष गरे-रामचन्द्र दाइ कदाचित सभापति भए, यो चिठीलाई 'बाउको डोको' बनाएर उहाँलाई फाल्न काम लाग्छ!

त्यसपछि बैठक हाँसोले गुञ्जिएको थियो। रिजालले दिएको 'बाउको डोको'वाला उदाहरण एउटा कथा हो।

कथामा बुढो बा र छोरा हुन्छन्।

छोराको पनि ७/८ वर्षे छोरा हुन्छ। एकदिन बुढो बाबुलाई छोराले डोकोमा बोकेर भीर नजिकै लैजान्छ। पछि पछि सानो छोरा पनि पुग्छ। जब आफ्नो बाले हजुरबालाई भीरबाट डोकैसँग फाल्न थाल्छ छोराले उसलाई रोक्छ।

'बा डोको नफाल्नुस है पछि तपाईंलाई फाल्न काम लाग्छ!' छोराले भन्छ।

पौडेलले देउवालाई लेखेको चिठीसँग रिजालले यही डोकोको तुलना गरेका हुन्।

महासमितिमै कांग्रेसले अबको कार्यदिशाबारे वृहद छलफल गर्नु पर्ने उल्लेख गर्दै निधिले प्रतिनिधिसभा चुनावको हारका कारण तत्कालीन मात्र नभएको बताए।

निधिले मधेसमा कांग्रेसलाई धेरै भोट आउनुको कारण उम्मेदवार चयनमा भएको त्रुटी भएको बताए।

'स्थानीय चुनावमा मधेसमा हाम्रो राम्रो मत आएको थियो किनभने तलैबाट उम्मेदवार चयन भएर आएका थिए तर प्रतिनिधिसभामा केन्द्रबाट उम्मेदवार तोकियो त्यसैले मधेसमा भोट कम आयो,' उनले भने।

निधिले केन्द्रीय समिति बैठकपछि महासमिति बोलाउनु पर्ने र त्यहाँ चुनावी हारको समीक्षा अझ गहिरो रूपमा गर्नु पर्ने बताए।

प्रकाशित मिति: बिहीबार, वैशाख १३, २०७५ १६:२८

सिफारिस